Racom Maubisse (13/01/2024) Vise Ministru Komérsiu no Indústria Augusto Júnior Trindade, reprezenta Vise Primeiru Ministru, Ministru Koordenador Assuntu Sosiais, no Ministru Dezenvolvimentu Rural no Abitasaun Komunitária Mariano Assanami Sabino hateten ida ne’e wainhira hala’o dialogu ho komunidade, no sosiedade sivil sira iha suku Caemauc postu admistrativu Turiscai Munisipiu Manufahi, sabadu foin dadaun ne’e.
Alem de objetivu husi dialogu ne’e atu rona difikuldade sira ne’ebé mak durante komunidade sira infrenta, liliu suku sanulu resin ida ne’ebé pertense postu Turiscai.
“Papel Sosiedade Sivíl husi Komunidade importante tebes,para ita bele lao hamutuk imparsereia ita hatene katak Governu sei la lao mesak-mesak maibe Sosiedade Sivíl iha papel ida importante tebes oinsa atu rona, mai hare ho matan para hodi partilla hodi hateten. Ne’e maka Sosiedade Sivíl ita bót sira nia Papel ne’e importante tebes,” Tenik Vise Ministru Komérsiu no Indústria Augusto Júnior Trindade 13/01/2024.
“Atu hateten ba ita bót sira hare situasaun, haré realidade ne’ebé akontese mai ho faktus hanesan problema Estrada, Eletrisidade, Be mos, Produtu Lokal, Edukasaun, Saúde. Tinan 20 resin ona ita nia problema sira ne’e seidauk hotu, entaun bele hateten katak Diálogu ida ne’e importante para atu rejista no rona prokupasaun Komunidade sira saida los maka ita bót sira sneti no saida los maka ita senti katak la lao.” Governante ne’e hateten.
Entretantu Programa dialogu ne’e organiza husi Forum ONG Timor Leste (FONGTIL) servisu hamutuk ho Servisu de Apoio Sociedade Civil e Auditoria Social (SASCAS), tema ba dialogu ne’e mak “Hamutuk ita Asegura Partisipasaun Ativu Sidadaun Hotu iha Dezenvolvimentu Nasionál Ne’ebé Reziliente no Inkluzivu”.
Husi diálogu ida ne’e, partisipante sira foti asuntu importante sira kona-ba mekanizmu sira ne’ebé presiza atensaun husi Governu atu nune’e bele mellora atendimentu públiku nian kona-ba bee no saneamentu, edukasaun, saúde, eletrisidade no infraestrutura bazika sira ba ema hotu.
Vise Ministru Komérsiu no Indústria, Augusto Júnior Trindade, reprezenta Vise Primeiru Ministru, Ministru Koordenador Assuntu Sosiais, no Ministru Dezenvolvimentu Rural no Habitasaun Komunitária, nafatin iha nia intervensaun ho komunidade sira hatete, IX Governu Konstitusional nia programa ho orasamentu aprova no promulga ona husi prezidente Repúblika ho nune’e inisiu tinan ne’e hanesan pontu de aranka ba dezenvolvimentu ne’ebé povu hein hela.
“IX Governu Konstitusional iha ona programa ne’ebé aprovadu ho unanimidade iha Parlamentu Nasionál no orasamentu ne’ebé mós promulga ona tamba ne’e Governu iha komitmentu sei rezolve problema sosial sira ne’ebé komunidade sira infrenta”, hatete V-MKI.
Iha dialogu ida ne’e mós Sosiedade Sivíl sira hato’o sira-nia rekomendasaun baibain sira hetan liu husi deskobrimentu ne’ebé mak iha aprezentasaun ba kada liña Ministériu no iha oportunidade hato’o diretamente ba reprezentnate VPM-MKAS.
Entertantu diálogu ida ne’e hetan partisipasaun direta husi Vise Ministru Asuntu Parlamentar Adérito Hugo, Vise Ministru Komérsiu no Indústria no Representante VPM MKAS, S. E. Sr. Augusto Júnior Trindade, Adjunta PDHJ, reprejentante Komandu Jeral PNTL, membru Sosiedade Sivíl sira husi Munisipiu 13, reprezentante husi membru Governu, no konvidadu sira seluk.
Jornalista Moises Magno
Editór Joaquim Coutinho
