Konsellu Ministru hala’o sorumutu iha Palásiu Governu Dili no aprova projetu Rezolusaun Governu nian, ne’ebé aprezenta hosi Primeiru-Ministru, Kay Rala Xanana Gusmão, ba alterasaun daruak ba Rezolusaun Governu n. 7/2024, loron 24 fulan-janeiru, ne’ebé kria Komisaun Ezekutiva ho objetivu atu estabelese Zona Dezenvolvimentu Ekonómiku Espesiál iha Oekusi Ambenu.
Alterasaun ida-ne’e estende mandatu Komisaun Ezekutiva nian ba fulan tolu tan, to’o fulan-abríl 2025 nia rohan, hodi konsidera kompleksidade hosi misaun ne’ebé atribui no nesesidade atu kompleta knaar esensiál sira ne’ebé sei hala’o hela. To’o períodu ne’e nia rohan, Komisaun ne’e tenke aprezenta proposta ba enkuadramentu orgániku Zona Ekonómika Espesiál iha futuru, hodi garante nia inkluzaun iha preparasaun síklu orsamentál 2026 nian.

Konsellu Ministru delibera hodi fó instrusaun ba Ministru Administrasaun Estatal, reprezenta Estadu, hodi notifika adjudikatárias iha kontratu públiku LCB/006/MAE/2020 no LCB/007/MAE/2020, kona-ba jestaun rezíduu sólidu urbanu no lixeira Tibar, hodi kumpre sira-nia obrigasaun kontratuál iha prazu másimu loron 15 nia laran.

Ikus liu, Konsellu Ministru aprova projetu Rezolusaun Governu, ne’ebé aprezenta hosi Ministru Asuntu Kombatente Libertasaun Nasionál, Gil da Costa Monteiro “Oan Soru”, kona-ba implementasaun medidas legál kona-ba rejistu dadus kombatente no mártir sira libertasaun nasionál nian, ne’ebé rezulta husi publikasaun avizu rejistu daruak-2009.
Ho Rezolusaun ida-ne’e, Governu reafirma ninia apoiu inkondisionál ba Ministériu Asuntu Kombatentes Libertasaun Nasionál, iha implementasaun medidas hotu-hotu relasiona ho publikasaun avizu rejistu 2009 nian, tuir termu sira ne’ebé estabelese ona iha Estatutu Kombatentes Libertasaun Nasionál nian , ne’ebé aprova ona husi. Lei n. 3/2006, loron 12 fulan-abríl, altera hosi Lei n. 9/2009, loron 29 fulan-jullu, Lei n.2/2011, loron 23 fulan-marsu no Lei n.3/2024, loron 12 fulan-juñu.
Governu iha no sei komprometidu nafatin atu garante katak prosesu tomak rejistu dadus kona-ba kombatente libertasaun nasionál nian hala’o ho forma integrál no bazeia eskluzivamente ba lei, hodi garante kombatente hotu-hotu nia direitu.
Tuir termu Estatutu Kombatentes Libertasaun Nasionál nian, karik laiha konkordánsia ho dadus ne’ebé publika ona, interesadu sira iha direitu atu aprezenta reklamasaun ho provas ne’ebé fundamentadu, individualmente, iha prazu loron 60 hahú hosi data publikasaun avizu ne’e. Ema ne’ebé halo deklarasaun falsu ka fó informasaun falsu, ka falsifika dokumentu relasiona ho prova militánsia iha luta libertasaun nasionál ho intensaun atu hetan direitu ne’ebé konsagra iha Estatutu Kombatente Libertasaun Nasionál, sei hetan kastigu tuir lei haruka. REMATA