Rakom Maubisse Mauloko, 27/11/2024, Komemorasaun loron proklamasaun independensia unilateral Repúblika Demokrárika de Timor-Leste 28 de Novembro ba dala 49 (1975-2024, iha Postu Administrativo Maubisse Municipiu Ainaro, hahu ho missa iha Paroquia Imaculado Coração de Maria Maubisse.
Relasiona ho komemorasaun loron Proklamasaun da Indepenesian 28 de Novembro ba dala 49 (1975-2024, iha Postu Administrativo Maubisse Municipiu Ainaro, iha missa agradecimentu ne’ebe selebra diretamente husi Amu Pároco Maubisse Pe. João Soares iha nia Humilia hateten katak ita nia saudozu no eroi sira proklama independencia ida ne’e iha 28 de Novembro 1975 tamba lakoi atu Povu ne’e terus, tamba ne’e mak ita nia luta nain sira nia objektivu, maibe depois de ukun-an saida mak akontese, realidade hatudu katak povu sei moris iha situasaun kiak no mukit maske nune’e;
“Agradese ba Maromak tamba ita nia proklamador Francisco Xavier do Amaral iha momentu ne’ebá hamutuk ho Nikolau Lobato ne’ebe sai hanesan Primeiru Ministru ho tan heroi sira seluk bele proklama Indpendensia ida ne’e iha situasaun dificil, maske iha situasaun difisil laiha fasilidade, laiha telemovel, maibe ita hare oinsa ita nia lutador sira nia espritu ho boa vontade hodi hakarak proklama independensia”. Hateten amu Pároco Maubisse.
Amu Pároco da Paróquia Imaculado Coração de Maria Maubisse ne’e haklaken liu tan katak;
“Ita nia luta dor sira hakarak proklama independensia ida ne’e iha situasaun difisil, hare katak mosu guera sivil, Timor oan sira rasik iha diversas opinioens iha vizoens polítikas ne’ebé diferente hodi rezulta Timor oan barak mak odiu malu, ikus barak mos fakar-ran no mate liu husi partidu 5 ne’ebé eziste iha momentu ne’ebá, sira ho sira fila oho malu, Proklamasaun da Indepenesian ne’ebé mak saudozu no heroi sira proklama tamba lakoi atu Povu ne’e terus, ne’e fator ne’ebé kontribui ba Proklamasaun, finalidade husi proklamasaun ne’e atu motiva Povu tomak para atu luta nafatin, hodi too loron ida Timor bele atinje nia independensia, atinje ona Independensia partidus Polítikus sira hakarak Povu hetan diak, dada sai Povu husi kiak no mukit, maibe depois de ita ukun-an Povu nafatin kiak no barak mak sei sofre, ita la ezize atu ohin Timor sai kedas hanesan Amerika, Australia, maibé polumenus tenki hatur netik vizaun ida”. Haklaken Amu Paroco Maubisse.
Lider maksimu Paroquia Maubisse ne’e akresenta liu tan katak;
“Ohin Jesus dehan, ha’u la bolu tan ona imi atan, tamba ha’u liberta tiha ona imi husi tempu atan ne’e nian, agora imi tenki sai nain ba imi nia rain, vida, Joven sira dala barak ladun le didiak intensaun husi polítikus sira nian, ita nia domin ba malu tenki kria kondisaun, no kondisaun ne’ebe ita hakarak mak moris diak iha familia no sociedade”.
“Ho grupu barak ne’ebé mosu iha ita nia rain lori dezuniaun ba Timor Oan sira nune’e balu aseita no balu la aseita, realidade hatudu katak, oras ne’e dadaun mosu buat barak ne’ebé mai sobu Igreja, Mosu Igreza Katolika independente, maibé lutador sira dehan la ho igreja nia kontribuisaun Timor sei la ukun-an, maibe depois ukun-an tiha hahu husi Primeiru Governo mai to’o agora, iha parlamentu Nasionál plenaria desde primeiru too agora nein hahu ho reja, nein taka ho reja, tamba ne’e ita tenki valoriza istoria, istoria la sai medida ida atu dehan katak ita sai diak ka lae, mais istoria nia referensia ne’e labele soe”. Hakotu Amu João
Depois de Missa Autoridade Local Posto Maubisse, Estudante, Professores, Veteranus, no komunidade sira hamutuk ho Secretario Estado Toponomia no Urbanizasaun SEATOU akompanha aifunan ba rate hanesan fo respeito no honra ba martires sira ne’ebe sakrifika sira nia vida ba luta ukun rasik-an, hafoin to’o iha cimiteriu jeral Maubisse, antes kari aifunan Eis Administrador Posto Maubisse, Claudino Mendonca ne’ebe hanesan protokolu haktuir katak;
“Ohin ajenda tolu mak ita hala’o missa Agradesementu ba ita nia proklamasaun da Independensia Repúblika Demokrátika Timor- Leste ba dala 49 ne’ebé mak ohin hala’o ona, mai vizita rate hodi fó Ondra no Gloria ba Erois da Patria no Martires sira durante tinan 24 sakrifika sira nia vida tomak hodi luta ba ukun-an, ne’e la seluk la leet hodi luta defende ita nia direitu ba ukun rasik aan”. Hateten Claudino Mendonça.
Participa iha Missa agradecimentu no kari aifunan iha cimiteriu Jeral Maubisse mak hanesan, Secretario Estado Toponomia no Urbanizasaun SEATOU ho ekipa, Autoridade Local Posto Maubisse, Estudante, Professores, Veteranus, no komunidade sira.
Jornalista : Carme Flora
Editor : Joaquim Coutinho
