Missa Loron Natál Amu Pároko Hato-Builiku Husu Sarani Manumera No Maulahulo Simu Malu No Hadame Malu, Hanesan Maun Ho Alin

0
8 views

Racom Maubisse (25/12/2023) Missa Natal  Amu Pároko Paroquia Nossa Senhora da Grasa  Hato-Builiku  Padre Francisco Soares Fernandes Husu Sarani Manumera No Maulahulo Simu Malu No Hadame Malu.

Bibiatan ba Sarani Paroquia Nossa Senhora da Grasa Hato-Builiku Munisípiu Ainaro husu ida ne’e liu husi nia Homelia iha Selebrasaun Missa Natál Segunda Loron 25 Fulan Dezembru ne’e iha Kepela São Cristovão Aldeia Maulahulo Suku Mulo Postu Administrativu Hato-Builiku. Tamba tuir Nai Lulik ne’e katak, ho Prezensa Kosok-Oan Nai Jesus Kristu ne’ebé moris hanesan ema folin laek maibe Nia nafatin bolu ita atu moris iha damen no ksolok nia laran, enkuantu  husi Sorin Seluk Nai Lulik ne’e senti Tristi  tatoli mensajen   dame ba Sarani Manumera no Maulahulo ligadu ho problema desentendementu entre Joven husi Aldeia rua iha loron Finadu liu ba, mai tó oras ne’e seidauk iha solusaun husi parte rua.

“Maluk Sarani Doben sira oinsa maka ita hatene agradese ba Maromak ba Grasa ne’ebé Maromak fó ba ita. Liu husi Nia fó Nia Oan Mane Mesak mai ita, moris kiak moris simples iha bibi luhan ida, moris hanesan ema folin laek maibe nia bolu ita atu moris iha dame laran, moris iha ksolok nia laran, moris iha unidade nia laran. Hau kolia kona-ba ksolok, kolia kona-ba dame, kolia kona-ba unidade iha Manumera Maulahulo ne’e  hau senti tristi tamba situasaun iha Finadu nian ne’e halo hau tó agora sei laran moras hela.” Haktuir Padre Francisco Soares Fernandes Liu husi Nia Homeli ba Sarani Manumera no Maulahulo Suku Mulo Munisípiu Ainaro 25/12/2023.

Amu selebrante ne’e kutinua hateten sei ema idak-idak sei moris iha laran moras no odiu nia laran oinsa maka bele selebra Natál ho diak. Basa selebra Natál la hatudu deit iha Ropa foun ne’ebé ita hatais maibe preseija tebes asaun ne’ebé kongreta no tau iha prátika moris lor-lorn nian.

“Ita iha hela laran mors nia laran, laran kanek nia laran, odiu malu nia laran oinsá maka ita bele selebra Natál ho diak. Laos ita hatais foun deit, laos ita hamnasa ba malu deit hanesan ne’e, maibe ita tenki tau iha prátika moris unidade lolós ninian Fila fali ba dame malu. Se ita moris nafatin iha des uniaun nia laran, lao idak-idak ninian kuitadu tó bainhira maka ita bele hamutuk tamba ne’e husu imi Manumera no Maulahulo tenki hatudu ida ne’e ba hau, se hanesan ne’e nafatin senti katak hau nia Missa ba imi ne’e folin laiha, hau nia Homilia sira durante hau kolia ba imi ne’e folin laiha. Hanesan Jesus ba Moris iha Belem ne’e ema taka hela odamatan Nia ba Moris fali iha bibi luhan, anta hau labele Missa iha Kapela ida ne’e, Kapela ida Airame ka Manumera ne’ebá diak liu ne’e hau ba Missa iha Ai-Laran ne’ebá tamba Karau sira Bibi sira Ai-Laran ne’e bele rona duke ita bót sira rasik ”. Husu Nai Lulik ne’e.

Tamba ne’e atu realiza asaun dame husi parte rua Amu Pároko Paroquia Nossa Senhora da Grasa Hato-Builiku hein resposta husi Sarani Aldeia rua Autoridade Komunitaria husi parte rua núne’e bele simu Prezensa Nai Jesus Kristu iha loron Natál no Simu tinan foun 2024 ho haksolok laiha rai odiu no vingasa ba malun.

“Entaun imi tenki fó resposta ba hau ida ne’e hodi hatudu katak, Natál moris duni iha Maulahulo ho Manumera ne’e  ida ne’e maka ita foin senti katak Natál lolós. Ita nia Natál la hanesan ho ema seluk nia Natál, Natál ne’e tenki lori sentidu ida dehan dame nakonu, domin  nakonu, moris iha hakmatek nia laran  ne’e ita trnki koko iha ita nia familia nia laran, bairu laran, Aldeia laran, Kapela,  koko iha ita nia estasaun, no koko iha ita nia Paroquia”. Remata.

Alem de ida ne’e liu husi Selebrasaun Missa ne’e  reprejentante husi parte rua hadame malu kaer liman no hakuak malu iha Nai Nia Altár Santo, akompaña husi Autoridade Komunitaria no hetan Bensaun husi Amu selebrante. No Repjentante husi Parte rua Promente sei realija Asaun dame no simu malu iha tempu besik antes hakat ba tinan foun 2024.

Jornalista                     Moises Magno

Editór                          Joaquim Coutinho

0 0 votes
Article Rating
Subscribe
Notify of
guest
0 Comments
Inline Feedbacks
View all comments