Racom Maubisse (23/07/2022) Wilson Nivio Mendonca Xefe Suku Maubisse Villa Municipiu Ainaro Hateten ida ne’e ba Archebispu Metropolitana Dili Dom Virgilio do Coarmo da Silva iha iha Fatin harí Kruz nin iha Foho Balibo Maubisse.

“Senti Kontenti tebes ho presenza Amu Bispu nian ke bele fó tempu bele hakat tó mai fatin ida ne’e, ondra e agradese ida ba ami. Konstrusaun ba Kruz ida ne’e seidauk hamrík los iha fatin ida ne’e maibe hotu-hotu hakarak hetan Bensaun, pois maka ami servisu neneik ami ho esperansa ida ne’ebe ke bót hodi Kruz ida ne’e sei hamrík duni iha fatin ida ne’e iha tempu badak ho servisu ne’ebe ami hotu hamutuk, ho Komunidade, Comunity Maubisse, ho Grupu Arte Marsiais sira, Lia Nain sira ne’ebe iha fatin ida ne’e ami sei esforsu tomak no ami sei garante katak iha tempu badak Krus ida ne’e sei hamrík iha fatin ida ne’e” Hateten Xefe Suku ba Archebispu iha Balibo 23/07/2022.

Konaba Sentidu husi Kruz ne’e Autoridade Suku Maubisse ne’e relata ba Achebispu Dom Virgilio do Carmo da Silva katak;

“Iha ninia 20 metrus ida ne’e iha nini sentidu maka 20 anos Restaurasaun Indepedensia. Ita hateten katak Timor Leste ne’e Terra de Santa Kruz  Terra de Santa Maria ohin Kruz ida ne’e hamrík iha ita Rain Timor Leste. Depois ninia luan ne’e  husi Liaman Sorin 4 metrus, no sorin seluk mós 4 metrus ita tau hamutuk karik 8 metrus ho nia sentidu ida katak 20+8=28 ida ne’e maka loron Proklamasaun Indepedensia RDTL, iha ninia Rín rasik ita haré katak iha Rín 4, ne’e reprejenta Kultura tamba laiha uma Lisan ida maka iha Rín ida ou Rín rua, hanesan mós ita nia Estadu rasik iha Rín 4. 4 ne’e hamutuk maka Nasaun ida ne’e forti no bele ba oin” Relata Xefe do Suku Maubisse 23/07/2022.

Xefe Suku Kuntinua hateten Timor atu lao ba oin Presija ema hotu nia kóperasaun no Servisu Hamutuk.

Ho ida ne’e Amu Bispu Apresia ba inisiativa Komunidade no Sarani Maubisse.

“Hau apresia teb-tebes ba inisiativa ne’ebe Komunidade ida ne’e halo ona, atu dehan deit Kruz ida ne’e hanesan ohin iha Bansaun hau dehan, Sinal Unidade ninian buat hotu ne’ebe ohin ita atribui ba iha Kruz tuir Filosofia autór sira nian katak nia maka hakuak hotu, hanesan Jesus ne’ebe iha Kruz leten Nia Liman Nakloke hakuak ita ne’ebe agora iha e grupu ne’ebe sei mai mós Krus ida ne’e sai sinal hakuak Grupu hotu-hotu” Hatete Archebispu iha Foho Balibo Tutun 22/07/2022.

Iha Laletek Foho Balibo Tututun Cardeál Eleitu Timot-Oan ne’e Hateten tan katak;

“Hanesan ohin hau dehan katak, atu harí unidade nian hahú ho buat hirak ne’e hotu. Ne’e duni hau sadik nafatin ba iha Komisaun Organizadora, ba Grupu Comunity Maubisse, Autoridade Lokal sira, Liu-liu Xefe Suku Joven nain rua ne’ebe hamrík iha ne’e imi nain rua maka iha forsa ida ne’e  hatudu dadauk tia ona hein katak ba oin ne’e sei bele halo buat diak liu tan” Dateten Nai Bispu 23/07/2022.

Entertantu Kruz ne’ebe maka harí iha Foho Balibo Tututun ne’e ho nia Naruk  22 metrus todan Tonelada 6.

Jornalista                     Moises da Silva Magno

Editór                          Joaquim de Fátima Coutinho