Racom Maubisse, 25/10/2024, Timor-Leste hanesan pais ida ne’ebé sofre ba perigu natural oi-oin, hanessan bee-saé, bailoron-naruk, laloran a’as, rai nakdoko ne’ebé iha tendensia tsunami.

Matenek naín klimatolojia nian halo predisaun katak klima iha rejiaun Asia ne’e sei bele sai manas no maran, hodi hamosu bailoron-naruk no udan boot liu tan ne’ebé la hatene tuir nia tempu, ne’ebé bele hamosu bee-saé iha fatin-fatin.

Iha loron 13 fulan Outubru nu’udar loron Internasional ba redusaun Dezastre (LIRRD) atu promove kultura global ida ba redusaun risku dezastre. Ne’e nu’udar oportunidade atu rekoñese progresu ne’ebé halo ona ba redusaun risku dezastre no lakon vida, meius-subsistensia no saude tuir Enkuadramentu Sendai ba Redusaun Risku Dezastre 2015-2030 ne’ebé adopta iha konferensia Mundial ONU ba Redusaun Risku Dezastre iha Japaun iha fulan Marsu 2015.

Iha tinan 2024 ne’e husi organizasaun Nasaun Unidas nian ba Redusaun Risku Dezastre anunsia tema ba komemorasaun loron DRR maka oinsá tatoli mensajen katak, ita sei bele Evita no promove dezastre barak bainhira ita iha estratejia redusaun risku dezastre atu jere no redus nivel esistensia risku no atu Evita risku foun mosu. Nune’e maka komemora loron mundial ba LIRRD ne’e ho tema “Hasa’e komunidade nia kapasidade atu resiliente hodi hasoru dezastre.”

Nune’e organizasaun parseiru Dezenvolvimentu sira mak sira haanesan Plan-Internasional no parseiru no konsellu, suko KJDS, Governu liu husi autoridade Munisípiu nian responsavel másimu ba KDJM (Komisaun Jestaun Dezastre Munisípiu), pontu fokal protesaun civil, no parseiru NGO local sira hanesan MAHARU, hakarak komemora loron internasional ne’e iha Suco Maulau, Posto Administrativo de Maubisse Munisípiu Ainaro.

Relasiona ho komemorasaun loron 13 fulan Outubru nu’udar loron Internasional ba redusaun Dezastre (LIRRD) maka Fundasaun Maharu Realiza Seminario Loron Ida Iha Suco Maulau Ho Tema Komemorasaun Loron Mundial Ba Redusaun Risku Desastre “Hasa’e Komunidade Nia Kapasidade Atu Resilente Hodi Hasoru Dezastre nune’e komunidade iha area remotas sir abele hatene hodi asegura-an antes mosu dezastre.

Ho seminariu ne’ebe mak realiza husi Fundasaun MAHARU loron ida iha Suco Maulau Maubisse, iha intervensaun Director Fundasaun MAHARU Bonifacio Sereno Ramalho hateten katak;

“Projeitu ida ne’e, hetan apoiu husi IDPC sentru preparasaun ba dezastre naturais Azia ninian nia tarzetu mai Timor-Leste liu liu iha Munisípiu Ainaro, no projeitu ida ne’e organizasaun rua iha Municipiu Ainaro mak hetan hanesan Fundasaun MAHARU no Fundasaun NAFOFILA mak halo projeitu ida ne’e, no ita hala’o daudaun husi DRP.  Plan Internasional nia projeitu ida ne’e target ba grupu lima mak hanesan iha Suco Manelobas, Edi, Maulau, Maubisse ho Suku Liurai, suco lima ne’e sai uma nain ba  selebra projeitu ida ne’e, projeitu IDPC ne’e mós koalia kona-ba dezastre naturais hotu, projeitu ida IDPC ne’e hetan suporta husi Plan Internasional.” Haktuir Director MAHARU Bonifacio Sereno Ramalho.

Entertantu iha Fatin hanesan, Direktor Autoridade Protesaun Civil (APC) Moizes Mota Menezes husu komunidade sira atu hadok-an husi risku desastre sira atu nune’e labele afeta risku ba komiunidade sira.

“Tuir planu ita sei servisu hamutuk ho ita nia doadores lokal no internasional sira ne’ebé mak halo parserial ho governu sei halo iha suku suku kada tinan, foin mak primeira ves halo serimonia risku desastre iha suku Maulau  ne’e, husi parte nasional tinan tinan selebra maibe Ainaro foin mak selebra iha suku Maulau primeira ves selebra loron risku dezastre ne’e.” Haktuir Direktor Autoridade Protesaun Civil (APC) Moizes Mota Menezes.

Nune’e mós Moizes hatutan tan katak;

“Inisiativo ne’e kria iha area rurais sira atu nune’e povu sira bele hare ita nia atividade direta husi loron komemorasaun ida ne’e , agora tama ona ba tempu udan hadok an husi risku desastre sira atu nunue’e labele afeta ba ita nia komunidade sira, akontesementu sira ne’e ita la espera maibe ita mak tenki salva ita nia an husi perigu  sira” Moizes Deklara.

Iha sorin Seluk Reprezentante PAM Municipiu Ainaro husi parte departementu Sociedade Sivil, Jonatos Dias Araújo Xavier hateten katak;

Oinsa atu prevene risku dezastre husu ita hot-hotu atu tuir orientasaun e matadalan ne’ebé  mak organizasaun sira hato’o hela ba ita oinsa atu bele prevene husi  risku dezastre sira. Diretor NGO Jonatos Dias de  Araújo Xavier  mós hatutan tan katak ;

“Planu ba oin oinsa mak diresaun ida ne’e bele hare sustentabilidade ba grupu kiik oan sira ne’ebé parseiru sira estabelese ona oinsa mak ita bele kria matadalan ida atu bele halo sustentabilidade ba grupu sira ne’ebé mak parseiru sira kria hela, oinsa bele fo formasaun ba sira komunidade sira  wainhira parseiru  sira husik liman parte governu bele halo kontinuasaun, sei koalia hamutuk ho diresaun sira hanesan desastre,Apc, Agrikultor ,edukasaun oinsa atu tur hamutuk hodi halo sustentabilidade ba sira nia programa rasik hodi  hare ba longo prazo nian.” Dehan Reprezentante PAM Municipiu Ainaro Jonatos Dias  de Araújo Xavier.  

Reprezentante PAM Municipiu Ainaro Jonatos Dias  de Araújo Xavier hatutan liu tan katak. “Oinsa atu prevene risku dez astre husu ita hot-hotu atu tuir orientasaun e matadalan ne’ebé  mak organizasaun sira hato’o hela ba ita oinsa atu bele prevene husi  risku dezastre sira, rekoperasaun ne’e dever katak moral ida ne’ebé ita tenke halo rekoperasaun, prevensaun ne’e dever ida ita nian tenke halo prevene ,karik la halo prevene ita tenki hetan afetasaun husi risku dezastre”. Relata  Jonatos

Chefe Suku Maulau Julião Martins ne’ebe haanesan uma nain iha Suco Maulu perante nia intervensaun hateten katak hanesan chefe suco Maulau ne’ebe nain ba suco ida ne’e sente kontente tamba be’e realiza aktividade ka seminariu konaba redusaun risku dezastre iha Suco Maulau;

“Hanesan Chefe do suco iha suco Maulau Ha’u Sente orgullo tebes tamba programa ida ne’ebé hetan  husi NGO lokal e nasional atividade ida ne’e foin primeira ves akontese iha suku  Maulau ne’e, sugere ba governu oinsa bele fahe hela deit informasaun sira hanesan ne’e atu nune’e komunidade sira iha area rural bele hatene oinsa prevene husi  risku dezastre ida ne’e”. Haktuir lideransa komunitariu Suco Maulau ne’e.

Entretantu serimonia komemorasaun loron mundial redusaun risku dezastre ne’e abertura husi Reprezentante PAM Municipiu Ainaro Jonatos Dias  de Araújo Xavier, Direktor APC Municipiu Ainaro, representante Administrador postu, Doadores, Bombeiros, CVTL, Autoridade suku, professores, Veteranus, Estudante sira, no hetan partisipasaun masimu husi Komunidade Suco Maulau. 

Jornalista            : Carme de Jesus Flora

Editor                 : Joaquim Coutinho