Racom Maubisse (12/07/2023) Ekipa Konjunta Lideradu husi Administrador Munisípiu Ainaro Leovigíldo Amaral Perira, Kompostu husi Autoridade Protesaun Sivil (APC sigla Portugés), Autoridade Seguransa PNTL, hamutuk ho Parseru Dezemvolvementu Plan Internal, CVTL, CARE Internasional no Mercy Corps. Kuarta feira ne’e oferse apoiu amerjenjia ba familia afeitadu dezastre Naturais Kauja husi udan bót iha inisiu fulan Jullu ne’e iha Suku Mulo Postu Administrativu Hato-Builiku, no Suku Aituto Postu Administrativu Maubisse Munisípiu Ainaro.

Familia afetadu ne’ebé simu dadaun apoiu emrjenjia ne’e iha Suku Mulo nian hamutuk uma kain 27 kompostu husi Aldeia Hautio 10, Manumera 2 no Aldeia Mulo 14. Iha fali Suku Aituto nian, ba familia uma kain hamutuk 14 maka hanesan husi Aldeia Airaka-Lau 12, no Aldeia Betulala 2.

Iha abertura ba distribuisaun ne’ebé halo iha Sede Suku Aituto Postu Administrativu Maubisse, Administrador Munisípiu Ainaro Leovigíldo Amaral Pereira ba familia afetadu sira hateten;

“Apoiu emrjenjia ne’e katak sasan ne’ebé laós atu uja ba tempu naruk, sasan ida ne’e atu fasilita deit ita bót sira loron ida loron rua nian para núne’e valoriza ita nia-an katak Governu ida ne’e tau atensaun másimu mai ita. Para núne’e ita mós tenki kuidadu-an hadók-an husi risku sira ne’ebé iha pur ezemplu hanesan ita hare iha Betulala mai tó ne’e ita nia komunidade balun halo lós uma iha Foho lolon ne’e risku bót ba ita”. Dehan Administrador Munisípiu ba Komunidade afetadu sira iha Suku Aituto Maubisse 12/07/2023.

Autóridade másimu Munisípiu Ainaro ne’e kuntinua fundamenta liu tan katak, depois de ida ekipa sei tun direita no kuntinua foti dadus hodi enkamina ba iha Governu Sentral.

“Hau hanoin ekipa ida sei tun mai atu foti dadus liu-liu husu apoiu ba Xefe Suku ho ninia Xefe Aldeia sira atu apoiu ekipa ne’e wainhira atu foti dadus, se karik balun tó agora Autóridade Suku seidauk tó ba iha sira nia fatin presija ekipa ne’e mai ho ita bót sira atu identifika fatin ne’ebé iha direitu atu hetan apoiu sira ne’e.” Administrador hateten.

Maske dadus provizoriu enkamina ona ba iha Governu sentral maibe sei iha Komunidade afitadu lubuk ida maka sei hein hela ekipa atu ba halo verifikasaun iha sira hela fatin.

“Sei iha apoiu seluk ne’ebé hau horseik kanaliza ona ba iha Nasional liu-liu dadus ida provizoriu maibe ema barak sei hein hela ita atu ba tó sira nia fatin atu foti dadus. Tamba ita hatene katak estragus iha Munisípiu Ainaro kuaje maioria iha Suku sira ne’e hetan estragus liu-liu ba hela fatin, Estrada, Ponte no mós mota ne’ebé sobu sira nia tós no natar sira ne’e tamba ne’e maka ita presija nafatin esforsu-an atu servisu hamutuk wainhira akumula dadus sira ne’e hotu ho núne’e ita kanaliza ba Governu Sentral atu núne’e bele tau netik osan ruma hodi fó apoiu ba Komunidade sira ne’ebé hetan dezastre.” Hakotu Administrador Munisípiu Ainaro Leivigíldo Amaral Pereira.

Fatin hanesan Administrador Postu Administrativu Maubisse Munisípiu Ainaro, Claudino Mendonça ba Komunidade afetadu Suku Aituto nia hameno katak;

“Komesa ohin ba husu ita bót sira labele harí uma iha fatin ne’ebé maka risku ba dezastre. Ne’ebé hau husu ita hotu nia komprensaun diak liu kopera malu Aituto ne’e mesak familia deit tamba ne’e presija fó hanoin ba malu atu labele halo uma fatin resku sira ne’ebé tinan-tinan sempre akontese dezastre.” Hameno Xefe do Postu ne’e.

Liu husi biban ida ne’e lideransa postu ne’e ható ninia agradesementu ba Administrador Munisípiu no Direktores Liñas Ministériais, Inklui Parseiru dezemvolvementu sira nia esforsu hodi apoiu ona komunidade afetadu dezastre iha Postu Administrativu Maubisse Munisípiu Ainaro.

“Ba ajenjia Internasional sira, Plan Internasional, Mercy Corps, Care Internasional, Autóridade husi Munisípal sira hotu iha Munisípiu Ainaro ami agradese. Ida ne’e maka ita nia atendementu ba ita nia Komunidade sira hanesan ema dehan katak ita maka servidor do Estadu, servidor do Povu, no servidor do Governu, ita 24 horas pronto atu servi iha nia realidade maka ita nia povu ne’ebé maka infrenta difikuldade dezastre Naturais maske itoan ka barak imi simu ba ida ne’e  maka kbít husi Governu nian hodi hein fali prosesu sira tuir fali mai.” Tenik Administrador Postu Maubisse Claudino Mendonça.

Familia afetadu ne’ebé simu dadaun apoiu emrjenjia ne’e iha Suku Mulo nian hamutuk uma kain 27 kompostu husi Aldeia Hautio 10, Manumera 2 no Aldeia Mulo 14. Iha fali Suku Aituto nian, ba familia uma kain hamutuk 14 maka hanesan husi Aldeia Airaka-Lau 12, no Aldeia Betulala 2.

Jornalista                     Moises Magno

Editór                          Joaquim Coutinho