Racom Maubisse (22/11/2023) Relasiona Ho Festa Kristu Nai Liurai, ne’ebé sei monu iha Domingu Loron 26 Fulan Novembru 2023, Amu Pároko Paroquia Imakulado Korasaun de Maria Maubisse (PICOMA Sigla Portugés) Pe. João Soares disidi Sei Selebra Missa Hamutuk Ho Xefe Suku Eleitu no Re-Elitu Membrus Konsellu Suku 9 Iha Maubisse, inklui Sarani Paroquianos Postu Administrativu Maubisse Munisípiu Ainaro.
Liu husi Intervista ho Jornalista Rádiu Komunidade Maubisse Mau-Loko Amu Pároko Maubisse hateten, ho festa Kristu Nai Liurai nian hakarak halao Missa Agradesementu hamutuk Xefe Suku Eleitu no Re-Eleitu tamba knár ne’ebé maka sira asumi laos fasil. Tamba ne’e aproveita ho Festa Kristu Nai Liurai hakarak Konvida Liurai sira hasoru malu ho Liurai Jesus Kristu Liu husi Ninia Festa ne’ebé sei akontese iha loron 26 fulan Novembru ne’e.
“Hanesan ksolok bót ida reprejenta Sarani, tamba tempu ohin loron Sarani presija iha ema ruma ne’ebé sai hanesan Ukun hodi hanoin, Ukun iha hakarak, Ukun iha vida entaun hanesan Parku iha Maubisse hakarak oferese sentidu agradesementu ba Xefe Suku sira ida-idak ne’ebé pronto atu asumi knár ne’e. Tamba laós fasil, laós Kaman aserta los ho festa Kristu Nai Liurai nian ne’e hakarak mós atu lori Liurai sira mai iha Uma Kreda hasoru malu ho Liurai Jesus Kristu Ninia festa ne’e atu oinsa sir abele foti Jesus Kristu Liurai hanesan modelu ba sira nia Ulkun”. Tenik Pe. João Soares ba Jornalista Kuarta ne’e iha nia Rezidensia PICOMA (22/11)
Husi sorin seluk Missa ida ne’e Mós hanesan agradesementu no husu Bensaun ba knár hanesan Xefe Suku durante tinan 7 nia laran.
“Ida ne’e hanesan agradese no husu Bensaun ba sira nia knár iha mós hanoin ida katak hau ne’e servisu hanesan Parku presija mós kopera ho Autoridade sira tamba hau labele halo buat iha Maubisse seim Liurai sira nia koperasaun. No Liurai sira mós presija servisu hamutuk ho Igreja para atu bele tulun Povu no Sarani”. Hateten Nai Lulik ne’e.
Bibiatan ba Sarani Paroquia Maubisse ne’e kuntinua dehan katak, Liurai sira ne’ebé foin dadaun hetan konfiansa husi povu nia papel imprtante los ba prosesu dezemvolvementu Postu Administrativu Maubisse.
“Hau rekoiñese mós katak Liurai sira nia papel imprtante lós iha Maubisse, mudansa iha Maubisse ne’e la depende deit ba Parku, la depende deit mós ba Liurai sira, entaun se ita hakarak mudansa positiva presija mós enkaisa sira iha Kristu Liurai Ninia maneira Ukun atu núne’e sira hot-hotu bele Ukun ho didiak, Ukun Povu ne’e ho domin. Tamba ne’e hakarak deit Missa ida ne’e oferese ba sira para hetan Bensaun hodi bele halao sira nia knár iha tempu ne’ebé naruk nia laran ne’e ho diak sira bele halo sakrefisiu ne’ebé bot hanesan Jesus Kristu, sira mós bele hanesan Jesus dehan, la mai atu ema serbi sira maibe sira mai atu serbi Povu ho konfiansa Nai Maromak fó ba sira”. Hakotu Nai Lulik ne’e.
Jornalista Moises Magno
Editór Joaquim Coutinho
