APC Ainaro Husu Komunidade Labele Hela Iha Fatin Ne’ebé Risku Ba Dezastre Naturais

0
13 views

Racom Maubisse (12/07/2023) Autoridade Protesaun Sivil (APC sigla Portugés) Munisípiu husu Komunidade labele hela no halo uma iha fatin sira risku ba Dezastre Naturais hanesan Mota Ninin, Rai Lolon,inklui halo uma besik iha Ai-Hun Bot sira. Tamba fatin sira hanesan mesiona dadaun ne’e risku ba vida wainhira akontese Udan, Anin, no Rai Halai.

Komandante Operasionais Autoridade Protesaun Sivil (APC sigla Portugés) Munisípiu Ainaro Afonso da Silva tatoli nia mensajen ne’e wainhira oferese apoiu emerjenjia ba familia afetadu Dezastre Naturais hamutuk uma kain 14 iha Sede Suku Aituto Postu Administratuvu Maubisse Munisípiu Ainaro Kuarta feira ne’e (12/07)

“Núdar Autoridade Protesaun Sivil apela hela ba ita bót sira liu-liu uma kain 14 ne’ebé maka afetadu ba dezastre ida ne’e, tamba ita bót sira hela iha area sira risku ne’e. Premeiru maka ne’e husu labele hela iha Mota Ninin, Ai-Hun, Foho Lolon, Iha Rai Hun ne’e ameasadu bót. Tamba ne’e husu ita hotu ne’ebé hela iha area sira afetadu ne’e ita bót sira favor ida bele hases-an tamba se ita bót sira hela nafatin Natureja ne’e mai la fihir ba ema ida e nia mai lulun dasa.” Hateten Afonso da Silva 12/07/2023.

Lideransa Protesaun Sivil ne’e kuntinua esplika liu tan katak;

“Iha tempu dia 4 de Abril 2021 liu ba iha akontesementu bot ida Suku Maulau Aldeia Tarabula ita nia uma kain ne’e hela iha okos e depois foho ne’e iha Estrada nia leten ba maske foho ne’e ameasadu mais nia mantein hela nafatin iha ne’ebá e kalan akontesementu foho ne’e tun hodi lulun uma kain ne’e hotu kedas. Tamba ne’e Maulau sai hanesan ezemplu ba ita bót sira ne’ebé maka hetan dezastre, tan ne’e ho sasan sira ne’ebé maka agora ita bót sira hetan ne’e han maibe ita bót sira tenki hases-an husi fatin sira hanesan ne’e labele atu mantein nafatin iha ne’ebá”. Tenik Komandante Operasionais Autoridade Protesaun Sivil (APC sigla Portugés) Munisípiu Ainaro Afonso da Silva.

Biban ida ne’e Administrador Munisípiu Ainaro Leovigíldo Amaral Pereira ba familia afetadu sira nia hameno liu tan katak;

“Hau mós hakarak informa ba ita bót sira katak, ita atu goja Ukun-An ida ne’e presija ita hela iha fatin ne’ebé sigiruru. Se wainhira ita hela iha fatin ne’ebé la seguru ita nia vida ne’e risku bot tamba ne’e maka ita presija hadók-an husi fatin ne’ebé risku liu-liu iha Foho Hun, Mota Ninin, no mós besik Fatuk Bot sira ne’e tenki hadók-an tamba kundu udan bot fó ona risku ba ita.” Hameno Administrador ba Komunidade Postu Administrativu Maubisse iha Sede Suku Aituto Kuarta feira ne’e, hafoin distribui aihan emerjenjia ba afetadu Dezastre Naturais foin lalais ne’e husi Suku Mulo Hato-Builiku no Suku Aituto Maubisse.

Familia afetadu ne’ebé simu dadaun apoiu emrjenjia ne’e iha Suku Mulo nian hamutuk uma kain 27 kompostu husi Aldeia Hautio 10, Manumera 2 no Aldeia Mulo 14. Iha fali Suku Aituto nian, ba familia uma kain hamutuk 14

Jornalista                     Moises Magno

Editór                          Joaquim Coutinho

0 0 votes
Article Rating
Subscribe
Notify of
guest
0 Comments
Inline Feedbacks
View all comments