Racom Maubisse, 08/04/2023, tinan 2023 hanesan tinan politika, relasiona ho tinan ida ne’e hanesan tinan ba eleisaun parlamentar, maka Partido Libertasaun Pupular ou PLP Halao Reajustamentu Iha Postu Administrativu Maubisse Munisipiu Ainaro, hodi hametin estrutura nune’e bele hola parte iha Eleisaun parlamentar ne’ebe sei akontese iha dia 21 de Maiu 2023.
Ba Jornalista Radio Komunidade Maubisse Mauloko, Koordenador Partido Libertasaun Nasional Municipiu Ainaro, aktual Secretario Estado Assuntu Veteranus Julio da Conceição (Loro Messak) haktuir katak;
“Ohin Ami mai iha Postu Maubisse atu halo reajustamentu ba estrutura Partido nian nebe maka foin lalais ita hatene katak ita nia Vise II Partido Libertasaun Popular (PLP), Munisipiu Ainaro halo ona afiliasaun ba Partido CNRT no mos kordenador Postu Maubisse rasik halo ona afilaiasaun mos, ho nunee ami mai halo fali reajustamentu ba estrutura foun Postu Maubisse nian”. Hateten Loro Messak.
Relasiona ho aktividades reajustamentu ne’ebe halao iha Salaun KOKAMAU Maubisse ne’e, Loro Mesak Hatutan liu tan Katak;
“Kolia konaba Programa partidu nian, primeiro ita tenki kompleta uluk estrutura ba oin mak ita foin hakat ba kampanha hodi kolia konaba programa partido nian no hau nia esperansa ba oin katak ho estrutura foun iha Postu Maubisse ne’ebe ohin estabelese ba oin votus Partido Libertasaun Popular (PLP) sei aumenta”. Haktuir Loro Messak.
Tamba Koordenador Partido Libertasaun Popular ne’e hato’o hela lia menon ba militante no simpatizante sira iha Postu Maubisse em jeralmente Munisipiu Ainaro katak, ita tenki fiar, forte serbisu makas atu nunee bele apoiu ita nia belun “Taur Matan Ruak” ba Primeiru Ministru ho nune’e ita bele aselera prosesu ka programa sira nebe ita iha, no kontinua ba oin nafatin ho planu foun ba oin ho buat foun hodi lori dezemvolvimentu ba ita nia rain no ita nia povu, tamba povu precise tebes dezemvolvimentu.
Participa iha aktividades reajustamentu ne’e ekipa husi nasional no municipiu inklui simpatijante no apoiantes Partido Libertasaun Popular.
Jornalista : Natalino Mendonca
Editor :Joaquim Coutinho
