Racom Maubisse, 12/02/2022, Administrador Municipiu Ainaro, Leovigildo Pereira ho Administrador Posto Turiscai Municipiu Manufahi Rkonhece katak Estrada ligasaun Maubisse ba Turiscai at, difikulta movimentu transporte roda rua no roda hat, labele asesu ho diak, signifika katak ho kondisaun Estrada ne’ebe at difikulta komunidade sira labele lori sira nia produtu local asesu ba merkadu.
Ba Radio Komunidade Maubisse Mauloko, Administrador Municipiu Ainaro, Leovigildo Pereira, hateten katak;
“Kondisaun Estrada ligasaun Maubisse Ainaro ba Turiscai Manufahi at tamba impaktu husi udan ne’ebe la para ikus mai fo afeta ba Estrada sira kuak, at no monu, e estrada refere halo desde tempu Indonesia, no iha ukun-an kompanhia Montanha Diak mak hadia maibe depois de ida ne’e husik hela no laiha kontinuasaun karik tamba orsamentu”.
Administrador ne’e hatutan liu tan katak;
“Tuir informasaun ne’ebe iha katak iha tinan 2022 ne’e governu liu husi Ministeriu Obras Publika, tau ona iha planu hodi hadia, se la hadia mak sei difikulta komunidade sira atu labele asesu ba transporte publika hodi tula sira nia produtu local ba fan iha merkadu”.
Nune’e Mos Administrador Posto Administrativu Turiscai Durão da Costa hateten katak kondisaun Estrada ligasaun Maubisse Turiscai at duni, tamba ne’e nia sei hato’o ba governu sentral hodi hare kestaun ne’e, tamba administrador ne’e foin mak hetan topada depose husi Vice Ministro STATAL Lino Torezão iha dia 11 de Febreiro 2022.
“Sim kondisaun Estrada ligasaun Maubisse Turiscai at duni, maske ho kondisaun Estrada ne’ebe at, administrador sesante sira dala barak hato’o ba iha governu sentral hodi hadia maibe to’o agora seidauk bele hadia, tamba se la hadia Estrada mak ita kolia konaba dezemvolvimentu buat hotu sei la lao, ho nune’e ho ha’u nia mandate tinan hat ne’e, hau sei buka meus atu kolia ho governu sentral nune’e bele hadia estrda ne’e, se la hadia Estrada mak difikulta komunidade sira atu asesu ba merkadu hodi fan sira nia produtu local”.
Administrador Postu Turiscai ne’e haklean liu tan katak;
“Ita kolia konaba dezemvolvimentu, iha seitor ekonomia, saude, edukasaun, agrikultura, no dezemvolvimentu sira seluk, maibe se kondisaun Estrada ladiak, mak sei difikulta dezemvolvimentu sira seluk, tamba ne’e iha ha’u nia mandate ha’u (Administrador) sei buka meus hodi kolia ho parte municipiu ho nasional nune’e bele hadia Estrada ida ne’e, se la hadia mak sei difikulta komunidade sira atu lori sira nia produtu local asesu ba merkadu”.
Administrador Posto Turiscai ne’e triste ho kondisaun Estrada ligasaun Maubisse Turiscai maibe iha sorin seluk tuir administrador Municipiu Ainaro katak, Estrada ne’e tama ona iha planu governu nian, liu husi Ministeriu Obras Publico katak iha tinan 2022, sei hadia.
Hein katak ho planu ne’ebe governu planei ona atu hadia Estrada ligasun Maubisse Turiscai bele realiza iha tempu badak nune’e facilita transporte roda rua ho roda hat, atu bele lori produtu local komunidade sira nian asesu ba merkadu.
Jornalista : Natalino Mendonca
Editor : Joaquim Coutinho
