Racom Maubisse, 13/12/2023, Iha biban ida ne’e mos hakarak fo sai ba komunidade Suco Aituto katak ita nia planu ba oras ne’e dadun mak liga liu ba formasaun liu-liu iha tempu adventu oriente joven sira halo prejepio hodi festeza festa natal ho tinan foun 2024.
Iha biban ida ne’e mos hakarak hato’o ba komunidade Suco Aituto katak, Sai lider la fasil, ita presija sakrefika ita nia aan, iha tempu naruk para depois ita konsuta malu oinsa mak bele iha planu ne’ebe diak ba suco no aldeia sira tuir kna’ar no responsabilidade ne’ebe mak povu fo fiar ba ita liu husi eleisaun lideranca komunitariu.
Hau mesak la bele imi mesak mos sei labele maibe mai ita hamutuk kahe kabas ba malun no lolo liman hamutuk hateke ba oin hodi bele hadia ita nia moris no ita nia rain liu husi dezemvolvimentu direta no indereta.
Nune’e mos sai lideransa sempre iha dezafius tamba ne’e;
“Ba ha’u dezafiu ne’ebe ha’u hasoru mai ho kandidatu ida ne’ebe uniku, laos husi grupu, laos husi partidu politiku, maibe kandidatu indepedente ho prinsipiu atu servi povu doben Sucu Aitutu ho nia aldeia 9 (Sia).
Tamba ne’e ho obstakulu sira ne’e hotu la dezanima ha’u nia vontade e ha’u nafatin iha vontade hodi halo kampaniha ho komunidade hahu husi area remotas, Aldeia mai to Sucu ho komitmentu ne’ebe diak hodi servi ha’u komunidade sira.
Wainhira dia 28 de Novembru ha’u simu posse ha’u konsiente katak simu kna’ar foun ida, kna’ar responsablidade bo’ot atu servi povu Sucu Aitutu, no la hare ba kór no la hare ba grupu, maibe mai ho prinsipiu ida ho fuan atu lori desemvolvimentu ida ne’ebe ba futuru ida ne’ebe sei diak maske neneik maibe sei bebeik.
Iha vizaun ha’u hakarak hari Sucu ida ne’ebe inklusivu, partisipativu, sustentabel, hodi rona ema hotu nia opiniaun nune’e kontribui ba desemvolvimentu suco Aituto nomos halo kooperasaun ho autoridade Posto maubisse no Municipiu Ainaro oinsa bele hadia povu nia moris no lori dezemvolvimentu mai suco Aituto.
Hanesan jerasaun foun, ho vijaun foun sei rona, aprende no simu kritikas no sugestaun sira hotu, ida ne’e hanesan bukae ida perante hau nia lideransa no hau nia mandate hanesan chefe do suco Aituto ba tinan hitu nia laran.
Jornalista : Joanina da Lus
Editor : Joaquim Coutinho
