Racom Maubisse (17/11/2022) Permakultura Timor Leste (PERMATIL) Apoiu husi Plan Internasional apoiu no Fasilita Formasaun ba Komunidade Suku Liurai Maubisse, ke kolam hodi konserva Udan ben hodi hamatak no konserva be matan iha rai molik ne’ebe laiha Ai, iha Aldeia 2 iha Suku Liurai Postu Administrativu Maubisse Munisípou Ainaro.

Ba Radiu Komunidade Maubisse Mau-Loko Xefe Suku Liurai António da Grasa de Araújo katak;

“Aktividade ida ne’e husi PLAN hamutuk ho PERMATIL maka halao servisu iha ne’e, sira hakarak ke kolam sira hanesan ne’e iha fatin sira ne’ebé maka uluk ema tesi tia ai hotu. Tamba ne’e ke fali kolam sira ne’e hodi tabun fali udan ben atu bele konserva fila fali udan ben iha fatin sira ne’ebe maka ai tesi hotu ne’e  ikus mai udan ben ne’e tabun iha ne’e bele fó moris fali ba rai okos atu núne’e bele suporta fali be matan sira ne’ebe maka be menus” Dehan Xefe Suku António ba Jornalista RKMM iha Suku Liurai 17/11/2022.

Autoridade Komunitaria ne’e kuntinua afirma liu tan;

“Uluk tempu Portuges nian ne’e be matan ne’e barak lós ne’e tamba iha momentu ne’ebá ai ne’e nakonu hela tamba ema la tesi ai be sai arbiru hela deit, mais ikus mai ema halo tós hotu hodi kuda fehuk ropa entaun ema tesi hotu ai sira ne’e, be matan sira ne’ebé maka uluk be sulin arbiru ne’e be menus hotu. Tamba ida ne’e maka PERMATIL hamutuk ho PLAN atu mai halo servisu ida ne’e atu bele tabun fali udan ben núne’e mós bele kuda fila fali ai sira atu bele fó mahon ba rai atu bele suporta be ba be matan sira ne’ebe be menus. Halao ida ne’e deste 2021 sira ke iha fatin 3, ohin tan sira aumenta tan aumenta tan” Hateten Xefe Suku 17/11/2022.

Alende halao atividade ida ne’e Komunidade sira antes ne’e hatan ona formasaun Husi Organizasaun Premakultura Timor Leste (PERMATIL)   ne’ebe apoiu fundus husi Organizasaun Plan Internasional, hateten Komunide Suku Liurai Domingos da Conçeicão.

“Ami halo ida ne’e tamba Xefe Suku Xefe Aldeia kóedena ho ita nia parseiru PLAN, ita nia tékniku maka PERMATIL haruka no lori ami ba tuir treinamentu iha Dare Dili ne’ebá. Ho treinamentu ne’ebe maka ami hetan maka hanesan ke debu, ke kadalak, atu tabun be ne’e iha Dare ne’ebá, tamba ne’e maka ohin ami mai implementa fila fali iha ne’e” Hateten Domingos 17/11/2022.

Ho servisu ne’ebe maka sira halo dadaun ne’e nia husu ba Parseiru Plan Internasional no Governu atu kuntinua Suporta Nafatin Organizasaun Permakultura Timor Leste (PERMATIL) atu kuntinua implementa programa ida ne’e ba oin hodi kobre area sira ne’ebe maka kobre iha Postu Administrtivu Maubisse Munisípiu Ainaro.

Tuir Rosantino Amaral Estáf husi Organizasaun Permakultura Timor Leste Iha Suku Liurai hateten, aktividade konservasaun be ne’e iha Suku Liurai implementa iha Aldeia rua maka hanean Aldeia Bertai no Aldeia Hohonaru.

“Husi PERMATIL mai iha ne’e oinsa atu fasilita Komunidade sira halo konservasaun ba be ne’ebé maka iha tempu bailoron maran ou menus. Aktividade agora dadaun ne’e ami implementa semana ida iha Suku Liurai ba Aldeia rua maka hanesan Aldeia Bertai no iha Aldeia Hohonaru” Hateten Estáf PERMATIL iha Suku Liurai Maubisse loeon 17/11/2022.

Halao Servisu ida ne’e Komunidade sira servisu ho Voluntariumente, Plan Internasional Liu husi Organizasaun PERMATIL Apoiu maka Aihan ba Komunidade han hodi fasilita servisu ida ne’e.

“Ida ne’e PERMATIL hetan Apoiu orsamentu husi Plan Internasional Timor Leste parseria ho PERMATIL ne’ebe maka durante tinan ida ita halao aktividades ba iha prgrama konservasaun nian. Ida ne’e la selu ba iha Komunidade sira ne’ebe maka servisu maibe ita iha kontribuisaun deit PERMATIL ho Plan Internasional Timor Leste apoiu deit orsamentu ba han nian ne’ebe maka durante ita halo aktividades ne’e” Afirma  Rosantino Amaral  ba Jornalista RKMM 17/11/2022.

Jornalista                     Moises da Silva Magno

Editór                          Joaquim de Fátima Coutinho