Racom Maubisse, 17/10/2022, Moris iha Knua id aba knua seluk kondisaun moris sempre la hanesan, agrikultor balun ke rai kuda modo iha rejultadu mak bele hetan osan, agrikultor balun falin moris ho natar, e agrikultor seluk fali, tein masin mak bele hetan osan hodi sustenta ekonomia familia nomos selu oan sira nia escola.
Tamba ne’e moris iha kada familia ka uma kain ho situasaun moris ne’ebe la hanesan, balu ekonomia sufuciente, balun fali ekonomia diak liu e balun susar tebes iha moris lor loron, e susar liu mak atu hetan deit ai-han ka osan iha moris lor-loron araska tebes, e bai bain ema dehan, moris ne’e la facil, e moris ne’e la facil hanesan ema fila liman tanen.
Komunidade sira moris iha foho, sira nia moris lor loron ho tos no natar, komunidade sira moris iha rai fehan ka tasi ibun sira nia moris hanesan pescador, no tein masin hanesan dadaun akontese iha Aldeia Sin laran, Suco Ai-Daba-Leten Posto Atabae, Municipiu Bobonaro.
Iha intervista ba Radio Komunidade Maubisse Mauloko, Inan Maria ho idade besik tinan 50 ne’e, ho kosarmetan sulin tamba rai manas e mos tein tan masin ho oin midar haktuir ba radio komunidade maubisse katak;
“Ami tein Masin ne’e sente todan tebes, tamba antes tein masin tenke raut rai, tau iha kalen kuru tasi ben, sudi ahi, depois de ahi lakan no manas mak bele tein masin, bainhira atu atu tein masin no ikus sai masin kolen tebes”.
Inan Feton Maria Noronha Haktuir liu tan katak;
“Ho produs masin ne’ebe ami halo ho liamn no ekipamentu local kolen tebes no han tempu naruk hafoin mak masin ne’e bele sai masin lolos hodi rai bah an e mos bele fan hodi sosa fali fos, mina ho modo ba nececidade familia uma laran nian, nomos selu oan sira nia escola”.
Karik hetan apoiu ruma husi governu no NGO sira hodi apoia aktividades sira konaba tein masin iha Suco Ai-daba-leten, Maria Noronha haktuir;
“Governu no ONG sira dala barak mai foti ami nia naran hodi halo promesa mai ami katak sira sei ajuda imi, maibe ikus mai naran iha sasan sira konaba tein masin nian atu fahe mai ami balu mak simu e balun lae, entaun hanesan ema ki’ik ami nonok deit, naran katak ita sei moris bele buka dalan mesak hodi hetan sasan sira ne’ebe mak atu tein masin, maske sasan sira ami uja ne’e la kualidade”.
Inan Maria ho oin midar haklaken liu tan katak;
“Ami iha Suco Ai-Daba-Leten husi Governu no NGO sira mai forma grupo, e mos bele produs masin mesak, maibe ami produs masin barak laiha ema ida mai sosa, e sira ba sosa fali mak masin husi rai liur hanesan Indonesia, tamba ne’e husu ba governu atu sebele sosa deit mak ami nia masin, nune’e bele ajuda ami iha ekonomia uma laran, nomos bele selu oan sira ba escola”. Haklaken Inan Maria Noronha.
Inan husi Oan nain ne’en ne’e ho kosar metan sulin iha fatin ne’ebe tein masin ba ho oin hamnasa mihis husu dala ida tan ba Governu no NGO sira katak;
“Hanesan komunidade ki’ik dala ida tan husu ba governu atu labele sosa masin husi rai liur hanesan Indonesia, maibe sosa deit mk masin local hodi ajuda ami nia ekonomia nomos selu oan sira ba escola, tamba labarik sira mak future nasaun e ekonomia diak labarik sira nia edukasaun mos lao se ekonomia la diak labarik sira nia edukasaun mos sei la lao”.
Inan Maria Noronha iha oan nain 6, feto 4 mane 2, ne’ebe escola hotu, maibe ekonomia atu sustenta oan sira ba escola mak susar tebes, tamba masin ne’ebe sira produs ema la sosa, no kada loron sorte diak ema bele sosa ida ou rua, e dala ruma ema la sosa tan, tamba iha suku Ai-daba-leten komunidade barak mak produs masin no fan iha Estrada ninin sira.
Jornalista : Ekipa Racom Maubisse
Editor : Joaquim Coutinho
