Racom Maubisse (14/06/2022) Suku Manelobas no Suku Manetu Postu Administrativo Maubisse Municipio Ainaro, Riku ho Produtu Kafé, Koto, Inklui Produtu sira Seluk Maibe ho situasaun udan hanesan agora dadaun Komunidade husi Suku rua refere labele lori ba fan iha Merkadu tanba kondisaun Estrada ne’ebe susar tebes atu bele ultrapasa mai to iha Mekanu Lokal no merkadu Nasional.
Ba Radio Komunidade Maubisse Mau-Loko Rezidente Suku Manelobas Maubisse Domingos Ribeiro Monis hateten;
“Produtu Lokal ne’ebe maka iha Suku Manetu Manelobas premeiru maka Kafé, sigundu maka Koto, Modo, Sabraka, no sira seluk tan. Maibe asesu estrada ba ami Komunidade Manetu ho Manelobas ne’e maka araska tamba tempu udan, tamba ne’e maka ami komunidade Manelobas no Manetu Rekomenda ba Nai Ulun sira ba Governu se bele tau matan mai ami nia halerik ne’e” Hateten Komunidade ne’e ba Jornalista RKMM iha Sede Suku Manelobas Maubisse 14/06/2022.
Tuir Pesoal Apoiu Administrasaun (PAAS) Suku Manelobas Alexandrino da Costa hateten iha Tempu udan ho kondisaun estrada ne’ebe susar asesu iha Tempu udan difikulta tebes Kompañia sira tama ba sosa Komunidade sira produtu liu-liu Produtu Kafé.
“Agora dadaun hanesan tempu Kafé ne’e difikulta teb-tebes ema atu mai sosa deit Kafé mos ema tauk tia entaun sai hanesan vítima ne’e maka Komunidade. Tamba ne’e husu ba iha Ministériu Kompetente atu aslera lalais programa sira ne’e iha leten liu-liu mai iha Suku Manelobas tamba iha Komunidade sira hulan deit balun lori kuda liu-liu maka komunidade sira ne’ebe dók liu husi estrada Nasional at liu tan maka hanesan ohin loron tempu udan hanesan ne’e” Dehan Reprejentante Xefe Suku Manelobas ne’e ba Jornalista RKMM 14/06/2022.
Suku Manelobas Kompostu husi Aldeia 4 maka hanesan Aldeia Koto Matan, Ernaru, Hautei, no Aldeia Hautilu. Total Populasaun 1.408 habitantes Xefe de Familia hamutuk 271.
Jornalista Moises da Silva Magno
Editór Joaquim de Fátima Coutinho
