Racom Maubisse (25/12/2023) Amu Pároko Paroquia Nossa Senhora da Grasa Hato-Builiku Padre Francisco Soares Ferndandes hateten ne’e ba Jornalista Rádiu Komunidade Maubisse Mau-Loko (RKMM) hafoin selebrasaun Missa loron Natal nian Segunda ne’e iha Kepela Maulahulo Suku Mulo Postu Administrativu Hato-Builiku Munisípiu Ainaro (25/12)

“Ba Sarani sira iha Manumera no Maulahulo ne’ebé ohin hau selebra Missa iha ne’e hau fó hanoin ba sira katak, Natál ida ne’e atu moris iha Sarani Manumera no Maulahulo nia let, nia liman, nia fuan, maka sira tenki buka solusaun ba problema ne’ebé maka hasoru tia ona. Ita buka atu resolve buka oinsa maka bele evita tia buat at hirak ne’e hotu atu ita bele moris iha dame ida ohin ita kolia ne’e. Sarani Manumera liu-liu Joven Manumera no Maulahulo presija tebes atu oinsa bele fó laran ba malu, fó neon ba malu para bele hetan dame selae Natál ba sira la folin ida. Ema bele selebra Natál iha fatin ne’ebé maka haksolok maibe Natál ba sira la folin ba sira, Jesus Kristu la mai ba sira. Entaun se sira kolabora, ho ida ne’e sira konvida duni Jesus Kristu tama iha sira nia realidade moris no sira husu Jesus Kristu bele fó solusaun ba sira nia moris sira tenki dame malu. Husik tia buat at sira ne’e para sira lao livre, moris livre iha sira, e la fó tan ona presaun psikolojia ba sira nia Inan ka Aman,ba sira nia-an no ba Autoridade sira hotu no ema seluk ne’ebé la partense ba iha problema ida ne’e nia laran tamba ne’e hakarak ka lakohi sira tenki buka malu atu dame malu”.   Hateten Nai Lulik  Paroquia Hato-Builiku.

Karik asaun dame ne’e la akontes entre parte rua hanesan mensiona dadaun maka sasaun ne’ebé sei foti maka hanesan;

“Se laiha dame malu maka hau fó sansaun ba sira maka sei la realija Missa iha Kapela rua ne’e. Ne’e para fó hela todan ba Nai Ulun sira Igreja nian Estadu nian atu oinsa para bele buka solusaun resolve problema sira ne’e. Ita selebra Missa, Missa damen nian, Missa domin nian se ita selebra Missa iha hela problema nia laran oinsa maka ita bele kolia dehan hadame malu ba ho Maromak Nia domin. Hadame malu ho Maromak nia domin maibe Maromak Nia domin la buaras maibe odiu no vingansa maka buras hela iha ne’ebá ema hadomi malu mós la vale buat ida. Entaun ita hakarak sira senti lia fuan ne’e moris iha sira maka ita husu sira atu dame malu resolve problema ne’ebé maka sira hasoru desde kedan Novembru ne’ebá tó ohin loron seidauk hetan solusaun”.  Hakotu Amu Pároko Paroquia Nossa Senhora da Grasa Hato-Builiku iha Kapela Maulahulo ba Jornalista (RKMM)

Jornalista                     Moises Magno

Editór                          Joaquim Coutinho