Racom Maubisse, 17/05/2023, Asosiasaun Jornalista Timor Lorosa’e (AJTL) realiza treinamentu konaba oinsa kombate disinformasaun no hate speech/insultu odiu, durante loron 2 hahu husi dia 15-16 de Maiu 2023 iha Centru Nasional Chega
Aktvidade treinamentu refere halao Iha grupu dahuluk nian ne’ebe partisipa husi Radio Komunidade hamutuk nain 9, mídia online no estudante Unversitaria iha Dili laran. Treinador ba grupu ne’e mak Wahyu Dhyatmika núdar Sekretaris Jenderal Asosiasi Media Siber Indonesia (AMSI) no Xefe Redasaun Tempo.co husi Jakarta Indonesia. Iha sesaun ne’e Pak Wahyu fo liu oinsa halo analiza ba disinformasaun no hate speech, oinsa verifika informasaun falsu no lalaok hate speech ne’ebé espallah iha era digital.
Ligado ho formasaun ne’e Prezidente Asosiasaun Jornalista Timor Lorosa’e Zevonia Viera liu husi intervista ho Jornalista hateten, objetivu husi formasaun ne’e maka atu hasa’e abilidade no koiñesementu Jornalista sira oinsa atu kombate informasaun falsu, insultu no odiu iha públikasaun iformasaun sira iha ambitu elisaun Parlamentár 2023.
“Objetivu husi programa ne’e tamba ita hatene katak iha anbitu elisaun no mós moris iha era dijital ema barak maka uja sosial mídia internet sai plataforma importante ba sosiadade ba jornalista sira entaun ita hatene katak iha era dijital ne’e ema barak asesu informasaun falsu odiu iha sosial mídia tamba ne’e AJTL iha komitmentu kuntinua nafatin fó formasaun ba membrus sira, estudante sira, Radiu Komunidade atu iha kapasidade no abilidade verifikasaun informasaun falsu sira liu-liu iha online núne’e bele redus informasaun ne’ebé bele fó impaktu ba públiku. Hetan impaktu barak liu maka komunidade vulneravel feto, ema ho difisiensia, labarik sira no ema sira hela iha rural ne’ebé maka la asesu informasaun kredibel tamba ho informasaun falsu ne’e halo sira sai vulneravel liu tan tamba nia labele hetan informasaun ne’ebé lós”. Hateten Zivonia ba Jornalista 16/05/2023.
Prezidente AJTL Zevonia Viera hatutan ho esperansa katak liu husi formasaun ne’e bele kapasita diak liu tan Jornalista sira oinsa atu tatoli informasaun ne’ebé lós no justu ba Komunidade.
“Liu husi kapasitasaun ba membru sira ne’e espera katak, husi tinan ba tinan, loron ba loron, no fulan ba fulan membru sira nia kapasidade ne’e aumenta, ita sempre dehan Jornalista tenki profesional entaun liu husi formasaun sira ne’e wainhira ninia kapasidade aumenta, nia intelektualidade aumenta, nia eskil aumenta bele hatudu ninia kapasidade profesional e hau fiar públiku sei respeita servisu jornalista nian, Radiu Komunidade no estudante Universitáriu sira.” Hakotu Zevonia Viera.
Programa formasaun konaba oinsa kombate disinformasaun no hate speech/insultu odiu, ne’e realiza tanba hetan apoiu husi Governu Amerika liuhusi Embaixada Estadu Unidu Amerika iha Timor-Leste ho orsamentu hamutuk $15.000 (Rihun Sanolu Resin Lima)
Jornalista Moises Magno
Editór Joaquim Coutinho
