Racom Maubisse (30/12/2023) Lideransa Suku Fatubessi ho Estrutura Selebra Festa Natál Hamutuk Ho Povu, ne’ebé realija loron 30 fulan Dezembru ne’e iha  Suku Fatubessi  Postu Administrativu Maubisse Munisípiu Ainaro.

Ho Festa Natál Hamutuk ida ne’e mós hodi fó agradese ba Konfiansa ne’ebé fó ona husi Povu Suku Fatubessi ba Xefe Suku ho Membrus Konsellu do Suku tomak ba Periodu 2023-2030.

Iha Povu no Autoridades Lokal nia oin Liu husi Diskursu Xefe Suku Fatubessi Bonifacio Pereira Mendonça hateten, liu husi festa Natál hamutuk ne’ebé maka selebra dadaun ne’e hodi fó hanoin ba malu, liu-liu husi Autoridade Lokal Postu Administrativu Maubisse  liga ho Prosesu Dezemvolvemetu iha Suku laran ba tempu sira tuir mai.

“Ita nia Natál hamutuk ida ne’e meus ida husi Konsellu Suku Fatubessi ne’ebé maka iha hanoin katak durante tinan hira nia laran liu ba ami Konsellu Suku Nunka iha hanoin oinsa maka atu bele hamutuk  ho ami nia renu sira, tamba ne’e maka iha tinan ida ne’e ami Konsellu foun Suku Fatubessi iha Inisiativa ida atu bele bolu fila fali ami nia ema sira ne’ebé maka durante ne’e hamutuk ho ami iha ne’e. Tamba objetivu husi Natál hamutuk ida ne’e atu fó hanoin ba ita hotu katak, iha tempu hirak liu ba ita familia sira la hasoru malu liu-liu ita sira ne’ebé maka hola parte iha ne’e dala ruma mós ida-idak selebra Natál ho tinan foun iha ida-idak nia fatin tamba ne’e maka Konsellu Suku foun ne’ebé maka Eleitu iha 2023-2030 iha inisiativa ida atu bele akomula fila fali. Tamba ita hatene katak iha momentu sira hanesan ne’e ami mós presija iha hanoin balun husi ami nia Nai Ulun sira oinsa maka ami atu lori Suku Fatubessi ne’e ba oin.” Hateten Aktual Xefe Suku Fatubessi Postu Administrativu Maubisse Munisípiu Ainaro.

Tamba ne’e liu husi Natál hamutuk ida ne’e hodi bele rona hanoin diak sira husi Autoridade Lokal Postu Maubisse nian, no mós husi Lideransa Nasional Liu husi Jurista Timor-Oan Manuel Tilman ne’ebé maka hanesan mós Suku Fatubessi Postu Administrativu Maubisse Munisípiu Ainaro Nia Oan.

“Objetivu husi Natál hamutuk ida ne’e ami atu rona lia fuan murak balun no mensanjen balun husi ami nia Nai Ulun sira liu-liu hanesan ami nia Aman Sr. Manuel Tilman ne’ebé maka ohin hit-an mai iha ne’e atu bele fó hanoin fila fali ba ami oinsa maka ami hanesan jerasaun foun oinsa ami bele lao tuir ita bót sira nia ain fatin. Tamba ne’e maka inisativa hau nian hamutuk ho membrus Konsellu Suku organiza malu hodi selebra Festa Natál hamutuk ida ne’e.” Hatutan Xefe Suku.

Fatin hanesan Administrador Postu Maubisse Reprejenta husi Adelino Mendonça Espirito Santo ba Xefe Suku  Re-Eleitu no Membrus Konsellu Suku Fatubessi nia husu Atu   servisu no serbi ho responsabilidade ba Konfiansa Povu nian. No atu garantae Dezemvolvementu lao iha Suku Laran presija tebes kolaborasaun, Unidade no Servisu hamutuk hosi parte hotu.

“Atu  dehan ba Xefe Suku Re-Eleitu ho Xefe de Aldeias, Delegados Delegadas, Joven Feto Mane no Lia Nain katak, ohin ita bót sira kontenti tamba Povu Fatubessi fó votus ba ita bót sira sai hanesan Xefe Suku, Sai hanesan Xefe de Aldeias, Delegados Delegadas atu tau matan ba sira iha tinan 7 nia laran. Ita bót sira nia mandatu liu-liu iha sistema Administrasaun Suku maka la atende sira ho diak sira mós ema premeiru ne’ebé sei hotar imi, tolok imi, no sira mós maka ema premeiru ne’ebé imi bolu mós sei fila kotuk ba imi”. Hateten Reprejentante Administrador Postu Maubisse Munisípiu Ainaro.

“Maibe nafatin atu dehan ba ita bót sira so imi servisu hamutuk maka buat hot-hotu bele lao  mais kuandu imi idak-idak ninian hela ne’e programa diak sira mai Suku Fatubessi sei la bele lao kuandu idak-idak halao ninian. Tamba ne’e hau mai dezafia ita bót sira husu nafatin katak ita kuandu Dezemvolve ita nia  rain baut ida halo ita la lao ba oin maka kuandu ita la iha Unidade, tamba so Unidade deit maka bele lori ita lao ba dalan ne’ebé los no ba buka buat seluk ne’ebé bele lori mai investe iha ita nia rain.” Dezafia Autoridade Postu ba Xefe Suku  Membrus Konsellu Suku no Komunidade Suku Fatubessi Maubisse Munisípiu Ainaro.

Biban ida ne’e mós Jurista Timor-Oan Manuel Tilman ne’ebé maka partisipa mós iha Festa Natál Hamutuk ne’e ho Povu Suku Fatubessi iha nia intervensaun hateten husu atu respeita nafatin valor Indepedensia basa seremonia sira ne’ebé ita selbra no halao iha rai ida ne’e valor husi Indepdensia.

“Xefe Suku ho Membrus Konsellu Suku hau Nia parabens ba imi, tamba Indepedensia maka ita halo Festa ne’e. Ita ohin loron ne’e Xefe Suku, Membrus Konsellu do Suku ita nia Administrador mai hamutuk ho ita tamba ita Indepedente. Ita la Indepdente karik ohin loron ne’e ema seluk maka mai diriji ita. Ne’e duni Viva Indepedensia lao ba oin nafatin kbít iha ka laiha ita tenki lao nafatin atu hetan mínimu hanesan ema Demokrásia iha rai ida ne’e Obrigadu.” Hateten Jurista Timor-Oan Dr. Manuela Tilman iha Suku Fatubessi Maubisse Munisípiu Ainaro.

Entertantu Partisipa iha Festa Natál hamutuk ne’e iha Suku Fatubessi husi Autoridade Lokal Postu Maubisse, Segundu Komandante PNTL Esquadra Maubisse, Ekipa PNDS Postu Maubisse, Autoridade Komunitaria Suku Hamutuk ho Povu Suku Fatubessi. No Simbolikamente Reprejentante Administrador Postu Maubisse Entrega Karimbu ba Xefe Suku Re- Eleitu Suku Fatubessi nian Periodu 2023-2030 Bonifacio Pereira Mendonça.

Jornalista                     Moises Magno

Editór                          Joaquim Coutinho