DILI: Sekretáriu Estadu Komunikasaun Sosiál (SEKOMS), ejije ba média nain iha Timor-Leste aumenta salariu renumerasaun ba jornalista, tanba  Governu halo asina kontratu apoiu subsidiu  ba média sanulu resin lima ne’ebé  eziste iha Timor-Leste.

Sekretáriu Estadu Komunikasaun Sosiál (SEKOMS), Expendito Dias Ximenes hateten, Governu liu husi Sekretáriu Estadu Komunikasaun Sosiál (SEKOMS) halo kontratu ho media hamutuk 15, llaiha intensaun atu halo intervensaun ba média sira, maibé apoiu ida ne’e atu ajida media sira atu aumenta salariu renumerasaun ba jornalista sira.

“Ha’u apela ba média nain sira favor ida media sira ne’ebé hetan kontratu ho Governu hetan subsidiu ne’e bele aumenta netik jornalista sira nia salariu,” Dehan Expendito iha intervensaun, remata seminariu Nasionál ba loron Liberdade Imprénsa ho nia tema importánsia servisu jornalista ba Sosiadade iha Salaun CNE Dili(25/10).

Nia dehan, dadaun ne’e akontese jornalista sira preokupa sira nia salariu, maibé ida ne’e la’ós Governu mak deside, agora desizaun ida ne’e empreza ne’ebé jornalista sira halo servisu ba média nain sira mak deside tabela salariu ba kada jornalista.

Nia dehan maske ho salariu kiik, maibé ida ne’e Jornalista halo servisu hatudu sira nia profissionál,  tanba de’it votasaun salariu lainfluensia sira, maibe hanesan ema presiza nesesidade moris.

Molok ne’e Presidente Konsellu Imprensa (KI) Otelio Ote hato’o asuntu ne’e iha nia Intervensaun iha selebrasaun loron Trajedia Balibó Five ba jornalista nain lima ne’ebé oho husi Militár Indonesia iha loron 16 fulan Outubru 1975 no komemora loron Nasionál liberdade empresa ba dala rua iha postu administrativu Balibó Munisipiu Bobonaru.

Nia dehan iha forum Nasionál editorial, orador Preokupa  kona-ba direitu salariu ba jornalista iha Timor-Leste seidauk di’ak, iha Instituisaun media balun kada fulan selu salariu ba Jornalista $ 80 no balun simu $ 115 dollar.

“Ita triste jornalista barak sei simu salariu renumerasaun minimu,  balun simu $80 to’o $115, maibé ita kompara ho jornalista sira iha nasaun seluk kada fulan simu salariu $ 1.700 euro,” Dehan Otelio iha intervensaun iha selebrasaun loron Nasionál liberdade empresa no komemora loron Trajedia Balibó Five iha postu administrativu Balibó foin lalais ne’e.

Nia informa Konsellu Imprensa nu’udar orgaun regulador, kontinua  halo kontrolu ba média sira ne’ebé rezistadu atu halo knaar profissionál  Jornalistiku, maibé kona-ba salariu Minimu ne’e Konsellu Imprensa laiha kompetensia.

“Ema balun dehan konsellu Imprensa luta to’ok jornalista sira nia salariu renumerasaun minimu, maibé ha’u dehan ida ne’e la’ós ami nia kompetensia, ami hanesan orgaun regulador ami nia knaar atu regula media sira halo servisu tuir kode Etika, kona-ba salariu Minimu ne’e ko’alia ho SEPOFE mak bele haree asuntu ida ne’e kona-ba salariu ba Traballador sira,” Subliña nia.

Alende ne’e iha Forum Nasionál editorial membru konselleiru KI Benevídes Correia Barros hateten, obstákulu no kauza ne’ebé maluk jornalista sira enfrenta iha nia realidade sósiu-polítiku atu dehan sira tranzmite informasaun, ka realidade maluk sira atu Independente ne’e bele, no mós Susar.

“Ha’u dehan susar, tanba saida?, dahuluk maluk jornalista sira, dependente bá remunerasaun bá instituisaun média ne’ebé sira servisu ba sira asosia aan ba remunerasaun ne’e, kuandu ita observa, afeta bá maluk jornalista sira atu tranzmite ka tranforma informasaun ne’ebé loos, ka verdadeiru bá públiku, maibé, sira hasoru obstákulu real ne’ebé sira tenke enfrenta iha sira nia vida moris loron-loron no moris família,” dehan nia.

Nia konta Remunerasaun ida ne’ebé ki’ik, 80 dolár pur-més, ka 120 dolár pur-més, la apropriadu, tanba ne’e iha  ezemplu, maluk jornalista sira iha Portugal, jornalista portugés sira, pur-més, sira simu remunerasaun ne’e 750 Euro, maibé sira dehan, ida ne’e ki’ik liu kompara ho remunerasaun bá jornalista sira ne’ebé iha uniaun europeia sira seluk hanesan Fransa, Itália, Alemaña, España, Dinamarka, Swedia, sira maiória saláriu remunerasaun ba jornalista sira ne’e $1200 to’o $1700 pur-més.

“Ha’u hatete bá sira, ida ne’e boot liu, kuandu kompara ho realidade saláriu ka remunerasaun bá maluk jornalista sira iha Timor, entaun iha parte ida, ita hakarak dehan, maluk jornalista sira tenke hato’o informasaun ne’ebé verdadeiru, fontes ne’ebé kredível, ezatidaun, akurásia informasaun ne’e ba públiku, mais, iha parte seluk, ita tenke konsidera katak, sira presiza moris, sira mos iha família se kada fulan sira simu $ 80 dollár ne’e mós la’os desizaun bazeia bá instrumentu legál, maibé ne’e konsellu ministru de’it mak halo reuniaun, depois kontempladu iha rezolusaun ne’ebé SEFOPE adpta, mais, nia la konsagradu no la define no regula iha lejislasaun própriu, kona-bá remunerasaun,” informa nia.

Nia afirma, públiku ezíje maluk jornalista sira tenke independente, maibé, kauza, obstákulu mak ida ne’e, tanba ne’e profisaun, Komitmentu, dedikasaun no konsistente,  maluk jornalista sira balu la’os hotu-hotu, persentájen ne’e parese ki’ik, sira iha komitmentu atu dedika aan ba mundu jornalizmu, maibé, konsistente hanesan profisaun, ne’e la-fásil.

“Ita koalia profisaun ne’e, ninia durasaun ne’e, mínimu liu dékada ida, para intende loloos, saida maka profisaun naran jornalista, profisaun hanesan advogadu, profisaun hanesan médiku, tinan-lima, ba ha’u la sufisiente, ha’u fó ezemplu konkreta ha’u iha tinan 17 to’o agora, ha’u halo prátika nafatin hanesan advogadu, mais, ha’u nia siénsia, ha’u nia koñesimentu profisaun ne’e seidauk kle’an, presiza mínimu liu dékada ida,” afirma nia.

Alende ne’e iha mós obstákulu binstituisaun média ne’e saida? Indústria média iha Timor, ki’ik, laiha observasaun, peskiza, para atu rekolla dadus, estatístika hatete katak, persentájen hira.

“Maibé, ha’u nia observasaun restaurasaun independénsia iha 2002 até agora, indústria média iha Timor, ki’ik-oan, tanba ninia rendimentu ne’e ki’ik, la fasilita atu fó remunerasaun ka saláriu ne’ebé adekuadu,  ka aas oituan, Pelu-menus iha biban médiu, bá maluk jornalista sira,”  dehan nia.

Nia esplika fasilidade ba maluk jornalista sira, ne’e mós kolóka en-kestaun, se publiku hakarak maluk jornalista sira dezloka ba foti informasaun, verdadeiru iha área remota sira presiza, instituisaun média na’in, próprietáriu ba média, tenke iha fasilidade sifusiente atu fasilita sira halo kobertura ida ne’e mos problema.

“Ha’u foti ezemplu de’it, parese sé iha ne’e mak iha kondisoens mínimu bá ida ne’e, parese, ezemplu, Hatutan.com mak iha kondisaun mínimu, iha kontestu saláriu, parese Hatutan.com saláriu $150 bá leten, ne’e úniku kondisaun ne’ebé instituisaun média Timor kria, ka fasilita bá jornalista sira, tanba ne’e, iha parte ida, ita ezíje independénsia, iha parte seluk mós difísil atu hetan independénsia,” hateten nia.

Tanba ne’e Kazu konkreta ne’ebé, maluk jornalista sira hasoru, la’os hotu-hotu,  dehan dala-ida tán,  laiha peskiza, maluk jornalista sira balu, halo kna’ar ka ezérse funsaun hanesan jornalista iha tinan-tolu, tinan-lima, para poder polítiku sira kuñese sira, entidade privádu sira kuñese sira, depois uza ida ne’e hanesan pasu ida para atu sai media officer iha ministériu, tanba remunerasaun ne’e di’ak liu mak ida ne’ebá, garante sustentábilidade moris maluk jornalista sira-nian, kada pessoa, no mós ba família ne’e realidade.

Iha fatin hanesan Akademista Timoroan Armindo Moniz  afirma públiku dala barak ezije profesionalizmu, maibé sé liga bem-estár, situasaun ne’e kesi hela jornalista sira-nian ain.

“Ne’e parte ki’ik ida, husi servisu independente, maibé, ita tenke haree bá oin, oinsá mak futuru média bele independente ka lae,? husi istória sira mundu rai-klaran, hatudu buat ida bá ita, oinsá Chongsky Non- Chongsky koalia kona-bá propaganda media, Governu ikus mai, harii tiha media ofisial, no hanesan indústria humas (humor) sira, hodi prodús informasaun alternativa, no organiza parte balu, hodi haloos informasaun alternativa, kontra media sira ne’ebé hasai. Ida ne’e perigu liu, duké, ohin,” dehan nia.

Nia dehan Saláriu bele luta, hafoin iha saláriu boot, bele ka lae, ema ikus mai independente ne’e susar, entaun, independénsia média ohin loron, susar la-halimar atu koalia situasaun ida ohin loron.

“Tanba koalia kona-bá saláriu hanesan intervensaun ohin, ne’e parte ida, maibé, iha parte balu ne’ebé boot liu mak, média, ita tenke identifika, tanba ne’e husu responsábilidade husi ema sira ne’ebé ukun, atu demokrásia ne’e bele la’o, sé lae, manipulasaun ba informasaun sei akontese nafatin,” hakotu nia.

SEKOMS : Media Tenki Sai Universidade Aberta Iha Sosiadade 

DILI: Sekretáriu Estadu Komunikasaun Sosiál (SEKOMS) Konsidera Jornalista ho media papel importante atu hato’o asuntu  konaba politka, ekonómia, sosial, kultura,  seguransa no Defeza tenki sai hanesan Universidade Aberta iha sosiadade.

Sekretáriu Estadu Komunikasaun Sosiál (SEKOMS) Expedito Dias Ximenes hateten, iha semináriu Nasionál ba loron Liberdade imprensa ne’e atu fo hanoin  nafatin ba jornalista sira atu fo sai asuntu importante ruma ba públiku tenki ho invetigativu.

“Jornalista ho media tenki halo investigasaun uluk ita ba isu ruma ho iha faktus, nune’e informasaun ne’ebé ita hasai labele fo dvida ba públiku ho sosiadade  ita bolu dehan infromasaun ne’e falsu ka Hoax ida ne’e mak ita tenki evita, tanba iha konsidera jornalista ho media tenki sai Universidade Aberta iha sosiadade,” Dehan Expedito ba jornalista sira iha Salaun CNE Dili (25/10).

Nia informa, iha semináriu naisonal ba loron Liberdade Imprénsa ne’e hamutuk sei orador nain tolu  husi autoridade seguransa sei  ko’alia kona-ba, papel PNTL oinsá mak asegura  jornalista sira, fo liberdade ba sira halo kobertura iha tereinu.

Nune’e mós parte Konsellu Imprensa (KI) hanesan orgaun regulador  ko’alia kona-ba regulamentu no Protesaun Servisu jornalismu iha Timor-Leste no Asosiasaun Jornalista Timor-Lorosa’e AJTL ko’alia kona-ba progresu no dezafiu profisaun jornalista iha Timor-Leste.

“Ha’u hakarak hateten Aberta iha ne’ebé ba kolega jornalista sira katak, semináriu Nasionál loron Liberdade Imprénsa ne’e importante, maske selebrasaun ba loron liu ona, maibé iha aktividade ida ne’e ita atu reflesaun b ita nia papel iha sosiadade liu liu iha prosesu Konstrusaun estadu,” informa nia.

Nia afirma, jornalista bele asesu ba Informasaun ne’ebé iha, maibé respeita mós ema seluk, bainhira ema ne’ebé jornalista hakarak intervista seidauk iha tempu atu ko’alia, entaun jornalista tenki respeita.

Tanba ne’e  iha nono Governu konstitusionál ne’ebé lidera husi Primeiru Ministru Kayrala Xanana Gusmão orienta ba membru Governu hotu atu atende, bainhira jornalista ida hakarak halo komfirmasaun ho klarifikasaun ba aktividade ruma ba públiku atu hatene.

“Ami iha enkontru konsellu Ministru  ho lideransa Primeiru Ministru Kayrala Xanana Gusmão nia sempre husu ba membru Governu, bainhira jornalista husu Informasaun ruma, atu klarifika  buat ruma tenki atende, tanba ne’e Jornalista kuandu hetan informasaun tenki halo verifikasaun ho faktus halo investigasaun ida klean molok fo sai ba públiku atu asesu,” tenik nia.

Iha aprezensaun ordaor dahuluk komandante Operasaun Nasionál PNTL Superintendente Xefe Polísia José Soares hateten, servisu jornalista papel ida ne’ebé importante estadu hatur klaru ona kedas ona iha Konstitusaun RDTL iha artigu 40 ho 41 ko’alia kona-ba liberdade empresa no Liberdade expresaun.

“Ita Konsidera Jornalista ho media nia papel ne’e importante, tama iha prosesu luta ba ukun aan jornalista mós hola parte iha ne’ebá, tanba ne’e segredu saida mak iha jornalista sempre iha lei atu garante no asegura, tanba iha lei komunikasaun sosial hatete klaru, tanba ne’e ita tenki respeita asegura saida de’it mak ita bele hato’o ba públiku atu asesu no ida ne’ebé mak labele ida jornalista sira hatene,” informa nia.

Tanba estadu Timor-Leste hametin ezistensia servisu públiku ba media televizaun, radio jornál no Online  hodi sai matan no tilun  hato’o husi estadu ba povu no povu ba estadu ida ne’e importante.

Iha fatin hanesan Prezidente Asosiasaun Jornalista Timor-Lorosa’e (AJTL) Zevonia Vieira hateten dezafius ohin loron jornalista sira barak mak kobertura  konsentra iha Munisípiu Dili hatutan de’it ukun nain sira nia liman ba povu, maibé povu iha area rural menus tebes atu hato’o sira nia problema  sosial ekonómia ne’ebé sira hasoru iha baze.

Nia dehan situasuan sira ne’e akontese, Asosiasaun Jornalista Timor-Lorosa’e AJTL buka parseiru sira halo media Tour lori jornalista ba iha baze foti asuntu sosial ne’e povu hasoru, maibé ida ne’e la masimu, tanba kobre ba Munisípiu balun de’it.

“Ita jornalista la’ós de’it atu hato’o informasaun ba públiku atu haree no le ne’e hotu ona ida ne’e labele, ita mós iha papel ida atu halo advokasia ba asuntu violasaun Direitu humanu ba tipu edukasaun ema ho difisiensia sira iha area rural bele ajuda Informasaun ba Governu  atu halo mundansa ba povu nia moris iha area rural ida ne’e mak ita jornalista sira iha papel,” Subliña nia.