Rakom Maubisse, 17/11/2024, Homilia Pe. João Soares Pároco Maubisse hateten katak, labele halo ita nia-aan sai atan ba buat ne’ebé ita iha, tamba ne’e nia hateten katak;
“Nai Maromak dehan buat hotu provizoriu de’it, labele halo ita nia-aan sai atan ba buat ne’ebé ita iha, ita hela iha mundu atual ne’ebé ita hela, tenki hola realidade ne’e hodi kontribui ba dezenvolvimentu iha mundu ho ita nia auto-konfiansa, seguransa, kuidadu ba ita nia-aan rasik, buat hotu ne’ebé ita iha buka atu koidadu ita nia-aan ba Maromak, ba ema seluk, koidadu ita nia-aan ho buat hotu ne’ebé ita iha, maibé, buat ne’ebé ita iha atu serve ita para ita halo ita nia-aan, moris dignu hanesan imajen Nai Maromak nian.Kuida didiak ita nia pensamentu sira, kultiva ita nia konsiensia hodi konsiente no rekoñese katak moris ne’e provijoriu de’it, prepara nafatin ita nia-aan lalika halo ita nia-aan sai dependensia, labele sai atan ba buat ne’ebé ita iha too ikus mai tenki estraga malu ho ita nia vida.”Ita uja buat hotu ne’ebé ita iha hodi tulun ita atu prepara hela ita nia vida ba futuru, la bele sai atan ba mundu maibé mundu kria kondisaun ida atu ita bele ba haksolok ho Nai Maromak iha mundu seluk.” Hateten Pe. João.
Pe. João hatutan tan katak;
“Iha tinan ida nia laran ne’ebé Nai Maromak futar liafuan sira bolu nafatin ita, konvida ita atu respeita buat balu, respeita de’it ita aman Maromak ita ho ita nia realidade, tempu passadu, tempu prezente no tempu ne’ebé ita hotu se ba. Iha últimu tempu, tempu ikus ne’ebé ita hotu-hotu too, sei hasoru ita ida-idak sei ba ho responsabilidade atu hatan ita ninia moris, esperiensia ba Nai Maromak ne’ebé núdar juis, maibé Nai Maromak ne’ebé núdar juis nia la hatuur nia-aan atu kondena ita, maibé nia tuir de’it ita nia desizaun bazeia ba lalaok moris nian.”
“Iha primeira leitura ne’ebé ohin ita rona Profeta Daniel nian, profeta ida ne’e bolu ita atu koko konfiksaun tomak atu rekoñese Nai Maromak haruka nia oan mane, nia de’it la iha tan seluk ida ne’ebé fó nia-aan tamba obedensia ba nia aman ho ninia-aan tomak tuir nia aman nia hakarak, tamba humanidade tomak.”
“Iha segunda leitura Saun Paulu nia surat, nia karta ba Hebreu sira, Saun Paulu revela konkretizasaun, realizasaun Jesus Kristu ne’ebé fó-aan ba mate úniku nia de’it ne’ebé hodi hasa’e sakrifisiu, nia la hasae sakrifisiu ba osan mean ka mutin ho ai-morin, maibé ho nia-aan rasik, ida ne’e Saun Paulu hato’o ba sarani Hebreu sira iha ohin loron, no mós hato’o mai ida-idak katak kristu ida tamba obidiensia fó-aan ba mate hodi salva ita, ninia konkretizasaun klean hatudu iha Eukaristia Santa ida ne’ebé lor-loron ita mai simu iha sorumutuk hamutuk ho Maromak, ho maluk sira iha Eukaristia Santu.”
“Evanjellu nafatin konvida ita, buat hotu sei liu, Nai Maromak nia liafuan sei metin ba nafatin, iha fulan Novembru dia 2 ita selebra hela hodi hanoin maluk mate-bian sira, ita mós labele haluha katak iha kandidatu mate-bian hotu, ita nia prossesu moris, fíziku ninian iha inan nia kanotak, moris hanesan bebe, labarik, Nai Maromak nia liafuan sei hela ba ita. Leitura ohin konvida ita atu konsiente rekoñese no simu, katak buat hotu ne’ebé ohin loron iha ita nia sorin no buat ne’ebé bele haree ho matan, buat ne’ebé ita goja, too momentu ida ita sei husik.”
Jornalista : Luciana Reis da Cruz
Editor : Joaquim Coutinho
