Racom Maubisse (22/11/2023) “Ita bele dehan katak sai Ukun ne’e laos Previléziu ida maibe Ukun ne’e Vokasaun ida. Ita presija valoriza ida ne’e tamba la fasil maibe ho Nai Maromak nia tulun atu Liurai sira inklui Administrador ida ne’ebé hau hare ema ne’ebé iha fuan bot, simples ida ne’ebé hakarak hakbesik-an nafatin ba Nai Maromak tamba ne’e Ukun nain sira ohin loron ita presija Ukun nain sira hanesan ne’e. Laos kolia barak maibe halo barak, halo barak ne’e maka bele justifika kolia barak, kolia barak la halo barak ne’e la Justifika buat sá maka ita halo”. Hateten Aktual Amu Pároko Paroquia Imakuladu Korasaun de Maria Maubisse (PICOMA Sigla Portugés) Pe. João Soares, hodi kongatula Xefe Suku Eleitu no Re-Eletu ne’ebé nafatin hetan Konfiansa husi Povu liu husi dalan Demokrásia 22/11/2023.
Tamba ne’e ba Xefe Suku Eleitu no Re-Eletu sira nia husu atu Ukun ho didiak, mesmu ke sai ona hanesan Autoridade maibe buka nafatin Nai Maromak, basa liu husi Nia tulun deit maka bele asegura nafatin Ukun ne’e tó fim.
“Hau nia mensajen premeiru liu maka ne’e atu Ukun ho didiak no lolos premeiru liu sira tenki rekoiñese-an katak ita sempre iha frakeza. Entaun bele hanesan Autoridade buka nafatin Nai Maromak ne’e maka sai premeiru liu atu núne’e bele asegura ita nia Ukun. Segundu sai Ukun nain ne’e hanesan vokasaun ida tamba iha matenek barak ne’ebé kualidade tamba sa tenki o, tenki hau, tenki nia, ne’e katak Nai Maromak haré ita iha kapasidade diak atu lidera tamba ne’e uja didiak oputunidade ida ne’e, Povu nia lian ne’e Nai Maromak Nia lian. Tan ne’e buka atu ukun senseridade, Honestidade, Ukun ho responsabilidade tau Povu ne’e nia prokupasaun uluk liu iha ita nia Grupu, iha ita nia Partidu no ita nia Familia. Tamba mai husi familia ida maibe Ukun ne’e ukun ba familia hot-hotu, mai karik husi Partidu ida maibe Ukun ne’e Ukun ba Partidu hot-hotu tamba Povu hot-hotu ne’e mesak ita nian, polítikamente ita ida-idak mai husi grupu, organizasaun, no mai husi Partidu maibe husi Partidu ne’e mós fasilita ita atu sai Ukun ba Ema hot-hotu tamba ne’e buka atu Ukun Povu hotu la esklui ema ida.” Tenik Amu Pároko PICOMA liu husi intervista ho Jornalista Rádiu Komunidade Maubisse Mau-Loko Kuarrta ne’e iha nia Rezidensia.
“Ida Ikus hau espera katak, Nai Xefe Suku sira sei kopera didiak ho Paroquia. Paroquia pronto tamba hau hanesan Parku hau sempre pronto nafatin atu rona sira nia hanoin sira, bele iha krítika ruma husi sira mai hau, bele iha hanoin foun ruma husi sira mai hau tamba sira hatene diak liu Maubisse sira Maubisse oan hau pronto atu rona Xefe Suku sira. Laos deit sira Sarani sira ne’ebé iha hanoin diak kontribui ható krítika ruma fó hanoin ba diak hau pronto nafatin atu kolabora”. Hanahs Nai Lulik ne’e.
Tamba ne’e ba Autoridade Lokal Postu Administrativu Maubisse, no Autoridade Suku sira ne’ebé hetan ona konfiansa husi Povu Suku 9, presija atu servisu hamutuk nafatin hamrtin paz no unidade hodi kontribui ba Dezemvolvementu Rai Maubisse ba jerasaun sira tuir mai.
Jornalista Moises Magno
Editór Joaquim Coutinho
