Racom Maubisse (14/10/2022) Sekretariu Estadu Arte no Kultura (SEAK) Teófilo Caldas hateten ida ne’e wainhira sai hanesan orador Prinsipal iha Kampaña Nasional Kombate HOAX no Promove Internet Saudavel liu husi Sensibilazasaun Literasia Dijital ba Estudante Eskola Sekundaria Katólika Santo Inacio de Loyola iha Salaun Paroquial Maubisse Sesta feira foin lalais ne’e.
“Kultura la hanorin lia falsu, la hanorin informasaun falsu, la hanorin falsifika dokumentus, la hanorin halo editasaun ba ema seluk nia fotografer sira. Agora ita tama iha Mundu Modernizasaun ita bót sira iha opurtunidade direitu ho dever, direitu maka utuliza, direitu para atu haré buat furak sira buat diak sira mas iha dever para labele falsifika informasaun sira, mas naturalmente hau bele dehan katak kultura ami promove hela Tara Bandu ba kombate HOAX ida ne’e” Dehan Teófilo iha Maubisse 14/10/2022.
Governante ne’e ba foinsa’e sira iha Maubisse fundamenta liu tan katak;
“Ita sai lideransa ne’e ita kolia buat ne’ebé lós la bosok, sai Lideransa kolia buat ne’ebé realidade buat ne’ebé rasional lalika bosok. Entaun ita hakarak para ita bót sira aprende husi ida ne’e, husi Kadeira Sekundaria ba tó Universitáriu aprende buat ne’ebé lós no lolós, justu kredivel lalika bosok” Hatutan Governante ne’e 14/10/2022.
Sensibilasaun ida ne’e iha Maubisse hetan partisipasaun másimu husi Estudante no manorin nain husi Eskola Sekundariu Katólika Santo Inacio de Loyola Maubisse.
Jornalista Moises da Silva Magno
Editór Joaquim de Fátima Coutinho
