Rakom Maubisse, 28/10/2024, Diresaun Nasionál Prevensaun Konflitu Komunitaria (DNPKK), Socializa Kanaar No Responsabilidade durante loron ida ba Lideransa Komunitariu sira Iha Salao Administrasaun Posto Maubisse, relasiona ho sosializasaun refere ba radio konunidade Maubisse Mauloko,Chefe Departamentu Administrasaun DNPKK, Evalina da Costa Guterres, hateten katak;
“Objetivu ba programa ohin loron nian atu fahe informasaun kona-ba Diresaun Nasionál no papel DNPKK nian, no Ida ne’e ita la sosializa kona-ba lei ruma, maibé atu fahe de’it informasaun ba iha ita nia autoridade locál sira, lider komunitaria sira, ho juventude inklui mós komunidade sira iha suku-suku, atu fahe de’it informasaun ne’ebé ligadu ho kanaar no responsabilidade husi Diresaun Nasionál Prevensaun Konflitu Komunitaria. Preokupasaun lubuk ida liu-liu kona-ba ami nia knaar ne’e, ne’ebé ami esplika ba sira katak preokupasaun hirak ne’e ho objetivu ita mós atu identifika sinais konflitu ne’ebé mak akontese iha suku ou iha postu ita atu identifika sinais konflitu, bainhira identifika ona sinais konflitu ne’e oinsá ita atu tau program aba iha futuru no tipu konflitu ne’ebé mak akontese iha suku no postu ida ne’e.” Hatete Chefe Departamentu Administrasaun Evalina da Costa.
Evalina da Costa Guterres hatutan tan katak, kona-ba programa refere maka oinsá atu fó formasaun kona-ba prevensaun no rezolusaun Konflitu;
“Planu ba oin mak liu husi identifikasaun ba sinais konflitu ida ne’e mak ita foin tau ita nia programa, programa ne’e mak oinsá ita atu fó formasaun kona-ba prevensaun no rezolusaun konflitu, ba dezaminasaun informasaun, kona-ba papel DNPKK nian, no mós bele halo diálogu komunitaria ba komunidade sira, I it abele halo tan seminariu prevensaun konflitu komunitaria. Bazeia ba informasaun sira ne’ebé mak ohin dúvidas no mós perguntas husi partisipantes sira no konsege hetan resposta husi komandante PNTL katak kona-ba lei arte marsiais, lei armas brankas nian.”HatutanChefe Departamentu Administrasaun ba DNPKK Evalina da Costa Guteres.
Iha fatin hanesan Segundu Komandante PNTL Posto Administrativo de Maubisse, Natalino Antonio senti kontenti ho formasaun refere, no nia hateten katak;
“Hare ba diresaun DNPKK nia konteudu knaar ne’e kapas tebes, tanba ne’e komunidade ho joventude presiza duni, tamba asuntu prevensaun konflitus ne’e hakarak ka lakoi ita nia Governu, lideransa no komunidade hela iha area refere tenke asesu ba paz, estabilidade, atu asesu ne’e liu husi asaun sira hanesan agora dadaun halo ne’e prevensaun konflitu, ho nune’e sidadaun ne’e livre, paz, hakmatek, dezenvolvimentu mai ne’e sei laiha tan dezintendimentu no komunidades ne’e bele livre., ida-idak buka nia moris tuir nia koñesimentu, abilidade no buat ne’ebé nia bele halo. Se asaun sira ne’e la halo maka hanesan ita husik ona, laiha pensamentu susesu paz estabilidade ne’e laiha.”Hatete Segundu Komandante PNTL Posto Maubisse, Natalinu Antonio.
Segundu Komandante PNTL Natalino Antonio agradece aktividades ne’e maibe nia husu ba Governu liu husi DNPKK atu kontinua sosializasaun;
“Ita agradese ba Governu, no husu mós ba Governu agora tau tan diresaun sira, ne’e katak ita fahe funsionamentu knaar atu responsabiliza ba situasaun paz, dame no hakmatek. Ita ne’ebé asumi ba kargu hanesan lideransa depois mak ita haree fali ba entre ministerial ninia manezementu lideransa, no asuntu finanseiru kompleta tan ba Governu ne’e sei lao ho diak.”Rekomenda Segundu Komandante PNTL Natalino Antonio.
Iha sorin seluk reprezentante Joventude suku Manelobas Maubisse, Hendrique da Conceção senti orgullu tamba partisipa iha formasaun refere, nune’e bele hatene oinsá atu halao prevensaun ba konflitu sira;
“Tuir ha’u nia sentimentu, pesoal hanesan joventude ida senti orgullu tebes tamba formasaun ne’e principal ba joven sira oinsá bele prevene konflitus sira, ha’u hanoin formasaun ne’e espesial ba ami joven sira, hanesan reprezenta joven espesial tebes ba ami para oinsá muda ami nia hahalok, entaun liu husi foormasaun ne’e atu habelar fali ba komunidades sira, karik mosu konflitu balu oinsá sira atu buka meius oinsá atu hamenus , liu husi formasaun ne’e bele sufisiente ba komunidade sira. Formasaun sira hanesan ne’e la bele para de’it iha postu tenke ba iha suku-suku sira para komunidade sira rona direitamente Prevensaun konflitus komunitariu.” Hatete Joventude suku Manelobas, Hendrique da Conceição.
Entertantu iha formasaun ne’e partisipa husi, Administrador Postu Maubisse Joaquin Soares Salsiña, Segundu Komandante PNTL Posto Maubisse Natalino Antonio, Chefe Departamentu Administrasaun Evalina da Costa Guteres, nomos Chefe do suco sira inklui jovens no komunidade balun.
Jornalista : Luciana Reis da Cruz
Editor : Joaquim Coutinho
