Estudu konsetuál independente kona-ba dezenvolvimentu Greater Sunrise nian, ne’ebé hala’o hosi empreza británika Wood, husi fulan-abríl to’o fulan-novembru tinan 2024, konfirma katak opsaun dezenvolvimentu projetu iha Timor-Leste ne’e viavel no vantajozu liu ba país, garante benefísiu ekonómiku no sosiál ne’ebé signifikativu.
Estudu ne’e avalia opsaun dezenvolvimentu prinsipál haat – Timor-Leste Liquefied Natural Gas (TLNG – Gás Naturál Likefeitu Timor-Leste nian), Darwin LNG (DLNG), Ichthys LNG no instalasaun LNG foun ida iha Austrália. Opsaun hotu-hotu konsidera teknikamente viavel, ho sira-nia risku ne’ebé iha relasaun, maibé hotu-hotu viavel.
Opsaun TLNG destaka tanba opsaun ne’e prevee kustu operasionál (OPEX) ne’ebé ki’ik-liu no, hodi permite retornu jerál ne’ebé di’ak-liu, tantu diretu no indiretu ba Timor-Leste, sei kria impaktu sosioekonómiku ida ne’ebé boot ba país ne’e. Opsaun ida-ne’e mós prevee impaktu pozitivu ida ne’ebé boot-liu ba Produtu Internu Brutu (PIB) no kriasaun empregu, no mós nu’udar opsaun ne’ebé fó retornu aas-liu ba Konsórsiu Dezenvolvimentu Greater Sunrise (Sunrise Joint Venture). Tuir estudu, TLNG mós sei permite alkansa retornu diretu upstream ne’ebé di’ak-liu ba Austrália.
Wood, ho esperiénsia barak iha estudu viabilidade gás naturál likefeitu nian iha nivel globál, utiliza kritériu rigorozu sira hodi analiza aspetu enjeñaria, teknolojia, finansiamentu, estrutura komersiál, nune’e mós impaktu fiskál, ambientál, saúde no seguransa, no sosioekonómiku.
Primeiru-Ministru Timor-Leste no Austrália nian, Kay Rala Xanana Gusmão no Anthony Albanese, ida-idak, iha deklarasaun konjunta ne’ebé fó-sai iha sábadu liubá, loron 21 fulan-dezembru, reafirma kompromisu hosi nasaun rua-ne’e “hodi garante katak dezenvolvimentu kampu Greater Sunrise iha Tasi Timór fó benefísiu tempu naruk ba povu Timor-Leste”.
“Atu apoia Timor-Leste nia aspirasaun sira hodi asegura kreximentu ekonómiku ba tempu naruk, hadi’a padraun moris no diversifika ninia ekonomia, Austrália propoin atu halo investimentu signifikativu ida iha futuru Timor-Leste nian liuhosi estabelesimentu fundu infraestrutura dedikadu ida, ne’ebé kapitaliza hosi parte ida hosi Austrália nia kuota-parte ba reseita sira iha futuru hosi projetu Greater Sunrise”, dehan komunikadu.
Xefe Governu sira hosi país rua ne’e hatete katak, “hein katak oportunidade ne’e sei marka pesoalmente inisiativa signifikativu sira-ne’e iha tinan oinmai, hanesan demonstrasaun ida hosi kompromisu país rua-ne’e nian ba dezenvolvimentu Greater Sunrise no hametin relasaun bilaterál”.
Ministru Prezidénsia Konsellu Ministrus, Portavós Governu no Interlokutór Timor-Leste nian iha diskusaun sira Greater Sunrise nian, Agio Pereira, afirma katak “konkluzaun husi estudu ida-ne’e nu’udar marku fundamentál ida ne’ebé konfirma ho klaru viabilidade husi dezenvolvimentu Greater Sunrise iha Timor-Leste. Solusaun ida-ne’e sei lori benefísiu ne’ebé signifikativu no sustentável ba povu timoroan no konsolida poténsia ekonómika país nian. Ami sei kontinua serbisu hamutuk ho ami-nia parseiru sira hodi implementa vizaun ida-ne’e.
Kampu gás Greater Sunrise lokaliza maizumenus 140 km hosi kosta súl Timor-Leste nian. Konsórsiu responsavel ba dezenvolvimentu kampu Greater Sunrise (Sunrise Joint Venture) kompostu hosi TIMOR GAP, ne’ebé iha 56,6%, Woodside ho 33,44% no Osaka Gas Australia ho 10%.