Racom Maubisse (12/01/2024) Administrador Sesante Claudino Mendoça Husu Deskulpa Ba Povu Maubisse Ba Atendementu Durante Nia Mandatu Tinan 2 Lidera Administrasaun Postu Maubisse.

Claudino Mendonça hateten ida ne’e ba Jornalista Rádiu Komunidade Maubisse Mau-Loko (RKMM) liu husi entrevista hafoin entrega Servisu  ba Administrador Postu Foun Joaquim Salsinha Soares Sexta ne’e iha Edefisiu Administrasaun Postu Administrativu Maubisse.

“Liu husi biban ida ne’e hau hakarak ható ba Xefe Suku Nain 9, Xefe Aldeia 62, Instituisaun Governu ne’ebé situada iha Postu Administrativu Maubisse, Amu Pároco Maubisse katak durante hau nia mandatu hahú husi 25 de Janeiru 2022 ohin dia 12 de Janeiru 2024  kompleta tinan rua mais hela semana ida resin para kompleta tinan 2. Tamba ne’e karik durante ita nia servisu hamutuk hanesan ita la konek ba malu liu husi hau nia karakter ka atetudi sira la diak ba ita bót sira núdar ema la ses husi sala no aproveita opurtunidade ida ne’e hau ható deskulpa”, Dehan Administrador Sesante Claudino Mendonça 12/01/2024.

“Mai ita hamutuk nafatin ho Administrador Postu Administrativu Maubisse foun Sr. Joaquim ita hamutuk hametin no haburas  unidade lori Maubisse ba oin liu husi prosesu Dezemvolvementu. Dala ida tan obrigadu no agradese ba imi hotu nia kontribuisaun durante tinan rua ita servisu hamutuk,” Tenik Claudino.

Fatin hanesan Administrador Foun Postu Administrativu Maubisse Joaquim Salsinha Soares hateten, nia pronto servisu hamutuk Administrador Sesante halori Povu Maubisse partisipa iha Prosesu Dezemvolvementu.

“Husi Ministériu Administrasaun Estatal (MAE) depozita konfiansa ne’e mai hau premeiru hau senti preveleziu ida ba hau, Sigundu hau senti hanesan todan ida mós ba hau  tamba ne’e maka ohin entrega ona servisu maibe nafatin koko atu kopera nafatin hamutuk ho Administrador Sesante, oinsa maka atu bele lori povu ida Maubisse ne’e atu partisipa iha Dezemvolvementu. Hau pronto nafatin kria amijade entre Liñas Ministériais ne’ebé maka ejisti iha Postu Administrativu Maubisse oinsa maka bele lori povu no rai ida ne’e ba futuru ida ne’ebé maka tuir Heroi sira husik hela ba ita,” Hateten Xefe do Postu Foun.

Entertantu Administrador Postu Foun simu Posse husi Governu Liu husi Ministru Administrasaun Estatal (MAE)  Tomás do Rosário Cabral loron 11 fulan Janeiru ne’e, no loron 12 foin lalais ne’e simu ona servisu husi Administrador Sesante Claudino Mendonça.

Jornalista                     Moises Magno

Editór                          Joaquim Coutinho