Racom Maubisse (10/11/2022) Aktividade deseminasaun ida ne’e halao iha Salaun Paroquial Igreja Paroquia Imaculado Coração de Maria Maubisse loron 10/11/2022.

Ba Radiu Komunidade Maubisse Mau-Loko Kórdenador ba Organizasaun Lao Hamutuk Celestino Gusmão hateten, Lao Hamutuk núdar Organizasaun Sosidade Sivil Nasional ne’ebe liu tinan 20 ona hala’o peskiza, analiza no advokasia ba prosesu dezemvolvementu iha Timor Leste.

“Tinan barak ami tau matan ba prosesu dezemvolvementu iha ne’e Timor Leste partikularmente tau matan ba asuntus sira Orsamentu Jeral do Estadu (OJE), ekonomuku, no dezemvolvementu Petroliu no Gas. Ami mai iha ne’e kumpri ami nia misaun ida fahe informasaun esensial ba sosidade no sidadaun sira hotu, ami mai iha ne’e lori asuntus tolu ida kona-ba Proposta OJE 2023 ne’ebé oras ne’e dadauk lao hela ho debate Parlementar iha PN abrova ona iha Jeneralidade, hahu ohin ba oin Deputadu sira sei diskuti iha faje espesialidade no mós aprovasaun final Global” Dehan Kórdenador Lao Hamutuk iha Maubisse 10/11/2022.

Alende ida ne’e Lao Hamutuk mós sempre halo diskusaun iha nivel Nasional no Municipiu kada tinan atu bele informa no deskuti hamutuk ho entidade sira kona-ba importansia husi husi Orsamentu Jeral Estadu (OJE), Mudansa klimátika inklui Orsamentu ba seitór Agrikultura.

“Ami mós esplika kona-ba situasaun Klimatika iha Mundu ida ne’e esforsu saida maka Mundu halo no ita halo, no mós esplika kona-ba realidade ekonomiku husi aspetu Agrikultura, Aihan, Konsumu, dadus sira hotu ne’ebé maka ita nia Rai iha. No esforsu itoan ne’ebé ita nia Governu halo dezeña estatejia polítika Orsamental atu kontribui ba redusaun problema ne’ebé maka ita nia Rai hasoru tinan barak nia laran” Dehan Kórdenador Lao Hamutuk ne’e 10/11/2022.

Aktividade deseminasaun ida ne’e hetan partisipa husi Autoridade Lokal, Autoridade Komunitaria, Juventude no Estudante sira.

Jornalista                     Moises da Silva Magno

Editór                          Joaquim de Fátima Coutinho