Racom Maubisse (25/12/2023) Ida ne’e maka mensajen ba loron Natál nian ne’ebé tatoli husi Amu Pároko Paroquia Nossa Senhora da Grasa Hato-Builiku Pe. Francisco Soares Fernandes liu husi entrevista ho Jornalista Rádiu Komunidade Maubisse Mau-Loko (RKMM) hafoin de Selbrasaun Missa ba Loron Natál  Segunda ne’e loron 25/12/2023 iha Kapela São Cristovão Maulahulo Suku Mulo Postu Administrativu Hato-Builiku Munisípiu Ainaro.

“Hau nia mensajen Natál ninia no Tinan Foun nian ba ita maka ida ne’e, Jesus mai lori damen, lori domin, lori ksolok, lori naroman ba ita. Entaun dame ho domin ida ne’e bele moris no buras iha Mundu ida ne’e wainhira ita kolabora, ita partisipa, ita kontribui se lae maka damen no domin ne’ebé Jesus lori mai ne’e liu let deit folin laiha. Nia folin iha wainhira ita komunga lia fuan ne’e iha ita nia moris no tau iha ita nia prátika moris lor-loron ninian, hodi buka hadomi malu, hadame malu no buka moris iha Justisa no iha lia los nia laran.” Tenik Amu Pároko 25/12/2023.

Nai Lulik ne’e kuntinua haklaken liu tan katak;

“Ida ne’e maka halo Jesus moris duni iha ita nia moris selebrasaun Natál  selebrasaun Tinan Foun ne’e folin ba ita. Selae ida ne’e la folin no liu let deit, ita hanesan mehi deit depois hakfodak mai laiha ona. Tamba ne’e ita hakarak Natál ida ne’ebé kongretu iha ita nia moris lor-loron ne’e duni ohin ita selebra Natál laos hotu ona iha ohin loron dia 25 maibe Natál lor-loron iha ita moris atu núne’e ita bele sai naroman ida ba ema seluk. Purque ita simu Roman husi Jesus Kristu ita sai Romam no lori Roman ida ne’e ba ita nia maluk sira ne’ebé moris hela iha Nakukun nia laran. Hanesan ita hatene katak Nakukun maka saida, Nakukun maka problema bar-barak ne’ebé ita hasoru, Nakukun maka odiu malu la la hotu, Nakukun maka laran moras malu la hotu, Nakukun maka halo at malu, estraga malu, entaun ita presija hasai tia buat hirak ne’e husi ita nia-an para ita bele hetan Grasa moris Rohan Laek ninian iha momentu ruma ita husik hela Mundu ida ne’e.” Hakotu Bibiatan ba Sarani Paroquia Nossa Senhora da Grasa Hato-Builiku iha Kapela Maulahulo.

Jornalista                     Moises Magno

Editór                          Joaquim Coutinho