Governu Konstitusionál IX, reprezenta husi Ministru Defeza, Donaciano Costa Gomes ‘Pedro Klamar Fuik’, no husi membru Ezekutivu balun, partisipa iha serimónia komemorasaun Aniversáriu ba da-24 transformasaun FALINTIL ba-Forsas Defeza Timor- Leste ( F-FDTL), ne’ebé hala’o iha loron 2 fulan-fevereiru. Eventu ne’e hala’o iha Kuartél-Jerál (Jenerál) F-FDTL iha Díli, ho tema “Evolusaun no kapasidade hodi adapta iha konjontura foun”, ne’ebé fó énfaze ba prosesu modernizasaun no profisionalizasaun forsa armada nasionál nian.
Serimónia ne’e inklui diskursu husi Prezidente Repúblika no Komandante Supremu F-FDTL, José Ramos-Horta, no Xefe Estadu-Maiór Jenerál F-FDTL, Tenente Jenerál Domingos Raúl ‘Falur Rate Laek’. Eventu ne’e halibur mós Prezidente Tribunál Rekursu, Deolindo dos Santos, membru Parlamentu Nasionál, eis-governante, reprezentante órgaun Estadu, korpu diplomátiku no delegasaun militár estranjeiru, inklui Xefe Estadu-Maiór Forsa Armada Portugál, Jenerál José Nunes da Fonseca, no reprezentante altu sira Forsa Defeza Austrália nian.
Iha serimónia ne’e hala’o promosaun ba pesoál militár F-FDTL, tuir despaxu ne’ebé fó sai husi Xefe Estadu-Maiór Jenerál F-FDTL.
Iha nia diskursu, Prezidente Repúblika fó omenajen ba “Erói Nasionál sira, liuliu ba Komandante-ein-Xefe FALINTIL, no atuál Primeiru-Ministru, Kay Rala Xanana Gusmão”, nune’e mós ba atuál no eis-Xefe Estadu-Maiór Jenerál, “ba sira-nia lideransa vizionáriu no dedikasaun ne’ebé la kole atu harii no konsolida ita-nia instituisaun militár”.
Nia hato’o mós ninia agradesimentu “ba militár sira hotu, nasionál no internasionál, ba ita-nia parseirus dezenvolvimentu iha setór defeza nian no ba país belun sira”, “ne’ebé iha perkursu ne’e tomak kontribui liuhusi apoia finanseiru no rekursu ba edifikasaun di’ak instituisaun militár ne’ebé ohin loron ita selebra”.
Atu hakat-liu dezafiu sira ohin loron nian, Prezidente Ramos-Horta defende nesesidade atu “investe ho estratéjika iha kapasitasaun téknika, auto-sufisiénsia no modernizasaun teknolójika, hodi garante katak ita-nia forsa armada sira sai sustentável no efisiente liután, maski iha limitasaun sira ne’ebé ita hasoru.” Xefe Estadu destaka mós importánsia atu “hametin kooperasaun rejionál” hodi hasoru ameasa transnasionál sira.
Xefe Estadu- Maiór Jenerál F-FDTL, Tenente Jenerál Domingos Raúl ‘Falur Rate Laek’, fó hanoin kona-ba papél istóriku FALINTIL nian iha luta ba ukun rasik-an no nesesidade atu kontinua evolui hodi hasoru dezafius ohin loron nian. “Ohin, uainhira ita selebra loron ida-ne’e, ita hanoin no fó omenajen ba antigus kombatentes FALINTIL, ne’ebé fó buat hotu, hodi ohin loron iha sai povu ida ne’ebé livre no independente. Ita mós fó omenajen ba militár sira hotu ne’ebé husi inísiu sai ona parte husi FALINTIL-FDTL, hanesan ofisiais, sarjentus no soldadus, ne’ebé fó ona kontribuisaun barak ho sira-nia esperiénsia no sakrifísiu tinan barak nia laran, purezemplu, dedikasaun ba pátria, abnegasaun (sakrifika-an), korajen, sentidu kle’an ba misaun no objetivus ne’ebé atu alkansa, sira kontribui ona ho loloos hodi konsolida no dezenvolve F-FDTL, maibé buat sira ne’e hotu, sira kontibui hodi garante seguransa, trankuilidade no estabilidade nasionál”, nia afirma.
Nia defende mós katak “ita-nia devér atu fó onra no prezerva valores nasionais no valores FALINTIL nian ne’ebé hatutan mai ita.”
Selebrasaun sira ne’e inklui mós misa agradesimentu ne’ebé hala’o iha Kapela Sentru Instrusaun Komandante Nicolau Lobato, iha Metinaru, no semináriu ida ho tema “Tinan 24 hafoin transformasaun FALINTL-FDTL, misaun saida maka tenke sai prioridade haree ba realidade nasaun no dezafius seguransa foun, liuliu iha nivel rejionál.”
Iha loron antes serimónia ne’e halao, Ministru Defeza hala’o enkontru ho Xefe Estadu-Maior Jenerál Forsa Armada Portugál, Jenerál José Nunes da Fonseca, hodi ko’alia kona-ba hametin kooperasaun bilaterál iha setór defeza nian, liuliu iha apoiu ba formasaun militár no iha dezenvolvimentu ba kapasidades téknikas no operasionais F-FDTL nian.
