Racom Maubisse (11/01/2024) Ministru Administrasaun Estatal Tomás do Rosário Cabral fó posse ba Prezidente Autoridade Munisípiu Ainaro no Administradór postu hát inklui kargu Direktur Servisu Munisipal Ainaro.

Georgina Carmo Bucar Corte-Real Simu Posse núdár Prezidente Autoridade Munisípiu Ainaro foun hodi troka Prezidente Autoridade Sesante Leovigildo Amarala Pereira, no Administrador Postu Ainaro Villa , Maubessi, Hato-Builico, Hato-udo inklui kargu Direktur Servisu Munisipáis.

Hafoin de Pose Ministru Administrasaun Estatal Tomás do Rosário Cabral liu husi Diskrsu hateten, antes ne’e Prezidente Autoridade iha deit Munisípiu Díli, Baucau, Bobonaro, no Ermera, maibé iha Nunu Governu marka tan istória ida hodi estabelese Prezidente Autoridade Munisípiu iha Ainaro no sei kontinua ba iha Munisípiu sanulu resin rua seluk tan
“Intensaun estabelese prezidente Autoridade Munisípiu hotu atu bele kumpri planu estratejiku 2011 ba 2030,” Dehan Ministru. 11/01/2024.
Tamba ne’e Governante ne’e kuntunua husu ba emposadu sira atu servisu hamutuk hodi Dezenvolve Munisípiu Ainaro tamba povu presija Dezemvolvementu.
“Ohin iha juramentu ita bót sira tau liman iha Biblia, buat ida ita tenki halo maka ne’e Lealdade kompremisiu ne’ebé ohin ita b’ot sira halo povu Ainaro Akompaña hela. Kompremisiu ida ne’e tenki rejulta Unidade Nasional iha Munisípiu Ainaro maske iha intervensaun Polítika, Kultural no buat hotu maibe Povu presija Dezemvolvementu. Tamba Povu presija Politik ida ne’ebé bele fó benefisia povu ne’e,” Dehan MAE
Nune’e Prezidente Autoridade Munisípiu Ainaro Georgina Carmo Bucar Corte-Real kompromete hanesan Rai Ainaro nia Oan sei hala’o nia kna’ar ho responsabilidade kumpri ba lei konstituisaun RDTL no prontu servisu hamutuk ho partes hotu hodi dezenvolve Munisípiu Ainaro.
“Hanesan Ainaro oan hau kompromete hodi halao hau nia mandatu ho lealdade totál ba Konstituisaun no Leis sira ne’ebé vigora iha RDTL. Hodi bele lori mundasa no progresu siknifikativu ba Munisípiu Ainaro. Hau mós apela mai ita haburas servisu ekipa rona malu ho sentidu responsabilidade katak Ainaro ita hotu nian ita tenki aproveita ambiente Demokrásia hodi kolia ba malu hanesan Ainaro Oan hodi hametin Paz no Estabilidade hodi fó mós biban ba ema hotu bele partisipa ho proativu iha prosesu Dezemvolvementu Sosiu Ekonomiku nian, ita tenki iha vontade hodi transforma Ainaro sai sentru atividade sosial sira hotu iha area turizmu, kultural, desportu, inklui mós aktividades Públiku no Privadu. Ita tenki haburas hakmatek no harmonia sosial atu Ainaro bele lao ba oin,” Diskursu Prezidente Autoridade Munisípiu Ainaro.
Georgina Carmo Bucar Corte-Real kuntinua konvida nafatin Ainaro Oan hotu atu partisipa no fo kontribuisaun proativamente ba Dezemvolvementu Rai Ainaro nian.
“ Hau nakloke ba krítikas, hau nakloke ba ideias no opinioens konstrutivu hodi hetan estratejia ida ne’ebé diak ba prosesu sosiedade ne’ebé konstrutivu hodi bele hetan estratéjia ida ne’ebé diak ba prosesu ezekusaun programa orsamentu liñas sektorais iha Munisípiu Ainaro 2024, Para bele responde ba metas sira ne’ebé deskreve iha Planu Estratéjiku Dezemvolvementu Munisípal Ainaro ninian ba prioridade seitor Infrastrutura Esstrada, Be, Eletrisidade no area Produtivu sira Seluk” Hakotu Prezidente Autoridade Munisípiu Ainaro Foun.
Iha fati hanesan Autoridade Munsipiu Ainaro Sesante Leovigildo Amaral Pereira lori povu Munisípiu Ainaro, kompostu husi Postu 4, Suku 21, no Aldeia 131, ható parabens ba Nunu Governu tamba nomea ona prezidente Autoridade Munisípiu Ainaro foun. Tamba ne’e hanesan Autoridade sesante konvida ema hotu atu servisu hamutuk ho Prezidente Autoridade foun atu bele Dezenvolve Ainaro.
“Hau lori Komunidade Munisípiu Ainaro, Administrador Postu 4, Suku 21, Aldeia 131, no mós Populasaun Rihun Hitu Nolu nia naran ható parabens ba Nunu Governu, no mós ható parabens ba Prezidente Autoridade foun. Ne’ebé konvida ita hotu servisu hamutuk, no hau pronto atu kópera ho Prezidente Autoridade foun wainhira presija hau nia apoiu wainhira ita servisu hamutuk Munisípiu Ainaro sei ba oin,” Hateteb PA sesante Leovegoldo Amaral Pereira.
Iha Serimonia Tomada de posse ne’e marka prezensa husi membru Governo, Vise Ministru Administrasaun Estatal Jacinto Rigoberto de Deus,Sekretáriu stadu Dezenvolvimentu Lokál, Sekretáriu Estadu Asuntus Toponomia Organizaun Urbana , Segundu Komandante PNTL Munisípiu Ainaro, APC Munisípiu Ainaro, Amu Paróku ho Amu Vigario, Paroquia Santa Maria no Madre Canosiana Ainaro, Prezidente Konsellu Veteranos hamutuk Funsiunáriu Liñas Ministériais hamutuk ho Familia Imposadus.
Jornalista Moises Magno
Editór Joaquim Coutinho