Rakom Maubisse, 06/11/2024, Ministeriu do Parlamentu Investimentu Estratégico (MPIE), Direktor Nasionál Ordenamentu Espasial  Fertinal Alves,Realiza Sorumutuk  kona-bá Fokus Group Diskution Hodi Rekolla Dadus ba Planu Ordenamentu Territorial, iha Salaun postu Administrativu Maubisse Munisípiu Ainaro.

Direktor Nasionál Ordenamentu Espasial  Fertinal Alveshateten, Objetivu ba sorumutuk loron ohin nian kona-báFokus Group Diskution tamba ne’e nia hateten katak;

“Sorumutuk ba loron ohin nian kona-bá Fokus Group Diskution, ne’e iha ámbitu elaborasaun planu Munisípal ordenamentu territoriu Munisípiu Ainaro ninian ne’ebé mak tama ona ba iha téknikamente faze elaborasaun nian, konsulta manan nain ba iha projetu ida ne’e PMOT Munisípiu Ainaro nian mai aprezenta aan no aprezenta mós sira nia kalendariu, objetivu, no dadus ne’ebé mak sira atu rekolla iha Munisípiu Ainaro liu liu neste momentu ohin nian iha Postu Maubisse, iha dadus sira ne’e maka ita bele hafahe ba rua de’it, parte fízika nian teritoria nian no parte sosio ekonomika  populasaun no liga ho vida moris populasaun nian.” Hateten Direktor Nasionál Ordenamentu Espasial  Fertinal Alves.

Direktor Nasionál Ordenamentu hatutan tan katak;

“Téknikamente hanesan faze inisial ida, ita hanaran iha ordenamentu teritoriu fraze karakterizasaun ne’e ita hakarak hatene hotu Munisípiu nian karakteristika, ninia populasaun, rai, ai-horis, animal sira. Faze tuir mai tama ba iha diagnostíku ne’e maka foin hatene dehan Munisípiu ga postu Maubisse ne’e nia potensialidade mak ida ne’ebé, nia kelemahan no kelebihan mak ida ne’ebé, ita hakarak hatene hotu para bele trasa modelu ordenamentu teritoriu Munisípiu ida ne’ebé mak espesífiku, kondis dunik ho realidade Munisípiu nian no bele atende mós difikuldade dekarensia ne’ebé postu ka Munisípiu rasik enfrenta hela.”

“Sorumutuk ida ne’e hala’o ba loron ohin de’it, ne’e nivel postu administrativu nian, semana oin ekipa tékniku sira sei tun too suku, atu rona direitamente husi entidade relevantes sira, nivel suku, chefe suku, lia nain, enjeral, para sira bele aponta took mai, entermos de nivel suku ne’e difikuldade saida mak infrenta, potensialidade ne’ebé mak iha, haree ba riku soin ninia rekursus minerais, ne’ebé mak bele fó para bele halo relatoriu karakterizasaun. Iha planu Munisípal ordenamentu territorial Munisípiu Ainaro nian halo ona iha Fatu-Builiko, no iha postu Maubisse, Ainaro Villa, no ikus liu sei remata iha Postu Hato-Udo.”

Direktor Nasionál Ordenamentu husu ba Munisípiu Ainaro liu liu postu Administrativu de Maubisse katak;

“Husu ba ita hotu iha Munisípiu Ainaro liu liu iha Postu Administrativu Maubisse atu kontribui lisuk ba ita nia planu ordenamentu teritoriu ne’e, tamba Maubisse iha ninia rekursu potensialidade boot liga ba rekursus naturais, rekursus umanus, ne’ebé mak iha, Para ita bele produs matan dalan diak ida ba iha dezenvolvimentu.”Diretur Nasionál Ordenamentu espasial, Fertinal Alves.

 Iha sorin seluk Administrador Postu Maubisse mós agradese ba ekipa MPIE tamba diretamente buka prioridade iha postu no suku, tamba bele hamutuk ho postu hodi elabora Munisípiu ba too Nasionál, no nia hateten katak;

“Objetivu ne’e atu rekolla dadus kona-bá planu ordenamentu territorial kada suku,  ne’e mak antes atu hakaat ba suku, ohin halo uluk diskusaun nivel postu nian, depois dia 8 no dia 11 mak hosi ekipa konsulta husi MPIE nian tun direitamente ba iha suku sira hamutuk ho lider komunitariu no veteranus sira no mós lider seluk ne’ebé mak kompostu iha suku laran, sei identifika prioridade atu enkamiña ba ekipa sira hodi ba munisipiu too iha nasionál.”

Iha biban ida ne’e mós Chefe suku Maubisse villa haforsa tan katak;

 “Sorumutuk ida ohin organija husi MPIE ne’ebé haree liu kona-bá planu ordenamentu territorial, atu halo diskusaun kona-bá areas importantes sira ne’ebé aban bairua sei halo, bele dehan tau naran ba saida mak patrimoniu estadu, rai, propriedade privadu, no mós halo planu ordenamentu ida hanoin ba iha longu prazu katak atu estabelese sidade iha urbana ne’e identifikasaun, planu, no mós hare kona-bá problema sosiais ne’ebé mak iha, hanesan fasilidade ne’ebé mak hola parte ba kompaña, ba empreza públiku sira parte ne’ebé mak hanesan parte privadu nian, fatin ne’ebé risku dezastre naturais, ba oin bele halo edifisiu, fatin ne’ebé aban bairua komunidade sira halo uma karik ita bele dehan katak tenki halo lisensa ida.”Hateten Chefe suku Villa Wilson Nivio Maria Pereira Mendonsa.

Chefe suku Villa hatutan tan katak;

“Tenki aselera desentralizasaun ba iha poder lokais, desentralizasaun ne’e importante tebes para munisípiu sira iha kompetensia bele halo jestaun ba iha munisípiu rasik, liu liu ba rekursus sira, espera katak dadus sira ne’ebé ke haree hamutuk iha oportunidade ne’e sei fó mós dadus ne’ebé ami hetan liu liu iha baze, atu nune’e ba iha nasionál bele hadia lalais para atu halo diskusaun klean molok tama ba iha aprovasaun.”Hatutan Chefe suku Villa Wilson Nivio Maria Pereira Mendonsa.

Antes hakotu Chefe suku mós husu ba komunidade sira atu bele kopera hamutuk ho estadu, tamba ne’e nia hateten katak;

“ Husu ba komunidade sira atu bele kopera hamutuk ho estadu para atu bele dudu Ita nia dezenvolvimenu tba oin,  Governu liu husi ministeriu MPIE liu husi ordenamentu territorial ba planu dezenvolvimentu nasional ne’e sei mai, tamba ne’e ita nia governu, estadu agora dadaun halo hela identifikasaun ba patrimoniu estadu atu bele halo rezistu.” Chefe suku Villa Wilson Nivio Maria Pereira Mendonsa hakotu.

Entertantu iha sorumutuk ne’e partisipa husi Administrador Postu Maubisse Joaquin Salsiña, Ekipa Konsultar, Diretur MPIE, Chefe suku, Reprejentante suku, Diresaun Floresta, inklui veteranus balu.

Jornalista: Luciana Reis da Cruz

Editor : Joaquim Coutinho