Iha loron 30 no 31 fulan-janeiru, Ministru Investimentu, Komérsiu no Indústria Malázia nian, Tengku Datuk Seri Utama Zafrul Abdul Aziz, hala’o vizita ofisiál mai Timor-Leste, ho objetivu atu hametin kooperasaun bilaterál iha área estratéjika sira. Durante ninia estadia, aleinde hala’o sorumutu ho Primeiru-Ministru no membru Governu sira-seluk, Tengku Zafrul Aziz sai sasin ba asinatura akordu ida entre Weststar-GAP Aviation, empreza konjunta ida ne’ebé kompostu hosi Timor GAP no empreza Malázia Weststar Aviation Services, ho Santos, ba servisu transporte elikópteru hodi fó apoiu ba operasaun petrolíferu.
Delegasaun Malaia, kompostu mós husi Diretór Ezekutivu Weststar Group, Tan Sri Dr. Syed Azman Syed Ibrahim, ne’eb’e simu iha Aeroportu Internasionál Prezidente Nicolau Lobato husi Vise-Primeiru-Ministru no Ministru Koordenadór Asuntus Ekonómikus, Ministru Turizmu no Ambiente, Francisco Kalbuadi Lay, no husi Embaixadór Malázia nian iha Timor-Leste, Datuk Amarjit Singh Sarjit Singh.
Iha sesta-feira lorokraik, loron 31 fulan-janeiru, Primeiru-Ministru Kay Rala Xanana Gusmão simu Ministru Tengku Zafrul Aziz iha Palásiu Governu, iha ne’ebé sira ko’alia kona-ba oportunidade kooperasaun atu promove dezenvolvimentu nasionál, nune’e mós Malázia nia apoiu kontinua ba Timor-Leste-nia prosesu adezaun plena iha ASEAN.
Iha ámbitu husi vizita ida-ne’e, Governante Malázia ne’e sai sasin ba asinatura kontratu ba prestasaun servisu transporte aéreu entre Weststar-GAP Aviation LDA no empreza petrolífera Santos Limited. Akordu ida-ne’e ho objetivu atu apoia Santos nia operasaun iha “Offshore” iha rejiaun Bayu-Undan, liuhosi utiliza elikópteru Leonardo AW189 rua ba operasaun transporte no evakuasaun tripulante sira entre Dili, Timor-Leste, no Darwin, Austrália.
Serimónia asinatura ne’e hala’o iha Hotel Timor, Dili no hetan partisipasaun husi Ministru Petróleu no Rekursu Minerais, Francisco Monteiro, Ministru Transportes no Komunikasoins, Miguel Manetelu, no Ministru Komérsiu no Indústria, Filipus Nino Pereira. Marka prezensa mós Vise-Prezidente Ezekutivu husi empreza australiana Santos Energy, Vince Santostefano.
Iha vizita ofisiál ne’e nia rohan, Vise-Primeiru-Ministru, Francisco Kalbuadi Lay, akompaña Ministru Tengku Zafrul Abdul Aziz no nia delegasaun ba Aeroportu Internasionál Prezidente Nicolau Lobato. Governu husi parte rua hatudu satisfasaun ba avansu sira ne’ebé alkansa ona no reafirma kompromisu hodi kontinua hametin kooperasaun bilaterál iha áreas-xave ba dezenvolvimentu sustentavel Timor-Leste nian.
