Racom Maubisse (19/10/2023) Foinsa’e Feto husi Suku Horaiquic Postu Administrativu Maubisse Munisípiu Ainaro, Ana Paula de Araújo da Silva disidi kandidata-an ba Lidera Suku Horaiquic tamba Demokrásia fó biban ba ema hotu atu kompete.
Anapaula ható ninia prontidaun ne’e liu husi Rádiu Talk Kinta feira ne’e iha Studiu Radiu Komunidade Maubisse Mau-Loko (RKMM) (19/10).
Tuir Foinsa’e Feto ne’e katak maske dala barak tau fiar ba iha Mane sira maibe la kolia no tau prioridade kona-ba Asutu feto sira nian.
“Feto dala barak tauk no nafatin iha kotuk entaun ho hau nia prinsipiu rasik hakarak hamrík hodi hatudu ba públiku liu-liu ba Timor-Leste katak Feto Maubisse mós pronto hamrík hodi lidera. Tamba dala barak ita tau fiar ba ita nia Mane maluk sira maibe sira nungka kolia kona-ba asuntu Feto nian, entaun núdar Feto ida ita iha sentimentu katak Demokrásia fó biban ba ema hotu bele kandidata-an ba Xefe Suku tamba ne’e ho hau nia prinsipiu rasik hakarak kandidataan laos ho sentiment pesoal maibe hau hakarak tau buat ne’ebé komun labele privatiza baut ida komun ba Privadu tamba ne’e hau hakarak hamrík” Hateten Kandidata Xefe Suku ne’e 19/10/2023.
Ana Paula hatutan laos ona tempu ba Feto atu servisu iha dapur maibe Feto mós pronto atu lidera.
“Núdar Joven ida dala barak ita nia kultura nafatin hanehan Feto sira servisu dométika iha dapur entaun núdar Feto Maubisse oan ida ita pronto hamrík iha ita nia pronsipiu para ita hatudu ba Feto Maubisse no mós ba Timor-Leste katak Feto laos ninia servisu maka iha dapur deit maibe Feto mós bele atu partisipa iha vida polítika, tamba dala barak ema dehan luta ne’e furak wainhira Feto ho Mane hamutuk, maibe luta ne’e furak liu maka Feto sira hamrík ho ita nia Mane maluk sira oinsa hare ba dezemvolvementu iha ita nia Suku no ita nia Postu Administrativu Maubisse Munisípiu Ainaro. Tamba ida ne’e maka hau nia didikasaun núdar Feto pronto atu kontribui no pronto atu kandidata-an sai hanesan Xefe do suku ba tinan 7 mai.” Hateten Anapaula.
Tamba ne’e ba Komunidade Suku Horaiquic Postu Administrativu Maubisse Anapaula Husu;
“Tamba ne’e Joven no Komunidade Suku Horaiquic keta haluhan dia 28 de Otubru 2023 ita bót sira fó fiar mai hau liu husi dalan Demokrásia espera katak ita bót sira votus maka hau nia reponsabilidade iha tinan 7 nia laran laos opurtunidade. Tamba ita hotu hatene katak era ida ne’e era globalizasaun Feto pronto atu lidera ne’ebé espera katak Feto no Mane hotu tenki fó fiar no mós ba Joven sira hotu, hanesan dala barak ema hateten katak Feto ne’e Manu Inan no Mane sira maka sai Manu Aman, maibe so Manu Inan deit maka bele loke liras atu hamahan nia oan sira. Ne’ebé hau espera katak ita bót sira fó fiar mai hau núdar Feto ida atu lidera iha Suku Maka hau sei kuidadu ita bót sira hanesan Inan ne’ebé kuidadu ita iha fulan 9 nia laran tó hetan Mundu ne’e nia Roman. Hau fiar katak sei wainhira ita bót sira fó fiar maka ita sei lori vitoria no ita sei hadia ita nia Suku hodi karia Paz no Estabilidade liu-liu iha Suku Horaiquic Postu Administrativu Maubisse Munisípiu Ainaro” Hakotu Anapaula.
Entertatu Knadidatu ne’ebé Kompete ba Elisaun Suku iha Suku Horaiquic hamutuk Kandidatu 16, no Suku Horaiquic kompostu Aldeia 4 ho nia totál Populasaun 2.414 (Rihun Rua Atus Ha’at Sanolu Rsin Ha’at)
Jornalista Moises Magno
Editór Jaoquim Coutinho
