Racom Maubisse (13/01/2023) Kada Tinan Anin ne’ebe bo’ot sempre fo afeta ba komunidade nia hela fatin nomos estraga aihoris nomos aihan sira iha komunidade nia kintal, tamba ne’e relasiona ho anin ne’ebe akontese iha loron 03 fulan Janeiru 2023 tinan nee, maske la rejulta ba ema ruma nia vida, maibe uma Komunidade nian, Produtu lokal iha tós laran hetan estragus total, inklui Edefisiu Públiku sira.
Relasiona ho akontesimentu anin bo’ot iha Suku Liurai Maubisse, Inan Faluk Joana de Araújo nia uma hetan Estragus husi anin, tamba Ai-Hun bót ne’ebe monu, hodi rejulta ba uma nia parede at total, maske ho akontesementu anin bo’ot ne’e rejulta inan Faluk ne’e nia uma, maibe inan faluk no nia bei oan nain 4 la hetan kanek no lakon vida. Ho akontesimentu ne’e, ba Jornalista Radio Komunidade Maubisse Mauloko, inan Faluk Joana haktuir kronolojia aktontesimentu hanesan tuir mai ne’e;
“Momentu ne’e iha dia 3 fulan Janeiru ne’e, iha oras tuku 06 dader, iha momentu ne’e ami sei toba maibe ami rona tarutu ona hau hader mai hare fali, hare ba Ai ne’e latan hela hanesan ne’e ona, no uma ne’e mós rahun hela ona. No ami nain 4 la toba iha ne’e ami toba fali iha klaran” Haktuir Inan Faluk ne’e ba Jornalista Radiu Komunidade Maubisse Mau-Loko loron 13/01/2023 iha Aldeia Erbea Suku Liurai Maubisse.
Nia Kuntinua hatutan liu tan katak, iha momentu ne’e Autoridade Komunitariu Suku Liurai nian tun direita hodi foti dadus no fotografia ba kondisaun uma ne’ebé hetan baku husi Ai-Hun bót ne’ebe monu dadaun ne’e, maibe to’o agora seidauk hetan tulun ruma husi autoridade suco no protesaun sivil husi municipiu.
Inan Faluk Joana de Araujo kontinua haktuir liu tan katak;
“Buat ida desastre ne’e ita la espera, maibe ha’u so hanoin deit mak agora ha’u faluk tan, agora ha’u nia uma anin estraga tiha nune’e ha’u lori tan saida mak atu hadia, tamba ne’e ha’u husu ba estadu sebele ajuda netik material ruma hanesan simentu, kalen, besi nomos raihenek no osan balu nune’e hau bele selu ema hodi hadia fali, tamba hau faluk hela tan ho hau nia bei oan nain tolu ne’ebe sei ki’ik tan, kbi’it la to’o atu bele hadia uma ne’ebe estraga husi anin”.
Ho akontesimentu anin bo’ot ne’ebe rejulta komunidade sira nia uma inklui inana faluk Joana de Araujo nian ne’e Jornalista Radio Komunidade Maubisse konfirma ho Parte Lideransa Komunitariu Suco Liurai nian Antonio da Graca, lideransa komunitariu ne’e haktuir;
“Sim akontesimentu anin sobu uma akontese duni no ami foti ona dadus, maibe seidauk lori ba posto no municipiu tamba ita boot sira rasik mak hare ba katak oras ne’e anin bo’ot hela, depois anin para mak ami lori ba postu nune’e postu enkamina ba municpiu liu liu ba diresaun desastre naturais nian hodi bele hare”. hateten chefe do Suco Liurai Antonio da Graca.
Depois de halao tiha intervista ho chefe do Suco Liura Maubisse, Jornalista Radio Komunidade Maubisse hakat ba municipiu Ainaro halao mos intervista ho Adjunta Administrador Munisípiu Ainaro Rosa Olga Mendonça iha nia knár fatin no tuir Adjunta Administrador Municipiu Ainaro ne’e katak;
“Anin bót iha Fulan dezembro no Janeiro Liu ba konsege estraga populasaun nia uma hamutuk 192, ne’ebe komposto husi suku Ainaro villa 40, Suku Maununo 21, Suku Manutasi 57, Suku Soro 18, Suku Mau-Ulo 26, Suku Cassa 23, Suku Suru Caraic 7 no Suku Maulau Maubisse 3 no Suku seluk iha Postu Hato-Udo dadus seidauk tama, Posto Hato-Builico ho Suku 3 seidauk no Suku 8 iha Maubisse dadus seidauk tama”.
“Durante Anin Bót iha Munisípiu Ainaro rejulta ba Uma Kain lubuk ida maka hetan estragus, ekipa konjuta foti kedas medidas hodi ba foti dadus no fó apoiu emerjenjia ba Komunidade sira ne’ebé maka ne’ebé maka nia uma hetan estragus.Total Uma Kain iha 192 at total iha 6, at naton 70, no at kaman iha 106, inklui mós ho edefisiu Governu maibe ne’e responsabilidade diresaun hotu atu haré ba ida ne’e parte administrasaun ho ekipa konjunta so fó ajuda ba ita nia populasaun nia uma la involve edefisiu Governu”. Ralata Sekretaria Administrador Munisípiu Ainaro ba RKMM iha nia Knár fatin Administrasaun Munisípiu Ainaro 10/01/2023.
Direjente da ruak iha Administrasaun Munisípiu Ainaro ne’e kuntinua relata liu tan ba oras ne’e dadaun ekipa sei kontinua foti hela dadus ba Uma komunidade nian ne’ebe maka hetan estragus husi Anin iha Postu Administrativu Hato-Udo, Hato-Builico, no Postu Administrativu Maubisse.
“Nu entantu agora dadaun sei foti hela dadus, no matreal emerjenjia ne’ebe maka ami fó maka hanesan sanan, terpal, bikan, kanuru, ne’e para atu responde dadauk ba Komunidade sira nia prokupasaun e nafatin ami supmete dadus ba Ministériu relevante atu bele haré mós matreal Konstrusaun nian atu bele renova hikas sira nia hela fatin.” Dehan Rosa Olga.
Tamba ne’e ba Lideransa Komunitariu sira Nia Rekomenda katak;
“Atu rekomenda ba Xefe Suku sira nafatin rekolla dadus mai husi ita nia populasaun ne’ebé afetadu vulneravel sira atu núne’e submete ba Postu administrativu husu Administrador sira atu núne’e inkamina nafatin mai iha Diresaun Protesaun Sivil e Dezastre Naturais atu bele haré apoiu emerjenjia ruma ba ida ne’e, no mós bele relata ba iha Nasional”. Rekomenda Adjunta ba Nai Suku Sira.
Rosa Olga kuntinua husu Liu tan katak;
“Husu ba Komunidade sira hases-an husi Dezastre hotu ne’eb’e maka ita la espera katak sei mai, núne’e karik ami fó ona ajuda ruma ba iha ita bót sira husu atu labele hela nafatin iha fatin ne’eb’e risku buka fali meus atu bele ses husi ne’ebá atu núne’e loron seluk Dezastre mai fali labele afeita ba ita bót sira”. Hameno Rosa Olga Mendonça Aktual Sekretariu Administrador Munisípiu Ainaro ba Komunidade Munisípiu sira.
Tuir Dadus Provizoria Ekipa Dezasstre Naturais Munisípiu Ainaro rejista ona uma Hamutuk Uma 192, No Uma 6 Hetan Estragus Total, relasiona ho akontesimentu anin bo’ot ne’ebe kada tinan sempre akontese, tamba ne’e autoridade sira husu atu komunidade sira matan moris neon nain, se karik anin no udan boot ne’ebe ho durasaun kleur, favor bele ba hela provizoriu ho vijinho sira ne’ebe mak besik nune’e bele salva-an husi desastre ne’ebe ita la espera.
Jornalista Moises da Silva Magno
Editór Joaquim de Fátima Coutinho
