Racom Maubisse, 03/07/2024, Objektivu husi enkontru regular ne’ebe organiza husi FONGTIL mak , atu buka hatene problema sira iha municipiu  liga ho situasaun atual iha municipiu 13 no RAEOA, hadia apoiu ba implementasaun atividades Sociedade Sivil nian, inklui koordenasaun no dialogo ne’ebe diak liu ho governu, promove participasaun ativa husi sociedade sivil atu kombate problema sira iha area rural ho forma ne’ebe sustentavel, promove envolvimentu ativu husi sociedade sivil hodi diskuti no analize problema sira iha municipiu.

Relasiona ho assuntu sira mak mensiona iha ne’e, ba radio komunidade maubisse mauloko,

Director Ezekutivo FONGTIL Valentim da Costa Pinto rekonhece katak;

“Los duni katak iha semana ida nee Sekretariadu FONGTIL sei halo vizita kortezia ida ba Munisipiu Aileu Ainaro no Covalima hodi bele kria  enkontru regular ho membru no ita nia Autoridade sira iha nivel postu no munisipiu hodi bele deskuti situasaun atual sira hodi bele rona input ka rekomendasaun sira  neebe mak ami nia membru sira iha nomos bele husi Autoridade”. Esplika Director FONGTIL.  

Entertantu Director Ezecutivo ne’e haktuir liu tan katak;

“Enkontru sira nee hanesan meus ida atu promove hodi hametin ita nia serbisu parseria Entre Sosiedade Sivil no Governo, hodi hare konba planu dezenvolvimento ne’ebe ke lao iha Territoriu Timor laran tomak, enkontru nee hanesan meus ida atu ami koko rekorda atu fo notas sira ne’ebe mak Munisipiu ida-idak iha, para hodi fasilita servisu advokasia, tamba iha tinan klaran ida nee hahu deskuti planu prioridade sira ne’ebe sei bele ajusta iha Planu Orsamento Jeral  2025 nian, ida nee hanesan tempu diak ida ba ami hodi haforsa diak liu tan ho deskobrementu ne’ebe mak ami iha bele passa ka enkaminha ba iha ministeriu relevante para hetan konsiderasaun iha planu anu fiscal tinan oin nian”. Hatutan Valentim Pinto.

Lideransa maksimu Forum ONG Timor Leste ne’e akresenta liu tan katak;

“Serbisu iha terrenu ita iha duni preokupasaun, maibe em jeral partisipasaun lao diak los liliu iha Munispsiu  Ainaro, tamba reprejentante mai husi prezidente autoridade  munisipiu ainaro liu husi  Secretariu assuntu sosiais e organizasaun sosiedade sivil neebe mos marka prezensa hodi bele kompleta no justifika diak liu tan oinsa mak bele buka dalan hamutuk konaba problema sosiais ne’ebe akontese iha  komunidade em relasaun ho Estrada, saude, agrikultura, edukasaun, assunto sira ne’ebe kontinua iha obstaklu presisa tenki hare nomos rona husi parte hot-hotu  para ita bele ajuda ita nia governo hodi halo formulasaun ba planu prioriedade para bele reflete duni komunidade  nia hakarak”.

Director Ezecutiva Fongtil ne’e sublinha liutan katak;

“Tanba ho ida nee deit mak ita bele halo neneik sei bele lori mudansa ba  ita nia sosiedade liuliu ba iha area remotas sira ne’ebe mak iha tempu udan komunidade sira asesu ba merkadu no estudante sira asesu ba escolar I liu liu inan isisn rua sira partus karik susar tamba kondisaun Estrada sira ne’ebe seidauk hadia, tamba ne’e mak ami hanoin kuandu Estrada laiha bele difikulta sira nia movimentu ho vizita fasilidade publiku susar los, liuliu ba ita nia atendimentu saude ne’ebe mak iha tempu urjente ruma susar atu hetan atendimentu lalais, ida nee mak ita koalia maibe ami nafatin hare, liu-liu konaba aspetu infraestrutura bazika, ne’e tenki sai prioriedade, saude, edukasaun, agrikultura buat ruma neebe mak ami konsidera se ita dezenvolve ida nee ho diak ho osan neebe naton  maka neneik sei lori dezenvolvimentu ba iha sosiedade”. Hakotu Director Ezecutivo Fongtil.

Iha Fatin Hanesan Reprezentante Presidente Autoridade Municipial Ainaro, Sekretariu Assunto Sosiaias e Organizasaun, Agostinho Doutel Sarmento hateten mos katak;

“Ha’u nia parte agradese ba FONGTIL Ho Radio Komunidade Maubisse bele organiza enkontru nee hodi konvida ha’u ata bele mai partesipa mos iha enkontru nee, hodi konvida ami mai hatoo  programa no problema  liu-liu liga  konaba edukasaun, saude, agrikultura, infraestrutura bazika sira para ita bele fo hanoin ba ita nia komunidade sira komprende, nunee sira bele apoiu programa sira bainhira implemeta iha terrenu, tanba buat sira nee hotu  ba ita nia komunidade nia moris diak ba future”. Hateten Sekretariu Assunto Sosiaias e Organizasaun, Agostinho Doutel Sarmento.

Sekretariu Assunto Sosiaias e Organizasaun, ne’e haktuir liu tan katak;

“Ba rekomendasaun sira husi FONGTIL, planu ita iha ona no ita enkaminha ona ba iha komite revisaun orsamentu, iha ne’eba bainhira mak halo diskusaun orsamentu maka   ita nia planu ka programa diskusaun liu, espera katak 2025 ita bele halao programa sira nee liu-liu ita nia komunidade sira iha baze”.

“Hanesan Sekretariu Assuntu Sosiais i Organizasaun, atu rekomenda ba FONGTIL nafatin  kria enkontru sira hanesan ne’e inportante, para ita bele fo hanoin ba malu saida mak sosiedade sivil sira hare iha terrenu, problema saida mak komunidade hasoru iha baze hanesan Edukasaun, Saude, Agrikultura,  ifraestrutura Bazika, Eletrisidade, sira nee hotu preokupasaun ita hotu nian, entaun ami mesak labele halo buat ida, ho Sosiedade Sivil  nia Monitorizasaun no fiskalizasaun tun ba iha terrenu hare problema saida mak  komunidade infrenta, entaun bainhira ita enkontru hanesan nee bele fo hanoin ba malu para ita bele tau iha planu hodi dezemvolve iha future”. EnkorajaSekretariu Assunto Sosiaias e Organizasaun,

Objektivu husi enkontru regular ne’ebe organiza husi FONGTIL mak , atu buka hatene problema sira iha municipiu  liga ho situasaun atual iha municipiu 13 no RAEOA, hadia apoiu ba implementasaun atividades Sociedade Sivil nian, inklui koordenasaun no dialogo ne’ebe diak liu ho governu, promove participasaun ativa husi sociedade sivil atu kombate problema sira iha area rural ho forma ne’ebe sustentavel, promove envolvimentu ativu husi sociedade sivil hodi diskuti no analize problema sira iha municipiu.

Reportajem Ekipa Racom Maubisse