Racom Maubisse, 19/10/2022, Tuir Estatuto Radio Komunidade Maubisse mauloko haruka katak, kada fulan tolu president Konselho radio ho mebros sira inklui jestor radio halo reuniaun hodi koalia konaba programa radio nune’e mos konselho radio husu ba jestor oinsa programa no progresu sira iha radio komunidade.
Maske dala ruma reuniaun sira ladun lao iha tinan hirak ikus ne’e, tamba impaktu husi Kovid-19 ne’ebe afeta mundo inklui Timor Leste, maibe liu husi meus komunikasaun ne’ebe iha konselho radio ho jestor sempre iha komunikasaun indereta e mos kada pessoal konselho sira sempre vijita radio hodi update informasaun sira relasiona ho programa radio.
Relasiona ho orsamnetu ne’ebe governu liu husi Ministeriu Assunto Parlamentar e Komunikasaun-MAPKOMS atribui ba Radio Komunidade maubisse Mauloko ho montante $ 9.100.00 ne’ebe fahe ba ITM rua, mak konaba rehabilitasaun ba edificiu radio MAPKOMS aloka $ 6.500 hodi rehabilita radio no $2,600 aloka ba ATK, ho programa Radio inklui fee ba jestor no jornalista sira.
Ba radio Komunidade Maubisse Administrador Posto maubisse Claudino Mendonça hateten katak;
“Agradece ba Governu liu liu MAPKOMS bele apoiu ona fundu balun hodi rehabilita radio, maske osan ho montante ki’ik, maibe agradece tamba governu bele fo ona apoiu, ha’u mos hare osan ne’ebe ba jornalista ho jestor uja baATK ho fee ne’e, ki’ik tebes tamba fulan ne’en mak foin hetan $2,600- $2,800, ne’e ita atu halo saida, sebele governu aumenta tan osan ba fee jornalista sira nian, tamba sira servisu makas iha terenu”. Hateten Administrador Posto Maubisse.
Lidernca maksimu posto maubisse ne’e haklaken liu tan katak, husu ba governu atu tau orsamentu ba radio komunidade sira inklui Radio Komunidade Maubisse mauloko, tamba hare montante osan ne’e ki’ik los.
Iha fatin hanesan Vice Presidente Konselho radio Komunidade Maubisse mauloko, hateten mos katak, durante ne’e jornalista sira halao servisu diak, maibe orsamentu aloka husi MAPKOMS mai radio ki’ik tebes;
“ Husu ba Governu liu liu MAPKOMS atu sebele apoiu oramentu bo’ot uitoan ba radio komunidade sira, tamba hare ba sira nia progresu servisu maksimu tebes maibe osan ne’be aloka mak ki’ik los, maske nune’e ita agradece ba governu bele tulun ona radio komunidade Maubisse hodi halo rehabilitasaun ba edificiu ne’ebe kuaze at hotu ona”. Haktuir Vice Presidente Konselho Radio Maubisse.
Nune’e mos Membru Konselho radio Maubisse Rosa Olga Mendonça akresenta liu tan katak;
“Sebele governu tau osan ba radio komunidade sira ho montante bo’ot uitoan nune’e bele facilita servisu radio nian, tamba jornalista ho jestor servisu diak maibe osan la iha oinsa mak bele motiva sira atu servisu ho diak, nune’e bele halo kobertura”. Dehan Rosa Olga Mendonça.
Participa iha reuniaun Konselho Radio Maubisse ne’e Administrador Posto Maubisse, Vice Presidente Konselho radio ho mebrus inklui Jestor radio Komunidade Maubisse.
Jornalista Natalino Mendonca
Editor Joaquim Coutinho
