Racom Maubisse, 04/09/2022, Iha luta ba ukun rasik-an sempre mai ho moto ida katak  “Mate ka Moris Ukun Rasik-an”  objektivu husi mate ka moris ukun rasik-an mak atu hasai povu husi kiak no mukit, maibe ukun-an  tiha tinan 20 ona,  maibe povu nafatin halerik ba be mos eletricidade, Estrada ho tan nececidade sira seluk.

Se povu nafatin halerik ba be mos eletricidade Estrada no nececidade sira seluk, oinsa mak it abele kolia konaba ukun rasik-an hodi hasai povu husi kiak no mukit? Babain lideransa balun dehan “Liberta Ona Rai, oinsa atu liberta povu husi kiak no mukit”  povu la husu osan no la husu uma luxu ka husu kolen tan sira luta on aba ukun rasik-an, maibe pelumenus povu nia husu mak oinsa ukun nain sira dada be mos ba sira, halakan eletricidade no hadia Estrada ba sira nune’e bele facilita sira nia moris, maibe tinan 20 ona seidauk bele iha mudanca ne’ebe signifikante.

Relasiona ho problema be mos ne’ebe oras ne’e dadaun komunidade Maubisse Villa Hasoru kuaze tinan 20 ona, ba radio komunidade Maubisse Mauloko, Mario Tilman expresa ninia sentimentu ho hirus katak;

“Hanesan Komunidade ida ne’ebe hela iha Suco Maubisse Villa liu liu iha Aldeia Villa, sente triste tamba kleur ona mak sira seidauk bele asesu ba be mos ho diak, liu liu iha area merkadu, cina uman no Maubisse villa em jeral, hau nia pergunta tambsa mak governu la hare kestaun konaba be mos ne’e? tinan ba tinan komunidade halerik hela mos laiha governante ida mak hakfodak hodi mai hadia be mos ne’e, tamba ne’e hanesan komunidade sente triste”. Hato’ohusi Mario Tilman.

Mario Tilman Hatutan liu tan katak;

“Iha tempu kampanha Partido Politik sira tun  mai promote buat mesak funan funan no rebo rebo, povu fo fiar tiha ikus mai kaer tiha ukun haluhan tiha promesa sira ne’ebe mak sira mai promete iha tempu kampanha, ami la husu buat barak ami nia ezisensia mak be mos, Estrada no eletricidade ida ne’e mak importante, maibe to’o agora be mos deit la realiza”. Haktuir Mario Tilman.

Tamba ne’e Mario Husu ba governu liu liu ministeriu Obras PUblik atu tau atensaun ba problema be mos ne’ebe iha Maubisse Villa, tamba tempu portugues no tempu Indonesia be mos lao diak los, tansa iha ukun-an be mos ne’ebe uluk lao diak ne’e sai fali problem aba komunidade, maske ita hatene katak maubisse konhecido hanesan fatin ba turismu no hortikultura, maibe be mos la sai furak fali iha komunidade nia le’et.

Preokupasaun hanesan hato’o mos husi komunidade Filomena Mendonca iha Mrkadu Municipal Maubisse relasiona ho be mos ne’ebe tinan naruk ona sira la asesu;

“Ha’u hanesan komunidade ida ne’ebe buka moris iha merkadu Maubisse sente triste tebes tamba ami durante ne’e asesu be mos susar tebes, maske ami hato’o on aba autoridade local maibe seidauk iha resposta klaru, ami rona iha radio no telvizaun governu ho parlamentu aprova osan bo’ot bo’ot, maibe osan sira ne’e lao ba ne’ebe ami la hatene”. Dehan filomena Mendonca.

Hatan ba preokupasaun ne’ebe komunidade Mario Tilman hato’o ne’e, Ko’ordenador SAS Posto Maubisse, Adelino Mendonça Espirito Santo hateten katak;

“Komunidade iha direitu atu kestiona konaba problema be mos ne’ebe falha, maibe atu dehan deit katak, Governu iha ona Planu atu dada be mos mai Maubisse Villa, planu sira halo ona no asesmentu ba be matan sira iha Maubisse mos tekniku sira mai survey ona, maibe to’o agora seidauk realiza karik governu sei estuda hela no orsamentu mak seidauk iha, tamba ne’e maske komunidade hasoru difikuldade maibe pasiensia hodi hein”. Dehan Adelino mendonca Espirito Santo.

Komunidade nia ezisensia konaba be mos laos akontese deit iha Maubisse Ainaro maibe assuntu be mos ne’e kuaze akontese iha teritorio Timor laran tomak inklui cidade dili ne’ebe governante barak mak hakna’ar-an iha ne’eba.

Governasaun troka dala ualu ona, maibe assuntu be mos to’o agora seidauk bele rejolve, karik tamba planu mak seidauk aserta lolos, ka osan mak la suficiente, ka tekniku sira mak seidauk survey hotu, espera katak governu bele halo politika ne’ebe diak nune’e bele responde ezisensia komunidade sira nian laos iha deit Maubisse Maibe mos iha teritorio Timor laran tomak, inklui capital dili. ** Remata**