Racom Maubisse (11/01/2024) Prezidente Autoridade Munisípiu (PAM) Ainaro Georgina Carmo Bucar Corte-Real  hateten ida ne’e liu husi nia diskrsu hafoin simu Posse husi Governu Konstitusional ba dala sia liu husi Ministru Administrasaun Estatal (MAE) Tomás do Rosário Cabral Kinta ne’e iha Salaun Enkontru Administrasaun Munisípiu Ainaro.

“Mai ita haburas servisu ekipa rona malu ho sentidu responsabilidade katak Ainaro ita hotu nian, ita tenki aproveita ambiente Demokrásia hodi kolia ba malu hanesan Ainaro Oan hodi hametin Paz no Estabilidade hodi fó mós biban ba ema hotu bele partisipa ho proativu iha prosesu Dezemvolvementu  nian, ita tenki iha vontade hodi transforma Ainaro sai sentru atividade sosial sira hotu iha area turizmu, kultural, desportu, inklui mós aktividades Públiku no Privadu. Ita tenki haburas hakmatek no harmonia sosial  atu Ainaro bele lao ba oin,” Diskursu Prezidente Autoridade Munisípiu Ainaro.

Georgina Carmo Bucar Corte-Real kuntinua konvida nafatin Ainaro Oan hotu atu partisipa no fo kontribuisaun proativamente ba Dezemvolvementu Rai Ainaro nian.

Antes atu termina Prezidente Autoridade Foun Munisípiu Ainaro ne’e husu forsa no kbít  Natureza  Lulik no Lisan Rai Ainaro nain atu fó forsa nafatin hodi servi ba Povu no Rai Doben Orluli Ainaro.

“Molok remata hau harohan ba Nain Feto Ramelau Haraik Bensaun no Grasa, Fatuk no Rai, Uma no Ahi, Bei Ala Avon Aman no Maun Alin sira hotu, husi Mutin no Metan, An Hine Pat An Mane Pat, ho Lisan sira hotu ne’ebé halulik Rai Ainaro,  Komunidade Ainaro atu tula liman mai hau fó forsa ho badinas haraik matak malirin atu hau bele halao hau knár hodi servisu servi ba Rai Suru Ainaro. No bele kumpri ho diak konfiansa Polítiku ne’ebé atribui ona mai hau”. Remata.

Jornalista                     Moises Magno

Editór                          Joaquim Coutinho