Racom Maubisse (26/11/2021) Adjuntu Derektur Eskola SekundariaTékniku Vokasional Agrikola Suku Maulau Maubisse Junior Mendonça de Araujo ható Sentementu ne’e ba Jornalista Radio Komunidade Maubisse liu husi intervista Sexta Feira ne’e iha Seremonia ba Finalizasaun projetu Konstrusaun edefisiu Eskola Sekubdaria ESTVA Maulau, no entrega Xave ba Administrador Municipio Ainaro Leovigildo Amaral Pereira. Junior Hateten Senti Kontenti ho edefisiu eskola foun, maibe nia tristi tamba eskola foun refere laiha Mobiliurios hanesan meza no kadeira hodi fasilita prosesu de apredizajen ho diak ba iha etudante sira.
“Termu de entrega xave ida ohin ba iha Edukasaun hodi entrega mai iha eskola ida ne’e ami senti kontenti, i bele mos la kontenti tamba ho mobiliuriu sira ne’ebe maka priense ba iha eskola ida ne’e rasik ami senti seidauk bele priense 100% para ami atu bele uja sala ka edefisiu ida ne’e” Hateten Junior ba RKMM 26/11/2021.
Ho ida ne’e nia kuntinua rekomenda ba Autoridade Kompetente atu transmiti informasaun ne’e ba Ministeriu Edukasaun Juventude no Desportu (MEJD) atu haré mos ba kestaun ne’e, núne’e bele tama ba iha faze inagurasaun.
“Rekomendasaun husi ami atu hateten, oinsa husi Diretiva Edukasaun no mos Autoridade kompetente ne’ebe maka ohin entrega xave ida ne’e ba eskola atu bele nafatin transmiti informasaun husi baje tó ba iha Nasional hodi bele hare’e kona ba mobiliuariu ne’ebe maka iha. Liga ba inagurasaun ami sei kria tentativa ho Edukasaun liu husi enkontru ruma, maibe husi Eskola rasik seidauk bele temi ho inisiativa rasik atu inagura” Hatutan Nia.
Fatin hanesan Xefe Suku Maulau Domingos Mendonça fundamenta liu tan katak hsus ba Ministériu Edukasaun Juventude no Desportu (MEJD) presija tau atensaun ba kestaun ne’e iha tempu badak, núne’e tama ba tinan foun studante no manorin nain sira bele utiliza ona Eskola ida ne’e.
“Buat falta maka ida ne’e meza ho kadeira ba estudante sira maka tó agora seidauk iha,hau nia rekomendasaun ba MEJD maka ne’e. Ita husu ba MEJD iha tempu badak ne’e bele prepara ona meja no kadeira mai iha fatin ida ne’e atu tinan 2022 ne’e estudante sira bele uja ona” Xefe do Suku Fundamenta.
Hatan ba ida ne’e Autoridade máximu Municipio Ainaro Leovigildo Amaral Pereira Klarifika katak, ” Eskola ne’e diak ona maibe fasilidades hanesan kadeira meja seidauk kompletu, tamba projetu ne’e iha kontratu ne’e la tama ho kadeira meja. ne’ebe sei liga ho Sr. Ministru Edukasaun atu oinsa hahu rejista estudante foun ne’e ita kompleta ona materiais ne’ebe presija tau iha laran, hanesan kadeira, meja, armari no sasan sira seluk ne’ebe presija tau iha eskola ne’e nia laran” Administrador Municipio Ainaro Klarifika.
Entertanto Eskola ne’e kompleta ho sala Nene inklui haris fatin ba estudante feto no mane ketak-ketak. Total Estudante iha eskola ESTVA Maulau ba oras ne’e dadaun kuaje Atus rua Resin.
Jornalista :Natalino Mendonça
Editor :Moises da Silva Magno
