Racom Maubisse (10/06/2023) Asosiasaun Desportu ba Moris Timor-Leste Fasilita Formasaun durante semana ida ba Estudante Eskola sekundariu Katólika Santo Inacio de Loyola Maubisse Munisípiu Ainaro.

Alem de Formasaun ne’ebé maka fasilita husi Ekipa Asosiasaun desportu ba Moris hahú iha segunda no termina iha Sabadu fim de semana ne’e.

Objetivu prinsipal husi aktividade formasaun ida ne’e maka atu fó oportunidade hanesan ba estudante feto no mane hodi halo kompetisaun iha aktividade desportu sira basa feto mós iha direitu hanesan ho mane iha kompetisaun aktividade desportivu sira.

Iha seremonia enseramentu ba katividade formasaun ne’e iha Eskola sekundariu Santo Inacio de Loyola Maubisse, Manorin nain João da Costa Bossa ba Estudante sira hateten, aktividade ida ne’e sai hanesan edukasaun naon formal ne’ebé maka estudante sira aprende ona iha eskola, tamba ne’e nia sujere atu aktividade hanesan ne’e nafatin iha nia kuntinuasaun ba oin tamba liu husi aktividade ida ne’e bele aumenta liu tan estudante sira nia koiñesementu no mentalidade.

“Ida ne’e maka edukasaun naon formal ne’ebé maka ita bót sira aprende durante semana ida, labele para deit iha ne’e tamba imi núdar estudante imi aprende imi mós tenki hanesan ema ne’ebé implementador sai mós hanesan formador ba futuru aban bairua nian. Tamba ne’e maka objetivu husi desportu ba moris ne’e hanesan parte ida bele aumenta imi nia kapasidade, aumenta imi nia mentalidade, sai estudante ne’ebé maka iha mentalidade diak no forti, tamba ne’e buat ne’ebé maka imi aprende ne’e labele para iha ne’e deit maibe tenki iha nia kuntinuasaun”. Dehan Manorin nain Eskola S. Inacio de Loyola Maubisse 10/06/2023.

Fatin hanesan ba Jornalista Radiu Komunidade Maubisse Mau-Loko Kordenador desportu ba Moris Timor-Leste Andi Ornai Monis afirma katak aktividade formasaun hanesan sei fasilita mós ba Eskola Sekundariu sira ne’ebé maka ejisti iha Postu Administrativu Maubisse Munisípiu Ainaro. No ba oras ne’e dadaun estudante husi Eskola Sekundariu S. Inacio de Loyola hamutuk nain 23 maka partisipa ona no Simu Sertifikadu husi Asosiasaun desportu ba moris.

“Kursu desportu ba moris ne’ebé ami fó ba iha Maubisse oan hahú husi Segunda tó mai sabadu ohin halo enseramentu, ne’ebé ita nia aktividade durante semana ida. Depois de sira aprende sira hetan Setifikadu intensivu ninian ba partisipantes hamutuk 23, no ami nia planu sei kuntinua ba Eskola Sekundariu ne’ebé pretense ba Maubisse ninian tamba ami nia hakarak Maubisse oan sira mós tenki iha koiñesementu no abilidade kona-ba desportu ba moris ninian ne’ebé sei iha kuntinuasaun”. Dehan Kordenador desportu ba moris.

Andi Ornai Monis hatutan;

“Ami nia objetivu halao desportu ba moris para atu kontra dez igualidade jeneru, ami lakohi para mane deit maka iha direitu hodi partisipa ba iha edikasaun, desportu no feto laiha direitu ho ida ne’e maka ami hamrík defende sexu maskulinu no femeninu para oinsa sira bele ezerse sira nia direitu hanesan ba iha mundu desportiva”. Nia dehan.

Alem de ida ne’e liu husi aktividade ida ne’e estudante sira aprende mós kona-ba lideransa, planu asaun, no oinsa halo reziklajen ba Lixu sai fali sasan ne’ebé bele utuliza iha aktividade desportu ninian.

“Desportu ba moris ita bele aprende buat lubuk ida, husi teoria no prátika husi teoria maka ita aprende kona-ba lideransa oinsa maka atu sai ema ne’ebé maka iha responsabilidade moral hodi bele halo ita nia servisu ho diak, materia seluk mós kona-ba planu asaun, oinsa atu organiza desportu, oinsa atu halo planu ba desportu, oinsa atu halo promosaun ba desportu, oinsa maka foer sira ne’ebé ita ninia konsumidor sira so’e ona ita bele ba foti ida ne’e produs fali sai bola, sai bulu tangis, par abele organiza ita nia desportu ne’e lao ho susesu”. Hakotu Andi Ornai Monis Kondenador desportu ba Moris Timor-Leste.

Entertantu Aktividade ida ne’e organiza direta husi Asosiasaun desportu ba Moris Timor-Leste.

Jornalista                     Moises Magno

Editór                          Joaquim Coutinho