Racom Maubisse, 24/11/2024, Ohin to’o ona último domingo litúrgico ho Solenidade Cristo sai liurai ba universo no Anjos – Santos iha Lalehan. Hanoin ida nebe uluk liu fo naran ba domingo ida ne’e mak ordem temporal nian.

Hosi parte Creda nian hatene katak estado civil sira nian halo tuir hodi fo hatene katak Cristo hanesan liurai. Tan moris social no história nian muda an tiha kedas no nune’e bele to’o ohin loron celebração Cristo Liurai nian nebe iha lolos Livro Litúrgico no Teológico nia laran. Cristo los duni Liurai maibe laos hanesan mundo rai klaran nian nia pensamento no prática konkreto liurai sira nebe moris do’ok hosi princípio sai líder diak nebe kuida no tau matan ba nia reino sira.

Iha Homilia Padre David da Conceição Alves hateten katak;

“Cristo mosu nu’udar liurai nebe diferente, husik no kolu molik privilégio próprio hosi Aman Maromak hodi sai atan, hakru’uk fase Apóstolo sira ain, halibur hirak nebe lao namkari, kbi’it laek, hadomi labarik oan sira. Nia sai liurai misericórdia hodi tane a’as Bom Samaritano hodi oferece sacrifício santa iha cruz santa, haluha an rasik, hewai glória artefisial tomak. Hadau liu obediência total ba Planos perfeito salvífica Aman Maromak nian”.

Reitor Seminariu Infate Sagres Maliana ne’e hatutan liu tan katak;

“Sai liurai nebe habelun diak ho ema hotu. Cristo simu kbi’it hosi Aman hasulin mai Creda. Laos iha Nia kmanek no ukun ema nian maibe iha moris tuir Justiça no Caridade. Tan ne’e husik hela mandamento Domin, “imi sei hadomi malu nu’udar Hau hadomi imi”. Ita hotu simu konvite ida ne’e atu participa iha convívio iha eucaristia santa. Laos ita comemora maibe participa activa iha Solenidade hodi sai mensageiro no instrumento kmanek ba Maromak Nia Glória, “Ad maiorem Dei Gloriam”.

Mai ita haklean liu tan iha Maromak Futar Liafuan. Livro profeta Daniel assentua nanis katak ” ema ida hanesan Mane Maksoyn. Nia lao da-daun, sira lori Nia ba Katuas lulik Futar oin. Nia simu kbi’it atu Ukun nu’udar liurai “, Daniel hare hetan nanis ona liurai ida ne’e maibe diferente tebes. Dignidade liurai nebe halo povo, nação hotu, ema tomak iha mundo rai klaran hakru’uk hodi serbi tamba testemunho da vida, sai sasin vivo laos promessas falsas barak.

Ligadu ho Na’i Jesus hanesan Liura ne’ebe lori lia los mai iha mundo rai klaran amu Selebrante halo komparasaun ho liurai mundo nian ne’ebe fo exempu ba emboot Pilatus no situasaun actual iha Timor Leste katak;

“Iha Rai Timor ita nia politiku sira iha kamoanha promote buat mesak furak maibe depois de hetan tiha kadeira haluhan lakon tiha promesa sira ne’ebe sira hato iha kampanha ba povu sira, tamba ne’e ha’u soe lia hela bai mi atu imi hanoin fila fali, hakas-aan aprende husi Jesus, di’ak liu terus ba lia loos duke halo terus ema seluk mak terus tamba lia loos, bosok atu manan Povu nia konfiansa fó votus mai ha’u, maibé ikus mai ha’u haluhan tia saida mak ha’u promote, ida ne’e la di’ak, ita hotu nu’udar Kristu ninia Povu, Kristu nia reinu, ita aprende husi Jesus, Jesus la nakdedar atu defende lia loos, iha kruz Jesus mate duni maibé nia hatudu nafatin katak lia loos nia durasaun rohan laiha, Jesus dehan imi boot sira bele nega lia loos, bele oho lia loos, maibé ema simples sira ne’ebé laran moos sira sei rona duni Ha’u Nia Lian, ema sira ne’ebé fó fuan ba diabu aluga tiha ona sira ne’ebé lakoi rona Jesus ikus mai rona diabu, maibé diabu bosok ema, rezultadu terus, mate, konfujaun, konflitu ne’e diabu nia hahalok no ikus mai ema sai terus no mate.”.

Mensajem padre David nian hato’o mai ita atu matan moris ho justice falsus sira iha sociedade hodi hamate lia los .

Jornalista           : Luciana Reis da Cruz

Editor                  : Joaquim Coutinho