Racom Maubisse, 09/04/2022, Care Hatutan halao Programa Feira Saude Escola “Moris diak no Aprende Dika” iha EBF Sarlala Balibo Maubisse, aktividade ne’e halao durante loron ida no hetan partcipasaun husi Reprezentante Director Edukasaun Municipiu Ainaro, Reprezentante MSSI, Saude, Autoridade Komunitariu Suco Maubisse Villa, professores, alunus, no inan aman sira.
Ba Radio Komunidade Maubisse Mauloko, Casilda Soares Gomes Nudar Jerente ba Programa Saude Generu Iha Care Hatutan Munisipiu Ainaro haktuir katak;
“Objektivu husi atividade ida ne’e maka ita hakarak anima ita nia alin oan sira oinsa atu promove atividade extra kurikular, ita hakarak eskola hahu iha sira nia eskola rasik, hanesan atividade extra, alem de sira nia aula ka sira nia tempu aprendizasen nebe maka hahu segunda to’o Sexta”
Jerente ba Programa Saude Generu Iha Care Hatutan Munisipiu Ainaro ne’e haktuir liu tan katak;
“Aktividade ida nee hanesan aktividade nebe maka ami halo tia ona durante nee, ami hahu husi tinan kotuk ami hahu ona iha Postu Rua Postu Hatudu Iha Eskola Luro no mos Postu Hatubuiliku EBF 1,2 Ernaru no ida nee hanesan atividade ba datoluk ba feira saude nian nebe maka ohin loron ita realize iha EBF 1,2 Sarlala Balibo”
Iha fatin hanesan Joao Maria Mendonca hanesan Kordenador EBF1,2 Sarlala Balibo Hateten katak;
“Konaba Feira Saude Eskolar ne’e hatudu katak moris diak, aprende diak entaun liu husi feira ida ne’e ita bele kumpriende moris diak nee hanesan saida e aprende diak ne’e hanesan saida, nomos ita nia hatais mos diak no ita bele mai aprende iha eskola, no ita presija mos kondisoens eskola hahu husi sala laran too materias de ensino aprendisajen, tenki kompletu nune’e estudante sira bele aprende ho diak iha eskola ida ne’e”.
Iha abertura ba Programa Feira Saude Escolar “Moris diak no Aprende Diak” iha EBF Sarlala Balibo Maubisse, reprezentante Director Edukasaun Municipiu Ainaro, aktual inspektur Escola Zona A Posto Maubisse, Pedro Mendonca hateten katak;
“Em nome Director Municipiu Ainaro, hakarak hato’o agradese no louva tebes ba atividade sira ne’ebe maka parseiru internasional no parseiru lokal fo apoiu mai iha Eskola EBF 1,2 Sarlala Balibo relasiona ho kompetisaun Kona Ba Programa Feira Saude Escolar “Moris diak no Aprende Diak”.
Reprezentante Director Edukasaun Municipiu Ainaro, ne’e hatutan liu tan katak;
“Ha’u nia prezensa iha Programa Feira Saude Escolar “Moris diak no Aprende Diak” ne’e atu observa hela ninia lalaok husi kompetisaun ne’e oinsa ninia lalaok sira, maibe tuir ami nia observasaun ha’u hare buat lobuk ida ke ita boot sira nia preparasaun ba estudante sira nee diak tebes no buka atu kontinua, nune’e bele motiva estudante no inan aman sira iha Eskola EBF 1,2 Sarlala Balibo bele lao diak liu tan iha future”.
Participa iha Programa Care Hatutan konaba, Feira Saude Escolar “Moris diak no Aprende Dika” iha EBF 1,2 Sarlala Balibo Maubisse, Reprezentante Director Edukasaun Municipiu Ainaro, Reprezentante MSSI, Saude, Autoridade komunitariu suco Maubisse villa, professores, alunus, no inan aman sira.
Jornalista Natalino Mendonca
Editor Joaquim De Fatima Coutinho
