Racom Maubisse (26/10/2022) Padre Francisco Soares Fernandes Aktual Pároko Igreja Nosa Senhora da Grasa Hato-Builiku, hateten ida ne’e ba Jornalista RKMM Kuarta feira ne’e liu husi via telefone. Nai Lulik ne’e hateten, Ohin loron iha mudansa ne’ebé maka bót tebes ne’e duni familia sira buka atu hadomi malu ho responsabilidade no hatene atu haraik-an ba malu serbi malu ho didiak atu núne’e sai ezemplu ba iha familia sira seluk.

“Hanesan Pároko hau nia mensajen ba Komunidade sira ka ba familia sira ohin loron tempu ida ne’ebé mudansa ne’e bót tebes  ne’e duni familia sira buka atu hadomi malu, responsabilidade ba malu, hatene haraik-an ba malu, moris serbi malu didiak atu núne’e bele sai ezemplar ba familia sira seluk” Hameno Nai Lulik ne’e 26/10/2022.

Foti-an ho riku soin, kargo Nai Lulik ne’e konsidera ne’e folin laek, ida ne’ebe folin maka rona malu, fiar malu ho domin.

“Dala ruma foti-an tamba matenek, foti-an tamba pozisaun, dala ruma foti-an tamba riku soin, maibe núfim buat hirak ne’e la folin buat ne’ebe folin bót liu maka familia ne’e rona malu, fiar malu, hadomi malu, ho responsabilidade ho haraik-an ba malu, la minimija malu, la diskrimina malu, ou haketak malu iha uma laran. Domin iha familia ne’ebe diak ne’e la haré ba o nia riku soin, la haré ba o nia pozisaun, la haré ba o nia bonitu maibe haré ba  o nia fuan ne’ebé hatene haraik-an atu núne’e hodi bele serbi” Hatutan Bibiatan ba Sarani Hato-Builiku ne’e ba Jornalista Radiu Komunidade Maubisse Mau-Loko 26/10/2022.

Jornalista                     Moises da Silva Magno

Editór                          Joaquim de Fátima Coutinho