Rakom Maubisse, 22/11/2024, Politika nono governu Konstitusional liu husi SASMA (Sekretario Asunto Sosiais Munisípiu Ainaro) Hala’o Dezaminasaun Kona-bá Diresaun Asuntos Sosial Hodi Sosializa Formasaun Kona-bá Fornesimentu Kaisaun Ba Komunidade Vulneravel Iha Posto Administrativo Maubisse Municipiu Ainaro.

Relasiona ho surmutuk ne’ebe halao iha Salaun Administrasaun Posto Administraticvo Maubisse, Sekretario Asunto Sosiais Munisípiu Ainaro, Agostino Doutel Sarmento, hala’o dezaminasaun kona-bá Diresaun Asuntos Sosial, hodi sosializa informasaun kona-bá fornesimentu kaisaun ba komunidade vulneravel sira, iha salaun Postu Administrativu de Maubisse Munisípiu Ainaro.

Ba Radio Komunidade Maubisse Mauloko, Agostino Doutel Sarmento hateten katak Objetivu enjeral husi parte servisu Asaun Sosial Munisípal Ainaro nian mak atu haklean informasaun kona-bá fornesimentu kaisaun tantu apoiu karro funerariu ba familia vulneravel sira ne’ebé mak mat;

“Ohin hala’o dezaminasaun kona-bá Diresaun Asuntos Sosial nian iha Postu Maubisse atu fó sinformasaun ba komunidade sira, ba oin kuandu familia ida mate karik bele hatoo deklarasaun tuir formasaun ne’ebé mak sira aprende ona, tamba antes ne’e ema ruma mate sira telfone de’it ami oferese tia kaisaun maibé ikus mai afeta mós ba relatoriu, tamba ne’e mak obrigasaun husi Diresaun Asuntos Sosiais  fahe informasaun ba komunidade sira atu snune’e komprende di’ak liu tan karik ikus mai sira atu halo pedidu ba husu kaisaun sira hatene ona dehan ida ne’e bele ou la bele.” Hatete Agostino Doutel Sarmento.

Sekretario Asunto Sosiais Munisípiu Ainaro hatutan tan katak;

“Iha dekretu lei sira fó kompetensia ba Diresaun  Asaun Sosial hodi bele hare no jere. Kaisaun ne’e apoiu ba ema vulneravel sira, maibé komunidade sira laos vulneravel mós husu hotu kaisaun, tamba ne’e ma kami mai dezamina informasaun ne’e ba komunidade sira para ba oin komunidade balu afeta hanesan ne’e karik husu kaisaun tenki haree dehan ne’e vulneravel duni. Husi dezaminasaun formasaun ne’e espera katak ba oin ne’e komunidade sir abele komprende ona, iha dekretu lei no 84 ne’ebé altera husi dekretu lei no 3/2016 maka fó kompetensia ba  Autoridade Munisípal sira atu orienta, iha artigo 47 maka kompetensia diretur Asaun Sosial hodi bele fahe informasaun ba komunidade sira para bele komprende di’ak liu tan.” Hatutan Sekretario Asunto Sosiais Munisípiu Ainaro.

Sekretario Asunto Sosiais Munisípiu Ainaro hato’o mós nia mensajen ba Autoridade sira katak;

“Atu hatoo mensajen ba Chefe Aldeia, Chefe Suku, komunidade postu Maubisse enjeralmente Munisípiu Ainaro, kuandu komunidade ruma afeta ba mate karik ita boot sira rekolla sira nia dokumentus hodi hatoo ba Diresaun Asaun Sosial hodi nune’e bele fornese kaisaun  ba komunidade ne’ebé mak mate. Fó koragen nafatin ba Chefe Aldeia, Chefe Suku sira wainhira ema ida mate karik bele foti sira nia dokumentus hodi bele husu kaisaun ne’ebé mak atu fornese ba komunidade sira.” Hatutan Sekretario Asunto Sosiais Munisípiu Ainaro.

Antes hakotu Sekretario Asunto Sosiais Munisípiu Ainaro hatan ba preokupasaun ne’ebé mak husi komunidade sira katak presija aumenta taan karru funerariu, tamba ne’e nia klarifika katak;

“Kaisaun ne’e laos atu oferese ba ema hotu la’e, maibé oferese ba ema ne’ebé mak vulneravel de’it, kona-bá karro funerariu ne’e make mak hotu bele asesu, kareta funerariu ne’e agora 2 de’it. Rekomendasaun ne’e foin dadaun ami iha KKN ne’e tau ona iha planu no aprova ona iha Parlamento Nasionál, katak Munisípiu Ainaro ba oin sei sosa tan kareta funerariu ne’e ida para hodi apoiu tan.”  Agostino Doutel Sarmento hakotu.

Iha fatin hanesan Chefe Departamento Jestaun Programa Asaun Sosial Munisípiu Ainaro Silvano de Fátima hateten objetivu husi hala’o dezaminasaun ne’e maka;

“Atu haklean informasaun kona-bá fornesimentu kaisaun tantu apoiu karro funerariu ba familia vulneravel sira ne’ebé mak mate, informasaun sira ne’e hotu laos formasaun foun ba sira, maibé informasaun ne’ebé sira hetan kleur ona, hanesan dever moral husi parte servisu Asaun Sosial nian nafatin haklean informasaun ba sira para nune’e sira kompri regras sira hotu, regras ne’e mak fornesimentu kaisaun nia kriteria, ba sira ne’ebé mate atu hetan kaisaun liu liu ba familia vulneravel sira nia kriteria mak, kartaun eleitoral mate nian, kartaun eleitoral familia matebian nian, no deklarasaun husi suku.” Hateten Silvano de Fátima.

Chefe Departamento Jestaun Programa Asaun Sosial Munisípiu Ainaro, hatutan tan katak;

“Informasaun 2 ne’e maka importante no sensitive liu maka, ida fornesimentu kaisaun, rua mak apoiu Ambulansia tula mate sira. Karro funerariu dezamina informasaun ne’e importante tebes atu nune’e iha futuru bele komprende di’ak liu tan, husi sensibilizasaun rasik hatete ba sira liu liu lider komunitariu sira tantu husi postu, karik iha problema ruma relasiona ho assuntu rua ne’ebé mak ha’u temi ne’e luna kordenasaun mak labele falla, tenki kordena ho parte Asaun Sosial, depois ami mós tenki kordena ho autoridade Munisípal atu nune’e bele fó solusaun ba problema sira liu  liu  servisu Asaun Sosial.” Hatutan Chefe Departamento Jestaun Programa Asaun Sosial Munisípiu Ainaro.

“Karro funerariu nia funsaun laos tula de’it mate isin iha de’it postu Administrativu Maubisse haat ne’e, maibé karik iha pedidu ruma lori fali mate isin ruma husi ne’e ba fali Munisípiu seluk. Kaisaun nia númeru provizoriamente, ezekusaun liu liu iha servisu Asaun Sosial nian kuaje atinji ona 80%.Kona-bá preokupasaun s difikuldade lider komunitariu ssira iha aldeia tantu povu sira liu liu kona-bá karro funerariu, situasaun sira ne’e hotu defende ba desizaun.” Hakotu Silvano de Fátima.

Enkuantu iha biban ida ne’e mós Chefe suku Manetu Vicenti Pereira, iha interista hateten karak;

“Husi dezaminasaun informasaun ne’ebé husi parte social ne’e  ami lamentavel tebes kona-bá dezaminasaun informasaun liu liu kona-bá distribuisaun kaisaun ba komunidade, hanesan Autoridade fó apresiasaun no mós ba futuru ami sempre lori informasaun sira habelar ba komunidade para sir abele hatene lalaok kona-bá distribuisaun kaisaun husi parte social.” Hateten Chefe suku Manetu

“Rekomenda ba social tenki apoiu orsamentu para preparasaun ba kaisaun, ami hakarak kaisaun ne’e distribui, maibé difikuldade mak haree liu ba kareta, no mós husi parte saúde nian atu bele fasilita mós osan hodi bele selu transporte ne’ebé ma kami presija lori tula mate, no aumenta tan kareta ambulansia liu liu iha orsamentu ne’ebé mak aprova iha 2025 ne’e tenki rezerva para hodi koloka ba sosa kareta ambulansia no mós ba kombustivel nian.”

Alende ida Chefe Aldeia Hautado José Lopes mós haforsa tan katak;

“Ami kontenti ho formasaun ne’e tamba hanesan uluk esplikasaun ne’e sidauk rona entaun ami mós la hatene, ba future antes tama ba 2025 tenki lao hanesan ne’e para bele haree lolos ema ne’ebé vulneravel mak bele hetan duni, ami hakarak husu nafatin bs Munisípiu  liu liu parte social nian tenki sosializasaun hanesan ne’e iha suku, ne’e para bele esplika ba komunidade sira bele hatene diak liu tan.”Chefe Aldeia Hautado José Lopes.

Entertantu iha Dezaminasaun ne’e partisipa husi Sekretario Asunto Sosiais Munisípiu Ainaro Agostino Doutel Sarmento, Reprezentante ADM, Chefe Departamento Jestaun Programa Asaun Sosial Munisípiu Ainaro Silvano de Fátima, Chefe Suku, Chefe Aldeia no membrus balu, inklui funsionario Administrasaun Posto Maubisse.

Jornalista: Luciana Reis da Cruz

Editor: Joaquim Coutinho