Racom Maubisse, 30/03/23, Ho Mudansa Klimatika, ligadu ho udan ne’ebe lapara hahu husi fulan janeiro mai to’o fulan Marco 2023, fo afeta ba rai halai no rai monu, liu liu iha fatin sira ne’ebe besik mota ninin no rai lolon sira ne’ebe mak ai horis laiha nomos fatin sira ne’ebe mak komunidade halo tos mud aba mai, sunu rai no tesi ai arbiru.

Relasiona ho rai halai ka rai monu, iha Aldeia Maulai, Suco manetu Komunidade uma kain kuaze sanulu resin nia plantasaun café rai monu lori hotu ba mota.

Ba Jornalista Radio komunidade Maubisse mauloko, Salvador Barreto ne’ebe hanesan sasin ba akontesimentu ne’e haktuir katak;

“Komunidade kuaze uma kain sanulu resin nia palantasaun café mak rai monu taka no be lori ba mota laran hotu, e laos café deit maibe ho mos ai horis seluk hanesan ai kakeu, ai samtuku ho tan ai horis sira seluk”.

Kada tinan sempre akontese desastre naturais iha fatin fatin, liu liu iha fatin sira ne’ebe konsidera rai halai nanis nomos fatin sira ne’ebe mak ema tesi ai no sunu rai arbiru, e mos impaktu husi komunidade sira halo tos mud aba mai, nune’e Salvador Barreto haktuir liu tan katak;

“Entre uma kain sanuluresin ne’ebe mak hetan afetadu husi desastre naturais ne’e, komunidade Adelina Caldeira nia palantasaun café mak hetan estragus liu husi akontesimentu desastre naturaus ne’e”.

Iha akontesimentu ne’e la rejulta ema ruma kanek ka lakon vida inklui mos hela fatin, maibe café hektares rua la konsege salva tamba impaktu husi udan boot ho durasaun tempu naruk, ikus kauza ba dezastre naturais.

Tamba ne’e husu ba komunidade sira atu matan moris neon nain tamba ho udan ne’ebe la para bele fo impaktu ba ita nia hela fatin, aihoris nomos bele fo impaktu ba ita nia vida. Matan moris neon nain kuandu udan makas keta halo viajem tur hakmatek iha uma no hare aihun boot sira besik uma aparu tiha nomos iha kalan udan boot karik labele toba dukur.

Jornalista natalino Mendonca

Editor Joaquim Coutinho