Inaugura Edificio Konselho Veteranus Ainaro, PAM Reprezenta Komunidade Hato’o Felicitasaun Ba Veteranus Sira

0
48 views

Racom Maubisse-2024, Edificio Ex Kodim Ainaro ne’ebe oras nakfilak ba edifiu Konselho Veteranus Municipiu Ainaro, tamba Iha tinan 1975 bandeira Fretalin hasai primeiro iha fatin ida no iha 28 de Novembro 1975, bandera Fretilin hasai uluk iha ne’e, ho nune’e mak Konselho Veterano Ainaro hili no hari fila fali rin iha fatin refere hodi relembra hikas tinan barak ba kotuk bandeira fretilin hari iha fatin refere. Tamba ne’e mak konselho veterano kolia ho Autoridade Munisipio Ainaro hodi oferese fali fatin ida ne’e ba konselho veteran, tamba veteranus merese atu hela iha fatin refere.

Relasiona ho inaugurasaun edificiu Konselho Veteranus Municipiu Ainaro nian ne’e, iha Intervensaun Presidente Autoridade Municipal de Ainaro Manuela Georgina C. Bucar Corte-Real ba dalauluk hateten katak;

“Mai ita agradece ba Inan Nain Feto Ramelau nia graça no rai Ainaro nia matak malirin, ne’ebe haraik ona mai ita hotu, hodi participa iha inaugurasaun escritorio konselho veteranus municipiu Ainaro, ho objektivu principal atu reforsa liu tan, produsaun servisu no atendementu dignu ba familia boot veteranus iha Municipiu Ainaro”.

Presidente Autoridade Municipal Ainaro ne’e hato’o kontinencia liu husi intervensaun ne’ebe ho lian makas uitoan dehan;

“Saudasoes kombativas, respeitoso ba veteranus sira mak ha’u hakruk no respeito, lori familia boot komunidade Ainaro nia naran ho laran ksolok hato’o votu de boas vindas ba konvidadus de onra sira husi nasional no husi municipiu seluk, mai iha rai Suru Ainaro”.

Tamba ne’e Autoridade Maksimu Municipiu Ainaro ne’e fo hanoin hikas fali ba Ainaro oan sira hotu no aman ho inan veteranus sira katak;

“Atu relembra deit ita hotu katak, artigu 11 Konstituisaun RDTL konsagra rekonhecimentu Estadu RDTL ba valour resistensia libertasaun nasional, tuir mandatu konstitusional ida ne’e, laos deit impoin obrigasaun konstitusional ba governu, maibe mos ba sidadaun hotu atu respeita veteranus sira nia existensia, tamba ne’e mak serimonia inaugurasaun ohin refleta principiu fundamental estadu ho nasaun iha ambitu valorizasaun veteranus sira nian”.

Presidente Autoridade Municipal de Ainaro ne’e hatutan liu tan katak;

“Sentidu no valoriza veteranus, tenke sai mos hanesan espíritu etika, moral, politika Timor Oan hotu, tamba so nunee deit mak ita bele fo onra no Gloria ba sakrifisiu Timor Oan atus ba atus nebe fo vida hodi hetan ita nia República ida ne’e, Espiritu patriotismu, no nasionalismu, ne’ebe tenke haburas no hatutan ba jerasaun foun, atu bele hatene, tane, hadomi, respeita no kuidadu RDTL hanesan uma mahon ba Timor Oan hotu”.

Antes termina Presidente Autoridade municipal de Ainaro ne’e iha nia mensajem ne’ebe hato’o ba Ainaro Oan hotu liu liu ba inan ho aman veteranus sira katak;

“Ba Aman no inan veteranus sira hotu, reprezenta komunidade Ainaro oan hotu nia naran ha’u hato’o felicitasaun ba aman no inan veteranus sira, tamba ohin ami hotu sai sasin ba escritoriu foun veteran nian, tamba ita hotu sei hamutuk no koopera hodi dezemvolve ainaro, nune’e dudu progresu dezemvolvimentu iha Rai Suru Ainaro, ita hotu hamutuk lori Ainaro ba futuru ida ne’ebe nabilan”.

Orsamentu ba rehabilitasaun edificio Konselho Veteranus Municipiu Ainaro ho total $14.000.00 no kompanhia ne’ebe mak kaer obra ne’e maka kompanhia DELON UNIP.LDA, no orsamentu ba inaugurasaun edificiu konselho Veteranus Municipiu Ainaro mai husi Ministeriu Assunto Kombatente libertsaun Nasional ho total $ 2.500.00.

Marka prezensa iha iha eventu inaugurasaun edificiu konselho veteranus municipiu Ainaro ne’e Ministro Kombatenete Libertasaun Nasional, PAM Ainaro, Komandante PNTL Municipiu Ainaro, Amu Vigario Ainaro, Presidente Konselho Veteranus Municipiu Manufahi, veteranus, komunidade, lia nain ho estrutura Konsekho Veteranus Municipiu Ainaro.

Jornalista : Juvito Maria Nunes

Editor      : Joaquim Coutinho

0 0 votes
Article Rating
Subscribe
Notify of
guest
0 Comments
Inline Feedbacks
View all comments