Racom Maubisse (10/01/2022) Xefe do Suku Ainaro Villa Agapito Fátima Martins hato prokupasaun ne’e iha Diálogu ne’ebe maka halao ho Xefe do Governu Taur Matan Ruak iha Municipio Ainaro Segunda feira ne’e.
Autoridade Komunitaria ne’e Sujere ba Diresaun Nasional Ministériu Solidaridade Sosial no Inkluzaun atu hadia Sistema pagamentu ba Idosus iha baje, tamba Xefe Suku sira la hetan lista naran ne’ebe aprova ona . Ho rajaun ne’e maka Liu Rai Ainaro ne’e husu Se bele lista entrega ba iha Xefe Suku sira tamba sira maka koinese liu komunidade sira iha baje.
“Hau Sujere Atu hadia Sistema ne’ebe maka failasu iha tun mai baje, Kona ba idosus nian tamba saida maka lista ne’e la bele fo mai ami xefe suku, tamba atu selu no fo pagamentu ne’e ami maka hasoru problema. Ne’e hau sujere Sua Eselénsia atu sama atensaun ba Diresaun Nasional Liu-liu Ministériu Sosial atu bele hare hikas lista Idosus sira nian ne’e tenki fo mai ami, tamba povu ne’e iha ami nia liman nusa maka taka fali lista ne’e mai ami halo ami maka hasoru problema” Dehan Xefe Suku Ainaro Villa 10/01/2022.
Prokupasaun hanesan ható mos husi Xefe do Suku Foho Ailiko Postu Administrativo Hato-Udo Municipio Ainaro Deonato de Araujo Lait. Tuir Deonatu hateten; ” Idosus no Invalidus ne’e maka ohin hau nia kolega Xefe suku Ainaro temi ona dadauk ne’e iha Idosus no Invalidus ne’ebe maka naran aprova ami hetan informasaun deit liu husi Facebook e lista ami la simu maibe to iha sira ba forma simu sira nia osan maibe osan laiha. Dala ruma sira nia osan laiha no aprova foun tamba ne’e ami nia prokupasaun maka ne’e sistema maka la diak ka ou ema kaer sistema maka la hatene ka ou osan maka laiha” Fundamenta Xefe Suku Foho Ailiko.
Liga ho Prokupasaun hirak ne’e Ministru Administrasaun Estatal (MAE) Mguel Pereira de Carvalho iha nia intervensaun hateten Sei Aprejenta prokupasaun hirak ne’e MSSI atu lista pagamentu ba Idosus sira se bele rai iha Suku Sira.
“Lista Pagamentu ba Idosus sira se bele rai iha Suku sira ami toma nota ida ne’e Sei kolia ho Ministru Solidaridade Sosial atu disponivel dadus ne’e ba ita bót Sira” Hatan Ministru Administrasaun Estatal (MAE).
Jornalista : Moises da Silva Magno
Editor : Racom Maubisse Mau-Loko
