Ministro Gil da Costa “OAN SURO” Husu Veteranus Sira, Kontribui Situasaun Dificil, Ho Autoridade Sira Hodi Fo Solusaun Ba Problema

0
70 views

Racom Maubisse-2024, Relasiona ho inaugurasaun Edificio Konselho Veteranus Municipiu Ainaro, ne’ebe halao iha Ex Kodim Municipiu Ainaro, Ministro Gil da Costa “OAN Suro” iha intervensaun katak; Husu ba veteranus sira, atu kontribui iha situasaun dificil saida deit, hamutuk ho autoridade sira hodi fo solusaun ba problema.

Ho nune’e antes “Oan Suro” Hato’o nia diskursu, ba dala uluk tuir kultura rai Ainaro nian hase uluk natureza ho matebian sira;

“Ha’u nia Hakruk Ba lulik Timor Leste ninian, especial iha Rai Orluli Ainaro, ba inan ho aman mutin ho metan, ba oan mane hat feto hat, ba lisan sira hotu, ba matebian no heori sira hotu, faluk no aon kiak mak ha’u nia hakruk ba imi hotu, ho Nai Maromak Nia tulun biar udan boot, ne’e mak natureza Ainaro nian, ida ne’e mak natureza Timor nian”.

“Ohin ha’u mai iha ne’e sente an atu koalia hanesan Ministro ka hanesan Ainaro oan (dua duanya), primeiro lori Ministro Assunto Kombatente Libertasaun Nasional nia naran, hakarak agradece ba ko’operasaun no kontribuisaun hotu, hahu husi presidente autoridade ho estrutura tomak, nai chefe do suco sira ne’ebe marka prezensa iha ne’e, especialmente suco Ainaro tamba fatin ne’e horik iha suco Ainaro nia konta”.

Ho permisaun ita boot sira nian, “Imi mak tidin hela ai no hada hela fatuk, imi mak hari hela ai-rin no homan hela kakuluk, karik imi nia lian sae imi bele menus uitoan, maibe ne’e laos obrigatoriu ne’e mak natureza”.

“Iha momentu ida ne’e atu hateten deit ba ita hot-hotu, liu-liu ba veteranus sira, ohin presidente Administrasaun CCLN Ainaro nian esplika ona buat lubuk ida, ha’u ohin mai iha ne’e atu partilha hamutuk ho ita boot sira konaba saida mak veteranus no existensia veteranus ne’e hanesan ne’ebe? Responsabilidade veteranus nian hanesan ne’ebe?, Ohin presidente Autoridade Municipal Ainaro temi deit konaba valorisa, maibe dala ruma ita koalia deit konaba direitu, ita veteranus nunka koalia konaba dever, kuandu ita la koalia konaba dever, ne’e ema dehan “Lupa Diri” ne’e labele”.

Ministro Assunto Kombatente Libertasaun Nasional ne’e haklaken liu tan katak;

“Kuandu koalia konaba veteranus sira atu mai simu osan, sira mai iha Ainaro ne’e resin tiha, maibe koalia atu participa hodi hatene lalaok no responsabilidade, sira la mai, imi atu ba ne’ebe Timor ne’e klot hela, mate ruin tun ba iha uma mahon ne’e barak liu ita sira iha ne’e, sira nia prezensa ha’u hatene iha hela, maibe ita moris la marka prezensa, Ainaro klot, Timor klot, responsabilidade imi nian komesa menus ba bebeik, oinsa imi bele husik hela memoria diak ba ita nia jerasaun tuir mai”.

“oan Suro akresenta liu tan katak;

“Ohin presidente Autoridade Municipal Ainaro dehan, jerasaun foun atu banati tuir, se ita la preparadu no lahusik buat diak atu jerasaun foun sira banati tuir, entaun jerasaun foun sira atu banati tuir saida?, ne’ebe atu aproveita momentu ida ne’e, agradece ba estrutura municipiu Ainaro ninian, liu liu iha estrutura CCLN Ainaro, ohin presidente CCLN agradece ba presidente Autoridade Municipal nain hira ne’ebe liu ona, Sr. Albertinho eis administrador tur hela iha ne’e, Sr. Leovegildo laiha ne’e, agradece ba sira nain rua, agradece mos ba administrador do posto sira, agradece ba chefe do suco sira no agradece ba presidente Autoridade municipal foun”.

Perante Ministro Assunto Kombatente Libertasaun Nasiona haktuir konaba unidade no servisu hamutuk entre veteranus sira nune’e hodi husik hela lisaun diak ba jerasaun tuir mai, Ministro “Oan Suro” mos haktuir konaba leisira ne’ebe kabe ba kompetensia Veteranus sira nian;

“Lei ne’e dehan hanesan ne’e, “Saida deit mak sai hanesan patrimonio histórico ba luta libertasaun nasional nian, ita tenke konserva, konservasaun ne’e ida mak ohin hanesan temi ne’e, bandeira uluk 1975 hasae iha nee, militar ne’ebe desidi hodi oho imi nia inan, oho imi nia aman, oho imi nia feton, barak hodi sai faluk, barak hodi sai oan kiak, viola ita nia oan feto sira karik iha mos fatin ida ne’e, tamba ne’e militar nia fatin. Maibe to’o agora dala ruma veteranus rasik la hatene, ida ne’e ita moe, tamba ne’e, husu hotu hotu atu halo refleksaun ba kotuk, baibain ha’u dehan saida “lori kareta ne’e hateke ba oin, maibe keta haluhan hare ba espelho roda kotuk keta tama rai kuak karik, refleksaun ba kotuk mak espelho ne’e”.

Antes termina Ministro “Oan Suro” Husik hela mensajem especialmente ba veteranus sira mak ida ne’e;

“Ha’u koalia iha fatin barak, loron boot dala ruma ita veteranus sira nia participasaun menus, 28 de Novembro dala ruma ita minimu, 20 de Maiu dala ruma ita minimu, ne’ebe senhora PAM liu husi Administrasaun CCLN Ainaro iha hela ne’e, primeiro hakarak agradece hela ba buat ida ohin dehan ne’e, iha municipiu Ainaro aktividade saida deit imi sempre hamutuk, “Diferente iha partidu, maibe la diferente ba Ainaro oan sira, katak Ainaro Oan tenke hamutuk” ida ne’e tenke hatudu, maibe liu liu ba veteranus sira atu kontribui maksimu nafatin, sira ne’ebe uluk mate ne’e, sira hatene katak sira tenke mate, mate ohin ho aban ne’e mak sira la hatene, maibe sira hamrik sira hatene katak sira tenke mate, sira hakarak, sira ofrece sira nia an, agora ita sira sei moris ne’e dala ruma lae, ne’e duni inan aman sira, ha’u husu ba ita hotu hotu liu liu ba veteranus sira, atu kontribui iha situasaun dificil saida deit, hamutuk ho autoridade sira hodi fo solusaun ba problema.*Remata*

Jornalista : Juvito Maria Nunes

Editor      : Joaquim Coutinho

4 1 vote
Article Rating
Subscribe
Notify of
guest
0 Comments
Inline Feedbacks
View all comments