Racom Maubisse, 14-11-2022, Família entrega restus mortais Saudozu Marcelino Alias “Malorek Alin Timur” ba estadu hodi halot iha Osoáriu Munisípiu Ainaro.
Ba Radio Komunidade Maubisse Maulokok, Sábdu foin lalais ne’e, família lori ona restu mortais Saudozu Marcelino “Malorek Alin Timur” ba iha Igreja Santa Maria Ainaro hodi hala’o missa requem, molok entrega ba estadu hodi halot iha Osoáriu Munisípiu Ainaro.
“Saudozu Marcelino Moris iha Suku Maununu, Postu Administrativu Ainaro, Munisípiu Ainaro iha loron 01 fulan Janeiru tinan 1955, oan husi Adelino Dos Reis no Adelina Xavier, saodozu nu’udar oan da-haat, Saudozu hahú involve-an iha tempu rejisténsia iha tinan 1975 hamutuk ho komandante Miguel “as roket” Pedro Ramos “tatoli”, Januario “Lekas” iha kompañia Macelo Mamalau, no Iha tinan 1975, Saudozo sai hanesan membru falintil iha kompañia Macelo Mamalau hodi servisu hamutuk ho saodozu Venancio Ferras, Martinho de Araújo, José Xavier, Januario Lekas, José Magalhães no sira seluk tan.
Hafoin baze de apoiu Macelo Mamalau rahun, saudozu akompanha husi família sira lori ba Mape, Zumalai iha fulan-jullu, Iha tinan 1978 família sira rende, maibé saudozu hili kontinua luta iha ai-laran, hamutuk ho komandante Venâncio Ferras.
Bainhira luta, saodozu koñese ho kódigu “malorek” no iha prosesu luta ne’ebé naruk, muda husi zona ida ba ba zona seluk, saudozu mós koñesido ho kódigu “alin timur” ka “oan-timur”, Iha tinan 1984 to’o 1986 saudozu asumi kargu hanesan komandante seksaun, no kontinua iha tinan 1986, saudozu sai husi Ainaro ba ponta leste, hamutuk ho kompañeiru José “mane mesak” no “lekibere” akompaña konseleiru bere-malai-laka, bere lautem lospalos iha tinan 1988, hafoin partisipa iha enkontru ne’ebé konvoka husi komandante em xefe das falintil, Kayrala Xanana Gusmão iha foho matebian, Iha foho matebian, saodozu sira hetan embuskada husi militár Indonézia, ne’ebé rezulta saudozu no kombatente na’in rua seluk lakon vida.
Enkuantu lia menon ne’ebé saudozu tatoli hela durante nia jornada moris maka “Karik ha’u mate imi sura mós ho ha’u, karik ha’u moris sura mós ho imi”.
Reprezentante famíli Pedro Soares de Jesus afirma katak;
“Mesmu saudozu nia isin laiha ona, maibé nia espíritu luta sei buras nafatin iha família nia le’et hodi kontinua ba prosesu konstrusaun estadu”.
Marka prezensa iha missa requém ne’e, Brigadeiru Jenerál F-FDTL Cornelio Ximenes “Maunana” Deputadu Antonino Bianco, Administradór Munisípiu Ainaro, Leovegildo Amaral Pereira, família saudozu nian kolega no parente sira.
Jornalista :Natalino Mendonca
Editor :Joaquim de Fatima Coutinho
