Racom Maubisse (12/05/2022) Xefe Suku Foho -Ailico Postu Administrativo Hato-Udo Municipio Ainaro, Deonato de Araújo Laet, hateten ida ne’e wainhira mobiliza Organizasaun Arte Marsiais hamutuk ho Organizasaun Arte Ritual halao Aktividade limpeja iha Resintu Sede Suku kinta feira ne’e.
Autoridade Suku ne’e Konsidera, Organizasaun Arte Marsiais no Rituais ne’ebe maka ejisti iha Suku Foho-Ailico hanesan Rekursu Suku Foho -Ailico nian, Tan ne’e Estadu iha Obrigasaun atu halibur sira. Haré ba iha rajaun hirak ne’e maka hanesan reprejentante Estadu iha baje iha obrigasaun atu halibur hodi kria asaun Paz no Amizade liu aktividade limpeja.
“Parte ita Autoridade ida ne’e ita konsidera hanesan rekursu Suku Foho-Ailico nian ne’ebe ke presija hatan atensaun husi Estadu. Tamba ne’e hanesan reprjenta Estadu iha baje hanesan Autoridade Komunitaria, tamba ne’e maka ita inisia halibur sira mai iha fatin ida ne’e núdar asaun paz ida hodi kria relasaun amizade entre sira ho sira, sira ho Komunidade, ho Autoridade Estadu no Autoridade Seguransa, atu ba oin sira nia Organizasaun bele lao ho organizadu. Núne’e mós sira bele kontribui ba Paz no Estabilidade hodi Kontribui mós ba iha Dezemvolvementu spesialmente iha Suku Foho- Ailico ida ne’e” Dehan Xefe Suku Deonato ba Jornalista Radiu Komunidade Maubisse Mau-Loko 12/05/2022.
Autoridade Komunitaria ne’e haklaken liu tan katak ida ne’e hanesan Aktividade ida ne’ebe maka halao ba dahuluk nian iha Suku Foho-Ailico Postu Administrativo Hato-Udo Municipio Ainaro.
“Agora ida ne’e hanesan pasu premeiru ne’ebe ke ita hakat, agora se ita iha ona komunikasaun diak entre sira ho sira, entre ita ho sira, entau ba oin ita sei promove diak liu tan no utilija sira hanesan rekursu ida atu ita bele halo saida deit maka karik ita sei halo iha Suku laran diak ba Komunidade no diak ba Suku ida ne’e” Hatutan Xefe Suku 12/04/2022
Organizasaun Arte Marsiais no Rituais ne’ebe maka hola parte iha Aktividade limpeja ne’e mai husi Organizasaun Arte Marsiais PSHT, KERA SAKTI, KORK, SERULING DEWATA,no Organizasaun Arte Ritual 77,inklui Organizasaun Arte Ritual Santo Atónio.
Jornalista Moises da Silva Magno
Editór Joaquim de Fátima Coutinho
