Pe. João Soares: Autoridade Maka Fitun Ba Povu, Basa Liu Husi Fitun Hatudu Dala Ba Liurai Nain 3 Ba Hasoru Liurai Lalehan No Rai Nian Iha Balada Han Fatin

0
15 views

Racom Maubisse (01/12/2023) Universalemte Natal Selebra no Festeja iha Mundu Tomak. Ba ema ne’ebé deit, liu-liu ba Kristaun sira. Atu tama iha tempu  Natal nian, Kulturalmente harí Prezepiu ho Dekorasaun oi-oin. Siknifikadu husi ida ne’e hatudu katak prepara ona nuansa  Isperítual hodi Simu Maksoi. Ema  barak prokupa teb-tebes hodi dehan, saida maka hau atu selebra iha tempu Natal nian, no Ropa saida maka hau sei hatais ba Missa Natal nian.

Natal mós nuúdar solenidade ida ne’ebé importante tebetebes ba komunidade kristaun tamba iha loron ne’e maka selebra Jesus Cristo nia moris, hodi selebra Missa Natal.

Konsidera katak Natal nuudar festa família, be tuir tradisaun konsagra hanesan loron ne’ebé membru família sira hotu halibur-malu.

Husu Oinsa ho Preparasaun sira atu hakat ba selebrasaun Loron Natal ba Tinan ida ne’e ne’ebé konta deit ona loron ita atu hakat ba. Tamba ne’e iha Loron 22 Fulan Novembru 2023, Ekipa Jornalista Rádiu Komunidade Maubisse Mau-Loko (RKMM) hakat-an ba Rezidensia Amu Pároko Maubisse Pe. João Soares, hodi husu kona-ba sá preparasaun maka sei halo hodi hametin liu tan fiar Sarani nian iha vida Ispiritual relasiona ho Selebrasaun Loron Natal, no husu Mensajen Nai Lulik nia ba Sarani Paroquia Imaculado Coraçao de Maria Maubisse (PICOMA)

 “Natal ne’e ita nia Tradisaun Religioza ita bele dehan ita nia Natal ne’e ita selebra loron  espesial ida ba Kristaun tomak, hakarak ható ita nia Ksolok, ita nia bemvindu, ita nia alegria, ba Nai Maromak Ninia Oan ne’ebé halo-an ba ema mai moris iha Mundu mai moris hensan ema kiak. Ida ne’e hakarak konvida ita hotu atu ba selebra loron ida ne’e hanesan loron ida ne’ebé revitaliza ita ema Sarani ninia moris liu-liu iha parte Ispiritual ninian. Jeusu Nia moris ne’e mai hatudu, konvida no husik hela mai ita konvite, bolu hela mós ita nia atensaun, e bolu mós ita atu halo ita ninia aprosimasaun ba Nai Maromak liu husi Jesus hanesan meu úniku atu kontempla ita nia konvivensia hamutuk ho nia”. Hateten Amu Pároko Maubisse 22/11/2023.

Husu kona-ba Preparasaun sira Bibiatan ba Sarani Paroquia Maubisse ne’e hatan katak;

“Primeiru hanesan foin dadaun ita liu Elisaun Xefe Suku, molok ba Elisaun Xefe Suku ne’e Komunidade tomak prepara haré entre ita nia matenek nain sira iha ita nia Aldeia ita nia Suku. Ita presija prepara ita ninia-an hatudu ita nia preparasaun liu husi ita ninia votus no ikus mai Suk sira iha Maubisse bele hetan ona Xefe Suku Sira. Ba Natal mós hanesan ita presija ita nia preparasaun liu husi Retiru sira, ita nia Sakaramentu Konfesa, Rekonsiliasaun no lori ita ba konversaun hodi bele ba simu duni ita nia Nai Ulun ida ne’ebé mai moris iha Natal. Núne’e iha Paroquia hau iha ona hanoin atu kopera ho Konsellu Paroquial, ho Madre sira, Legu hirak ne’ebé maka ativu hodi bele halo preparasaun hamutuk ba Retiru sira. Sei iha Retiru ba Ukun Nain sira  hahú husi Xefe Aldeia ba tó  Administrador Postu, kompostu mós husi Komandante PNTL, Grupu Kategoriais sira. No hau Kontaktu ona ba Padre sira, Madre sira mai para tulun ita iha preparasaun ida ne’e. Ba Retiru no mós Konfesa liu-liu atu bolu fila fali Sarani sira nia atensaun ba iha parte preparasaun Ispiritual ninia hodi bele intensifika liu tan, tamba dala barak ita prekupa ita nia servisu sira maibe ita haluhan ita nia vida Ispiritual, ita nia Orasaun Familia, Orasaun Pesoal, Orasaun Komunidade, Partisipasaun iha Uma Kreda, buat hirak ne’e hotu durante tinan tomak nia laran ne’e ita sei hamutuk iha Retiru ne’e bolu fila fali atu ita bele reflete hamutuk”. Tenik Nai Lulik ne’e, hodi dehan mós katak;

“Buat ne’ebé hakarak atu hatete maka ida ne’e konvida nafatin Sarani sira hotu tamba selebra Natal ne’e laos Natal ba Padre, laos Natal ba Madre, laos Natal ba Katekista, laos Natal ba Dewan. Sarani sira hotu sira iha direitu, sira iha Obrigasaun atu partisipa ativu iha iha selebrasaun Natal ne’e. Entaun atu ba tó iha ne’ebá maka ida ne’e, konvida Sarani sira hotu atu sintiniza nafatin ativamente ba programa Paroquia nian”. Husu Amu Pároko ba Sarani sira liu husi Intervista ho Jornalisra RKMM.

Antes atu termina ba Sarani no sidadaun Postu Administrativu Maubisse Munisípiu Ainaro, liu husi mensajen Nai Lulik ne’e hateten, husu ema ida-idak tenki sai fitun ba ema seluk, iha Sosiadade, Familia, liu-liu ba Autoridade sira ne’ebé uku Povu no rai ida ne’e atu sai hanesan fitun no roman diak ba Povu kiak no mukit sira. Tamba liu husi fitun lori Liurai Nain tolu ba Hasoru Liurai Lalehan no Rai nian iha Balada nia han fatin.

“Mensajen ne’ebé hau hakarak hatete maka ne’e, Jesus moris iha Belem ne’e Liurai Nain 3 bainhira atu ba sira lahatene oinsa atu ba. Entaun iha dalan klaran ne’ebé sira atu ba sira hare fitun, fitun maka lori sira ba hasoru malu ho Liurai ne’ebé moris. Entaun ba Sarani ida-idak buka atu sai fitun, Joven bele sai fitun ba kolega sira, Kabenain sira bele sai fitun atu lori malu ba hasoru Jusus, no lori malu ba hasoru Maromak. Tamba Liurai Nain 3 bainhira ba buka Jesus iha dalan sira la hatene oinsa atu ba entaun fitun mosu sira tuir deit ona fitun ne’e para bele ba hasoru malu ho Jesus Kristu moris iha Belem. Entaun ba hot-hotu Autoridade sira sei sai fitun ba povu ne’ebé sira ukun, Nai Lulik sira sei sai fitun ba Sarani ne’ebé quia, Profesores sira sei sai fitun ba Estudante sira, Estudante sira sai mós hanesan fitun ba Profesores sira, Oan sira sai mós fitun ba inan aman sira hatudu malu dalan hodi ba hasoru Jesus”.

Husi ne’e ita hotu   konsiente  katak Tinan Foun, núdar loron hodi agradese ba tinan tuan ne’ebé liu ona  no simu Tinan foun ne’ebé atu tó mai daudauk.

 “Liurai Nain 3 depois de ba hasoru tia Jesus wainhira sira fila liu husi dalan seluk, tamba se sira liu fali husi dalan ne’ebé sira liu, ba hasoru Herodes maka Herodes sei mai estraga Jesus entaun sira buka dalan seluk. Ho ida ne’e atu dehan katak ita nia dalan tuan ne’ebé ita liu mai ita pasa ho esperensia lubuk ida ida ne’ebé la diak ita lalikan fila fali, buka dalan foun fali atu renova ita nia dalan, renova ita nia moris ho núne’e deit maka ita bele sai ema foun, la hatudu deit iha Ropa foun ne’ebé ita hatais maibe ita nia transformasaun, ita linguazen, ita nia hanoin, ita nia moris tenki hatudu buat ruma foun hanesan mós Ropa foun ne’ebé ita prokupa iha tempu Natal.” Remata.

Liu husi Mensajen ne’e sai inspirasaun no motivasaun ba ita hotu, no ita nia Nai Ulun Ukun Rai Sira oinsa atu prokupa tau matan no Sai hanesan Fitun diak ba Povu Rai ida ne’e nian, Basa Saida Maka ohin O Kuda Iha Rai Sei Kuda Mós Iha Lalehan, Saida maka Ohin O Kesi Iha Rai Sei Kesi Mós Iha Lalehan.

Jornalista                     Moises Magno

Editór                          Joaquim Coutinho

0 0 votes
Article Rating
Subscribe
Notify of
guest
0 Comments
Inline Feedbacks
View all comments